Read Nzema Dwo 42 Bible Online

Dwo 42 - Nzema bible

Dwo 42

¹Akee Dwobu buale Ɛdɛnkɛma.

²Ɔse, “Meze kɛ ɛkola ɛyɛ ninyɛne muala, yɛɛ awie ɛngola ɛnzɛkye wɔ ngyehyɛlɛ biala.

³ Ɛbizale kɛ me ndelebɛbo le nyɛ, mɔɔ mefedevede wɔ nrɛlɛbɛ nu a? Yemɔti medendɛ ɛdendɛlɛ mɔɔ mende ɔ bo a, meha edwɛkɛ mɔɔ menze a, na ye ɛzulolɛ bo me nwo zo.

⁴ Ɛzele me kɛ mendie na ɛtendɛ, ɛbiza me edwɛkɛ na menye ɔ nloa.

⁵Me nzo yɛɛ menvale mendele wɔ nganeɛ a, na kɛkala, yemɔ menwu ɛ nyunlu;

⁶yemɔti mebɔ anyiemgba na menlu me nwo; mebɔ ndɛtɛlɛ nee nzonle.”

⁷Mɔɔ Ɛdɛnkɛma hanle edwɛkɛ ɛhye mɔ hilele Dwobu la, akee ɔzele Timanli Ɛlaefaze kɛ, “Meva wɔ nee ɛ gɔnwo mɔ nwiɔ ne anwo ɛya, ɔluakɛ bɛanga nɔhalɛ ne mɔɔ fane me nwo la, kɛmɔ me sonvolɛ Dwobu hanle la.

⁸Yemɔti bɛva nlankɛ nyinli nsuu nee mboane nyinli nsuu bɛhɔ me sonvolɛ Dwobu anwo ɛkɛ ne bɛhɔbɔ ɛyelalɛ azu wɔ bɛdabɛ bɛ ti, na me sonvolɛ Dwobu bazɛlɛ amaa bɛ, ɔluakɛ mebadie ye nzɛlɛlɛ ne, na me nee bɛ ɛnrɛli ye kɛ mɔɔ bɛ ɛtane ne mɔ de la, ɔboalekɛ bɛanga me nwo edwɛkɛ kpalɛ kɛ mɔɔ me sonvolɛ Dwobu hanle la.”

⁹Yemɔti Ɛlaefaze, Beledade, yɛɛ Zofaa hɔyɛle mɔɔ Ɛdɛnkɛma zele bɛ la, na Ɛdɛnkɛma diele Dwobu nzɛlɛlɛ ne.

¹⁰ Mɔɔ Dwobu zɛlɛle manle ɔ gɔnwo mɔ la, Ɛdɛnkɛma akee manle ɔnyianle ye anwonyia ne mɔɔ ɔlɛ ye dɛba la mɔnwo.

¹¹Akee ɔ mediema mrenya nee mraalɛ rale ye sua nu nee ye radole ɛsalɛ; bɛyɛle ye gyakɔ na bɛkyekyele ɔ rɛle wɔ mɔɔ Ɛdɛnkɛma ɛmaa yezi ɔ nwo zo la anwo, na bɛ nuhua ko biala manle ye ezukoa nee ezukoa nvutuke kpɔdelera.

¹²Akee Ɛdɛnkɛma yilale Dwobu kpole kpalɛ dɛlale alumua ne; ɔnyianle mboane apenle ngoko bulu nee nna, afunlumu apenle nsia, nlankɛ nyinli apenle nwiɔ, yɛɛ asoaso mbelɛ apenle ko.

¹³Eza ɔwole mralɛ mrenya nsuu nee mraalɛ nsa.

¹⁴Ɔdonle raalɛ kpanyinli kpalɛ ne Gyimaema,[9] ɔdonle mɔɔ doa ye la Kɛzia,[10] yɛɛ mɔɔ tɔ zolɛ nsa la, ɔdonle ye Kɛlɛn Hapɛke.[11]

¹⁵Wɔ aleɛabo, mraalɛ ɛnle ɛleka biala mɔɔ nee Dwobu amra mraalɛ ne mɔ sɛ anwofɛlɛko a; bɛ ze gyakyile bɛ agyadeɛ kɛ bɛ mediema mrenya ne mɔ ala la.

¹⁶Ɛhye mɔ kɔsɔɔti anzi, eza Dwobu dɛnlanle aze lile ɛvolɛ ɛya ko abulanla, ɔnwunle ɔ mra, ye nlɔnra, nee ye angabɛnzo.

¹⁷Dwobu wule wɔ mekɛ mɔɔ ɛnee akee yeyɛ ɛrelera nwosonwoso la.