Read Nzema Dwo 4 Bible Online

Dwo 4 - Nzema bible

Dwo 4

¹Ɛlaefaze buale ye kɛ,

²“Dwobu, saa awie ka edwɛkɛ a ɛkɛva ɛya ɔ? Sonla ɛnrɛhola ɛnrɛdɛnla ɛke koonwu zɛhae.

³Wɔhilehile menli dɔɔnwo na wɔmaa menli mɔɔ ɛngola bɛ nwo la anwosesebɛ.

⁴Saa awie kpo aze, ɔ nwo golo ye na ɔfɛ a, wɔ ɛdendɛlɛ maa ye akɛnrazilɛ maa ɔdwazo.

⁵Na kɛkala mɔɔ yedo wɔ la, ɛnnyia nwolɛ abotane; yeha wɔ la, wɔ adwenle ɛbɔ nu.

⁶Wɔ Nyamenle ɛzulolɛ manle wɔ adwenle zile pi, yɛɛ wɔ ndenle kpalɛ zo ɛvalɛ manle wɔ anyelazo.

⁷Dwenle nwo, nwane a ɛnze nwolɛ bie na ɔwule, anzɛɛ nienwu yɛɛ bɛhunle tenlenema a?

⁸Mɔɔ meze la a le kɛ, menli mɔɔ so ninyɛndane ɛya, na bɛdua amumuyɛ la bu munzule.

⁹Nyamenle ɛnwomenle ɛgulɛ ku bɛ, na ye ɛya ne bɔ bɛ bo zo bɔkɔɔ.

¹⁰Amumuyɛma kpo na bɛtea kɛ awenade, na Nyamenle tudu bɛ gye na ɔmaa bɛyɛ koonwu.

¹¹Bɛle kɛ awenade mɔɔ ɛnnyia debie ɛngu ɛnli, bɛwu na bɛ mra ne mɔ bɔ asande.

¹²“Mekɛ bie ɛnelɛ bie hanle nrɛlaleɛ hilele me, ɛnelɛ ne dule me azukue.

¹³ Ɔrale kɛ ɛlalɛ ɛzulolɛ bie, mɔɔ menli ka wɔ bɛ nafelɛ nu la.

¹⁴Ɛzulolɛ hanle me, me nwo wozole me, na me mbowule nu wozole.

¹⁵Debie pɛle me nye zo, na me nwo bɔle me nyee.

¹⁶Deɛ ne gyinlanle koonwu, na meannwu ye sɔhovolɛ; ɛnee debie gyi me nyunlu ɛkɛ; ɛkɛ ne yɛle diinyi, akee mendele ɛnelɛ, ɔse:

¹⁷Asoo sonla kola yɛ tenlene tɛla Nyamenle anzɛɛ ɔ nwo kɛde kɛdɛla ye Bɔvolɛ?

¹⁸Ye sonvolɛma bɔbɔ, ɔnlie bɛ ɔnli, yɛɛ anwuma soanvolɛma bɔbɔ, ɔnyia bɛ nwo nvonleɛ.

¹⁹Na akee bɛdabɛ mɔɔ bɛvale ndɛtɛlɛ a bɛbɔle bɛ, mɔɔ bɛvi ndɛtɛlɛ nu, na bɛti bɛ kɛ ngɛkɛba la!

²⁰Ɔvi nwonlomɔ kɔdwu aledwolɛ, bɛsɛkye bɛ, bɛ bo zo minli bɔkɔɔ, awie ɛngakye bɛ.

²¹Saa bɛ ahonle nyɛma te a, ɛnee bɛwu, bɛwu mɔɔ nrɛlɛbɛ biala ɛnle nu a.