Read Nzema Dwo 5 Bible Online

Dwo 5 - Nzema bible

Dwo 5

¹“Ɛkulo a fɛlɛ, saa ɛkɛnyia awie kɛlie wɔ zo a; anwondelɛma ne mɔ boni yɛɛ ɛfa ɛ nye wɔado ɔ nwo zo a?

²Nɔhalɛ, ɛya ku koasea, yɛɛ anyebolo ku kɔnwɔne.

³Menwu kɛ koasea ɛzɔ ndinli, noko arɛlevilɛ nu, membɔle ye awuke ne sasa.

⁴Ɔ mra nee munzule avinli anwa, bɛku bɛ wɔ anlenkɛ kpole ne anloa, bɛnlɛ dievolɛ biala.

⁵Menli mɔɔ ɛhɔne ku bɛ la di bɛ bɛyɔba ne, kanza bɛgua mbowule nu bɔbɔ a, bɛbu, yɛɛ anyeboloma anye bolo bɛ anwonyia.

⁶Anwubɛnyunlu ɛnvi azɛlɛ nwo, yɛɛ ngyegyelɛ ɛnfifi ndɛtɛlɛ nu.

⁷Bɛwo sonla bɛmaa ngyegyelɛ, ɔle kɛ senle mɔɔ tudu kɔ anwuma la.

⁸“Saa medame a, anrɛɛ mebadoa Nyamenle abo zo, na meava me edwɛkɛ meawula ɔ sa nu;

⁹yemɔ mɔɔ ɔyɛ ninyɛne mgbole, mɔɔ ɛnlɛ nvedenu, ye nwanwane nyɛleɛ ɛnlɛ ɔ nloa.

¹⁰Ɔmaa ezule tɔ azɛlɛ ye azo na ɔgugua nzule wɔ ɛbɔ ne mɔ azo.

¹¹Ɔmaa bɛlɛvoma zo, na ɔye nyanelilɛma ɔfi nyane nu.

¹²Ɔsɛkye agyibatovoma mɛlɛbɛla, na ɔmaa bɛfua asakpane.

¹³ Ɔkye nrɛlɛbɛvolɛma wɔ bɛdabɛ bɛ agyibadolɛ nu, na agyibadolɛma ngyehyɛlɛ ne mɔ pɛ sinli ndɛndɛ.

¹⁴Awozinli fa bɛ alehyenlɛ nu, na bɛdi nvuovua ewiazo ketekete kɛ nɔɔzo.

¹⁵Ɔdie menli mɔɔ ɛhyia la ɔfi dadeɛ nloa, na ɔdie bɛ ɔfi mgbolema asa anu.

¹⁶Yemɔti ehyianvolɛma lɛ anyelazo, na menli mɔɔ ɛnli pɛlepɛle la ka bɛ nloa to nu.

¹⁷ “Nyilalɛ ɛha sonla ne mɔɔ Nyamenle twi ɔ nyunlu la, yemɔti mmakpo Nyamenle Bɛdevinli ne ndeanlɛ.

¹⁸ Ɔluakɛ ɔbo wɔ a, ɔsia ɔdwu wɔ, yɛɛ ɔtea wɔ a, ɔfa wɔ ɔbɔ ye ɛbolɛ.

¹⁹Ɔbaye wɔ yeavi ngyegyelɛ fane nsia anu, nsuu ne azo, munzule biala ɛnrɛdo wɔ.

²⁰Wɔ ɛhɔne nu, ɔbaye wɔ yeavi ewule nu; wɔ konle nu, ɔbaye wɔ yeavi dadeɛ nloa.

²¹Ɔbaye wɔ yeavi dumanzɛkyelɛ nu, yɛɛ saa ewule ba a ɛnrɛzulo.

²²Ɛbazele ewule nee ɛhɔne, yɛɛ ɛnrɛzulo aleɛabo nanemgbole biala.

²³Ɔluakɛ ɛ nee ɛbɔ nu awolɛ mgbole bali ngitanwo, na aleɛabo nanemgbole nee wɔ adɛnla anzonudwolɛ nu.

²⁴Ɛbanwu kɛ anzonudwolɛ wɔ wɔ sua nu, yɛɛ ɛnrɛminli debie biala wɔ wɔ mboane tunli nu.

²⁵Eza ɛbanwu kɛ ɛ bo zo amra bada, na ɛ kunlu mralɛ anyenle kɛ ɛbɔ nu ndile.

²⁶Ɛbayɛ nwosonwoso kolaa na wɔawu, kɛmɔ ɛlobɔ dwu na bɛava ma bɛahɔ ma ɛwozolɛ ɛleka la.

²⁷Nea, yɛvedevede ɛhye anu, na ɔle nɔhalɛ. Yemɔti Dwobu, tie na die to nu.”