Read Nzema Dwo 8 Bible Online

Dwo 8 - Nzema bible

Dwo 8

¹Na Beledade hanle kɛ,

²“Na kenlenzu a ɛkɛwie tendɛ a? Ɛ nloa edwɛkɛ le kɛ anwoma kpole bie la.

³Ɛnea a ɛnee Nyamenle kyi nɔhalɛ, anzɛɛ Tumivolɛ ne kyi pɛlepɛlelilɛ ɔ?

⁴Saa ɛ mra ɛyɛ ɛtane ɛtia ye a, yeye bɛ yemaa bɛdabɛ bɛ ɛtane.

⁵Saa ɛkɛkpondɛ Nyamenle abo zo, na ɛkɛbodo ɛkɛzɛlɛ Tumivolɛ ne,

⁶saa ɛmaa ɛ nwo te na ɛbɔ ɛbɛla mɔɔ tenrɛ, nɔhalɛ, ɔbaheha ɔ nwo na yeakyekye wɔ awuke ne bieko,

⁷amaa saa mɔlebɛbo ne ɛle ekyi a, wɔ awieleɛ nu wɔayɛ sonlakpole.

⁸“Mesɛlɛ wɔ, biza mɔɔ ɛze ɛhɔ la, na dwenle mɔɔ ɛ ze mɔ ɛnwu ye la anwo.

⁹Ɔluakɛ anoma ala a bɛwo yɛ a, yɛnze ɛhwee, yɛ mekɛ wɔ azɛlɛ ye azo le kɛ ɛlawolɛ.

¹⁰Bɛbahilehile wɔ, na bɛaha mɔɔ bɛnwunle ye la bɛahile wɔ.

¹¹Asoo ndɔ fifi ɛleka mɔɔ azia ɛnle la, anzɛɛ ɔnyi ɔtɛlɛdɛlɛ wɔ ɛleka mɔɔ nzule ɛnle la?

¹²Mɔɔ bɛkɛgyinla dedɛkɛɛ na bɛtɛpepɛle bɛ la, bɛkyengye bɛwu kolaa na baka biala awu.

¹³Kɛ menli mɔɔ arɛle fi Nyamenle la ndenle nu de la ɛne; sonla mɔɔ ɛnze Nyamenle la anyelazo bawie.

¹⁴Ye adwenle ɛnzi pi, yɛɛ ye diedi le kɛ kɛdɛba ndenda.

¹⁵Ɔtudu ɔkisia ye sua, noko sua ne golo; ɔsɔ nuhua, noko sua ne ɛngyinla.

¹⁶“Sɛnzɛne ne ɛtɛtudule a ɔnyi ɔtoto ɔ sa, na ɔtende ɔgua ye tola ne bane ne mɔ azo.

¹⁷Ye ndinli beba awolɛ edukue ne, na ɔgyinla awolɛ ne mɔ avinli.

¹⁸Saa bɛtu ye bɛfi ɔ bo zo ne a, ɔkpo ye na ɔka kɛ, ‘Metɛnwunle wɔ ɛlɛ!’

¹⁹Ɛhɛe, kɛ ye fɛlɛkolilɛ adenle ne de la ɛne; bie mɔ noko fifi ɔ bo zo ne.

²⁰“Noko, Nyamenle ɛnrɛkpo mɔɔ ɛnze nwolɛ bie la, yɛɛ ɔnrɛzɔ ɛtanevolɛma asa.

²¹Ɔbamaa ɛ nloa anwo ayɛ ɛzelekɛ ɛzelekɛ, na wɔava fɛlɛkolilɛ wɔadeɛdea nu.

²²Menli mɔɔ kpɔ wɔ la baheda anyiemgba ɛdanlɛ, na amumuyɛma awuke ne mɔ abɔ tɔɔ.”