Read Nzema Dwo 41 Bible Online

Dwo 41 - Nzema bible

Dwo 41

¹ “Ɛkɛhola ɛkɛva fɛlɛ koba ɛkɛhye ɛlɛnrɛne, anzɛɛ ɛkɛva nyɛma ɛkɛkyekye ɔ tafinlima ɔ?

²Ɛkɛhola ɛkɛva nyɛma ɛkɛzinla ɔ bonyi nu, anzɛɛ ɛkɛva koba ɛkɛbɔ ye awudwolɛ ɔ?

³Asoo ɔkɛzu ɔkɛbodo wɔ? Asoo ɔkɛdendɛ bɛtɛɛ ɔkɛhile wɔ?

⁴Asoo ɔ nee wɔ bayɛ ngyekyeleɛ, kɛ ɛva ye ɛyɛ wɔ sonvolɛ dahuu?

⁵Asoo ɛ nee ye bali nwɔhoa kɛ ɛ nee anloma la, anzɛɛ ɛbazɔ ye nyɛma kɛ wɔ mbɛlɛra ne mɔ ɛva ɛli nwɔhoa?

⁶Asoo gualilɛma bali ye bolɛ? Asoo gualilɛma bahyɛ amaa bɛ nwo?

⁷Asoo ɛkɛhola ɛkɛva atwɛ ɛkɛwɔ ye nwoma ne, anzɛɛ ɛkɛva fɛlɛhyelɛ atwɛ ɛkɛwɔ ɔ ti?

⁸Fa ɛ sa ka ye nea; konle mɔɔ ɔ nee wɔ baho la, ɛnrɛyɛ ko ɛlɛ!

⁹“Nea, saa sonla nye bobɔ ye mgbane bɔbɔ a, ye anyelazo yɛ mgbane na ɔ nwo bubu ye.

¹⁰Awie fee anwo ɛnyɛ ɛzulolɛ mɔɔ kɛhola kɛha ye a. Na ɛnee akee nwane a kɛhola me nyunlu gyinla a?

¹¹Nwane a ɛva debie ɛvɛne me mɔɔ ɔwɔ kɛ metua a? Debie biala mɔɔ wɔ aleɛabo la le me ɛdeɛ.

¹²“Menrɛyɛ koonwu wɔ ɔ gyakɛ ne mɔ, ye anwosesebɛ bedevinli ne, anzɛɛ ɔdaye mumua ne ye kɛnlɛma ti.

¹³Nwane a kɛhola kɛkpa ɔ nwo tɛladeɛ a? Nwane a asa kɛhola kɛfiti ye konle tɛladeɛ ndazo ne a?

¹⁴Nwane a kɛhola kɛzɔ ɔ nloa kɛbuke ye a? Ɔ gye mɔɔ gua ɔ nloa anu la yɛ ɛzulolɛ.

¹⁵Ɔ nzi le kɛ enyinlike ɛhonlone, bɛbetɛbeta nwo kɛ bɛholo sumi bɛsosɔ bɛ.

¹⁶Ko beta ko kpalɛ kpalɛ mɔɔ anwoma bɔbɔ ɛngola ɛnze bɛ avinli a.

¹⁷Ko beta ko; bɛsosɔ bɛ nwo mɔɔ ɛkpɔkye ko bɔbɔ a ɔnyɛ boɛ a.

¹⁸Ye ɛnwuasinlɛ sɔ kɛ tɛkɛ, yɛɛ ɔ nye le kɛ mangyee sɛnzɛne.

¹⁹Senle gɔhyee vi ɔ nloa anu finde; ɔ nloa anu kpa senle.

²⁰Ɔ bonyi nu kpu esike, kɛ nzule mɔɔ gyi senle zo la kpukpuke.

²¹Ɔ bonyi nu anwoma kola maa senle sɔ, yɛɛ senle tafinlima vi ɔ nloa anu finde.

²²Ɔ kɔme baka ne anu yɛ se, ɔ nwo ka ɛzulolɛ.

²³Ye nwonane belebele gua zo; ɔkyekye ɔ nwo ketekete mɔɔ ɛsianyi nu a ɔnyɛ boɛ a.

²⁴Ye ahonle yɛ se kɛ bolɛ, ye ɛsesebɛ le kɛ ɛdibolɛ.

²⁵Saa ɔmaa ɔ nwo zo a, anwosesebɛma sulo; ɔka ɔ nwo a, bɛtɔ gyebilisanza.

²⁶Saa dadeɛ ka ye bɔbɔ a, ɔnyɛ ye tanye; na yeayɛ atwɛ, ɛda, anzɛɛ ɛtweneɛ.

²⁷Bulalɛ le ɔ nye zo ɛdɛkɛ, yɛɛ kɔbele le ɔ nye zo baka kpɔlɔlera.

²⁸Ɛda ɛngola ɛmmaa ɔnriandi, totoabɔ bolɛ le kɛ abonle.

²⁹Ahoholombaka le kɛ abɛlɛ baka welera, yɛɛ ɛtweneɛ wɔ ye a ɔsele.

³⁰Ɔ kɛnra zo abonle ne le kɛ foandɛkɛ anloa nlane; ɔtɛlɛdɛlɛ ɔ nwo kɛ ma ɛwozolɛ taboa wɔ azia nu.

³¹Ɔmaa buma wu kɛ ɛzɛne mɔɔ gyi senle zo; ɔmaa nyevile yɛ kɛ nwole mɔɔ gyi siase nu.

³²Ɔtu ɔtenrɛ a ɔgyakyi adenle fufule ɛdenraa ɔ nzi; ɔmaa sonla dwenle kɛ nyevile ne ɛvi egyɛne.

³³Aleɛabo, ye ɛsaso biala ɛnle ɛke, ɔle abɔdeɛ mɔɔ ɛnzulo ɛhwee a.

³⁴Ɔmbu debie biala mɔɔ tu ɔ nwo la ɛhwee; ɔdi mgbanyizonlema kɔsɔɔti belemgbunli.”