Read Nzema Dwo 6 Bible Online

Dwo 6 - Nzema bible

Dwo 6

¹Dwobu buale ye kɛ,

²“O, anrɛɛ bɛazuzu me nyane ne, nee me amaneɛnwunlɛ ne wɔ tone zo!

³Anrɛɛ bɛkɛnwu kɛ ɔyɛ ɛnlomboɛ ɔtɛla ɛnweazo ɛnwea, ɛhye ati a me mgbolehanlɛ ne ɛyɛ nwanwane a.

⁴Tumivolɛ Nyamenle ne ɛda mbaka ne ɛwowɔ me, na ye bɔlɔ ɛwie me wolowolo, yɛɛ Nyamenle ɛya mgbole ne mɔ ɛra me nwo zo.

⁵“Asoo asoaso nyia ndile na ɔlɛdi a ɔsu, anzɛɛ ɛnlankɛ gyi aleɛ nwo a ɔsu?

⁶Asoo aleɛ tatabɛ, bɛdi a ɔdi? Asoo kolonvia aleɛ fufule ne yɛ fɛ?

⁷Me tiakunlu ɛmba zo bɔbɔ; bɛle aleɛ mɔɔ ka me ya.

⁸“O, anrɛɛ meanyia mɔɔ mebiza la, na Nyamenle akponle mɔɔ mekpondɛ la azo!

⁹Anrɛɛ ɛnee Nyamenle kɛhu me pɛneko, na ɔkɛpɛ me ngoane zo.

¹⁰Anrɛɛ ɛhye bakyekye me rɛle; na meali fɛlɛko wɔ me nyane nu, ɔluakɛ metɛtule Nwuanzanwuanza Ko ne anloa.

¹¹Duzu anwosesebɛ a melɛ, mefa mekendɛ a? Yɛɛ kɛ menwɔwie ye mɔɔ ɔwɔ kɛ mesi abotane a?

¹²Ɛnee me anwosesebɛ le kɛ awolɛ ɔ? Anzɛɛ me nwonane le kɔbele ɔ?

¹³Nɔhalɛ nu, menlɛ anwosesebɛ biala me nu, yɛɛ menlɛ ɛleka mɔɔ moalɛ vi bara a.

¹⁴“Awie biala mɔɔ ɛnyɛ atiakunlukɛnlɛma la ɛnzulo Tumivolɛ Nyamenle ne.

¹⁵Me mediema ne mɔ le ngunzi; bɛle kɛ azuboazɛlɛ[3] mɔɔ azule se zo bobobobo,

¹⁶na ezukɔtweaba kɔfea nu yɛ azule ne anye fii, kyengye ye.

¹⁷Wuluwulu melɛ nu bɛkolo, na bɛ bo zo minliminli bɔkɔɔ.

¹⁸Adenduvoma di ɛkɛ ne akɔneaba bɛkɔkpondɛ nzule ne toonwo bɛwu.

¹⁹Tima adenduvoma neɛnlea, Hyiba adenduvoma anye da.

²⁰Bɛ anyelazo bɔ bɛ, ɔboalekɛ ɛnee bɛdie bɛdi; bɛkɛhɔdwu la, ɛnee nzule ne ɛsesa.

²¹Zɛhae yɛɛ bɛle bɛmaa me a; bɛnwu me anwubɛnyunlu la, ɛzulolɛ ɛha bɛ.

²²Meha kɛ bɛhyɛ me debie ɔ? Anzɛɛ bɛva bɛ anwonyia ne bie bɛdua me ti ndoloboa ɔ?

²³Meha kɛ bɛlie me bɛvi kpɔvolɛ ne asa anu ɔ? Anzɛɛ bɛkpɔne me bɛvi nzisima asa anu ɔ?

²⁴“Bɛhilehile me, na menwɔyɛ koonwu; bɛmaa menwu ɛtane mɔɔ meyɛ la.

²⁵Nɔhalɛ edwɛkɛ nu mia! Na bɛ ndeanlɛ ye, duzu anwo ndeanlɛ ɔ?

²⁶Ɛnee bɛdwenle kɛ bɛkola bɛtea edwɛkɛ ɔ, wɔ mekɛ mɔɔ sonla mɔɔ ɛnlɛ anyelazo la edwɛkɛ ɛhanlɛ le anwoma la?

²⁷Bɛnyia arisa a, bɛkɛgua ɔ ti nzeleba, na bɛkɛdɔne agɔnwolɛma.

²⁸Na kɛkala, mebodo bɛ, bɛnlea me, ɔluakɛ menrɛbɔ adalɛ wɔ bɛ nyunlu.

²⁹Mebodo bɛ, bɛgyakyi, bɛmmabua me mgbɔvodɛne; bɛgyakyi, na medi benle.

³⁰Anzɛɛ meha ɛtane ɔ? Menze kpalɛ menze ɛtane ɔ?