Read Nzema Dwo 7 Bible Online

Dwo 7 - Nzema bible

Dwo 7

¹“Sonla ɛbɛlabɔlɛ yɛ se wɔ azɛlɛ ye azo, sonla mekɛ kɔsɔɔti le kɛ ɛkpanli.

²Ɔle kɛ kanranli mɔɔ kpondɛ alubo nu adɛnla, ɔle kɛ ɛkpanli mɔɔ anye la ye ahatualɛ zo.

³Zɔhane ala yɛɛ bɛhyehyɛ mekɛ mgbane nee aledwolɛ anu nyane bɛmaa me a.

⁴Saa meda a mebiza kɛ, ‘Kenlenzu yɛɛ mebadwazo a?’ Aledwolɛ ne wale, mekɔsɔ mekɔ, mekɔsɔ meba, mepe toonwo alehyenlɛ.

⁵Melɔ azonlɛ, me nwo ɛzi bile, me nwo nwoma di wulate.

⁶Me mekɛ se ndɛndɛ tɛla ɛdanlɛnwovolɛ agbuyiaba, na ɔba awieleɛ mɔɔ anyelazo ɛnle nu a.

⁷“Kakye kɛ me ngoane le anwoma; me nye ɛnrɛnwu debie kpalɛ bieko.

⁸Ɛnyelɛ mɔɔ nwu me la ɛnrɛnwu me bieko; mɔɔ bɛ nye dua me ala la, mebado ɛbɛla ne aze.

⁹Kɛmɔ amungu kpa na ɔpɛ nu ɔse la, zɔhane ala yɛɛ mɔɔ kɔ Ɛbolɔ la ɛnzia ko a.

¹⁰Ɔnzia ɔmba ye awuke nu bieko, yɛɛ ye awuke nu amra ɛnze ye ko.

¹¹Yemɔti menrɛmua me nloa; mebaha mɔɔ wɔ me kunlu la; mebaha mɔɔ wɔ me ahonle nu la.

¹²“Mele nyevile, anzɛɛ nyevizonle, mɔɔ ɔwɔ kɛ bɛmaa me sinzavolɛ a?

¹³Saa meka kɛ, ‘Me ɛkpa bakyekye me rɛle, me ebia mɔɔ meda nu la bamaa me anwofofolɛ aha aze’ a,

¹⁴ɛnee bɛfa ɛlalɛ bɛnwunlonwunla me, na bɛfa ɛnyelɛzodeɛnwunlɛ bɛka me ɛzulolɛ.

¹⁵Yemɔti menwɔhulo kɛ bɛkɛmia me kɔmenzia bɛkɛhu me tɛla kɛ ɔkɛha me mbowule.

¹⁶Mekpo me ngoane; menrɛhakyi bolɛ. Bɛgyakyi me, ɔluakɛ kɛkala, me ngoane ɛnle ɛhwee.

¹⁷ “Na Nyamenle, sonla le duzu, mɔɔ ɔhyia wɔ zɛhae a, mɔɔ ɛ nye wɔ ɔ nwo zɛhae a?

¹⁸Mɔɔ nwolomɔ biala ɛkpɔla ye, na mekɛ biala ɛsɔ ye ɛnea ɛ?

¹⁹Kenlenzu yɛɛ ɛkɛye ɛ nye me nwo, anzɛɛ ɛkɛgyakyi me ɛkɛmaa menwɔme nyɛlɛ a?

²⁰Saa meyɛ ɛtane a, ɛnee duzu a meyɛ wɔ a, wɔmɔ menli sinzavo? Duzu ati a ɛ nye gyi me nyunlu zɛhae a? Duzu ati a meyɛ adesoa memaa wɔ a?

²¹Duzu ati a ɛnrɛva me mɛladonlɛ ɛnrɛhyɛ me, na ɛnrɛva me amumuyɛ ɛnrɛhyɛ me ɛ? Ɔluakɛ mebala azɛlɛ ye abo; ɛbakpondɛ me, na ɛnrɛnwu me.”