Read Nzema Dwo 40 Bible Online

Dwo 40 - Nzema bible

Dwo 40

¹“Dwobu, asoo sonla mɔɔ nvonleɛ ala a ɔkpondɛ la nee Tumivolɛ ne su kpolera? Awie mɔɔ nee Nyamenle su kpolera la, bɛmaa ɔye ɔ nloa.”

³Na Dwobu buale kɛ, “Ɛdɛnkɛma, mendwu bie; kɛ menzi membua wɔ ɛ? Meva me sa mezɔ me nloa.

⁵Meha ko, menga bieko; fane nwiɔ ɛ, mendɛ me nloa anu ko.”

⁶Akee Ɛdɛnkɛma buale Dwobu wɔ ahumuakyima ne anu.

⁷Ɔse, “Bɛza kpalɛ kɛ nrenya; mebiza wɔ edwɛkɛ, na ye me ɔ nloa.

⁸Yemɔti ɛdawɔ bɔbɔ ɛbua me fɔlɛ ɔ? Ɛbua me fɔlɛ na wɔali benle ɔ?

⁹Asoo ɛlɛ anwosesebɛ kɛ Nyamenle, yɛɛ ɛkɛhola ɛkɛva ɛnelɛ ɛkɛhulu kɛ ye ɛdeɛ ne la?

¹⁰Fa mgboleyɛlɛ nee dibilɛ siezie ɛ nwo; na fa anyunlunyia nee kɛnlɛma yɛ ɛ nwo hyeleenyi.

¹¹Wola wɔ ɛya kpole ne gua, na bɛlɛ awie biala mɔɔ ɛnea a ɔle mgbanyizonle la aze.

¹²Bɛlɛ awie biala mɔɔ le mgbanyizonle la aze, na tietia amumuyɛma anwo zo wɔ ɛleka biala mɔɔ bɛwɔ la.

¹³Fu bɛ kɔsɔɔti wula azɛlɛ bo; na kyekye bɛ nye wɔ ɛbolɔ.

¹⁴Na menwɔlie menwɔdo nu kɛ, ɛdawɔ wɔ anwosesebɛ kola maa ɛdi konim.

¹⁵“Nea nane kɔliadunli; membɔle ye kɛ membɔle wɔ la; ɔdi ndile kɛ ɛnlankɛ nyinli.

¹⁶Nea anwosesebɛ mɔɔ ɔlɛ ye ɔ nze nu, nee anwosesebɛ mɔɔ wɔ ye ndinli nu la.

¹⁷Ɔsa ɔ dua ketee kɛ sida baka, ɔ gyakɛ ndinli ne mɔ to bɛka nu.

¹⁸Ye mbowule yɛ se kɛ kɔbele, ye agbɔkɛ le kɛ mbulalɛ agbɔma.

¹⁹“Yemɔ a ɔle Nyamenle asa anloa gyima mɔɔ lumua; ye Bɔvolɛ ne ala a kola twe ɔ nwo dadeɛ a.

²⁰Ɔluakɛ ɔnyia aleɛ wɔ awoka ne mɔ azo, ɛkɛ ne a ɛbɔ nu nanemgbole kɔsɔɔti di nwɔhoa a.

²¹Atoatɛlɛ ne mɔ abo yɛɛ ɔda a, na ɔfea ndɔ ne mɔ abo wɔ azia ne anu.

²²Atoatɛlɛ ne mɔ maa ye alubo; azia nloa ndile bɔ yia ye.

²³Nea, saa azule ne tu kpole bɔbɔ a, ɔnzulo; azule Dwɔdan hu gua ɔ nyunlu bɔbɔ a, ye ahonle gyi pi.

²⁴Asoo awie kɛhola koba to kye ye, anzɛɛ kɛhola kɛva ɛhane kɛzɔ ɔ bonyi?