Read Nzema Dwo 9 Bible Online

Dwo 9 - Nzema bible

Dwo 9

¹Na Dwobu buale ye kɛ,

² “Nɔhalɛ, meze kɛ ɔle zɔ. Noko nwane a di benle wɔ Nyamenle anyunlu a?

³Saa awie se kɛ ɔ nee ye yeye ɛnloanlɛ a, ɔnrɛhola ye kpuyia apenle ko anu ko bɔbɔ anloa ye.

⁴Ɔle nrɛlɛbɛvolɛ, yɛɛ ye anwosesebɛ le bedevinli; nwane a nee ye ɛdwudwu na yenyia gyinlagyakɛ a?

⁵Saa ɔfa ɛya a ɔdwulu awoka, na ɔtudu bɛ mɔɔ ɔngakye awie a.

⁶Ɔkpusu azɛlɛ ɔtudu ye ɔ bo zo ne, na ɔmaa ye mpila ne mɔ kpusu.

⁷Ɔsisi sɛnzɛne ne anwo zo, ɔmmaa ɔndudu, na ɔkeda nwɔlɔra nyunlu.

⁸Ɔdaye ɔ ngome a ɔbɔle anwomanyunlu tɛtɛlɛ ye, na ɔtietiale nyevile azɛlɛkye zo a.

⁹ Ɔbɔle nwɔlɔra Ɛrelera nee ɔ mra nee Apeansa, Nwɔlɔra Nsuu nee nyiakɛ nwɔlɔra.

¹⁰Ɔyɛ ninyɛne mgbole mɔɔ bo sonla ndelebɛbo zo, ɔyɛ nwanwane ninyɛne mɔɔ ɛnlɛ ɔ nloa a.

¹¹“Nea, ɔse me nwo ɛkɛ, noko mennwu ye; ɔlɛkɔ bɔbɔ a mennwu ɔ nwo.

¹²Saa Nyamenle ɛlɛfa debie a, nwane a kɛhola ye aze si a? Nwane a kɛhola kɛbiza ye kɛ, ‘Duzu a ɛlɛyɛ la?’

¹³Nyamenle ɛnrɛhwe ye ɛyavalɛ ne ɛnrɛzia; Releehabe boavolɛma bɔ bɛ ti aze ɔ nyunlu.

¹⁴Ɛnee kɛ menzi membua ye ɛ, duzu edwɛkɛkpɔkɛ a meka a?

¹⁵Menli fɔlɛ, noko menrɛhola ye bua; ɔwɔ kɛ mesɛlɛ me ndɛnebuavolɛ ne anwunvɔnezelɛ.

¹⁶Saa menvɛlɛle ye yɛɛ ɔliele me zo a, anrɛɛ menrɛlie menrɛli kɛ yedie me ne.

¹⁷Ɔluakɛ ɔfa ahumu ɔbɛlɛ me aze, na mgbane ne ala ɔmaa me nwo nganlɛ yɛ dɔɔnwo.

¹⁸Ɔmmaa menlie me ɛnwomenle, na ɔmaa ɛbɛlabɔlɛ yɛ ɛnwonle.

¹⁹Saa ɔba anwosesebɛ ɛzulɛ a, ɔle bedevinli; saa ɔba pɛlepɛlelilɛ a, nwane a kɛhola ye a?

²⁰Menze nwolɛ bie, medi nɔhalɛ, noko me nloa bua me ewule fɔlɛ; menli fɔlɛ, noko yehile kɛ menle kpalɛ.

²¹Menli fɔlɛ; membu me nwo; me kunlu bɔbɔ a anrɛɛ mewu.

²²Ɔ muala wie ko; yemɔti mese, ɔsɛkye kpalɛma, ɔsɛkye amumuyɛma.

²³Saa esiane fa arɛlevilɛ nu ewule ba a, ɔsi anzenwolɛbiema anwubɛnyunlu amgbu.

²⁴Bɛva azɛlɛ ye bɛwula amumuyɛma asa anu; ɔkedɛheda ndɛnebuavolɛma anyunlu, na saa tɛ ye a, ɛnee nwane ɔ?

²⁵“Me mekɛ se waa tɛla sonla mɔɔ ɛlɛnriandi la; ɔse ɔkɔ, ɔnnwu kpalɛ biala.

²⁶Ɔpɛ nu ɔkɔ kɛ ndɔ mɔɔ la azule nye, ɔto kɛ kɔleɛ ɛlɛto ahye nane.

²⁷Saa meka kɛ, ‘Memaa me rɛle avi me nyane, meagyakyi me nyunlu alɔbɔlɛ ɛyɛlɛ, meamaa me nye alie’ a,

²⁸me nyanenwunlɛ ne ka me ɛzulolɛ, ɔluakɛ meze kɛ ɛbabua me fɔlɛ.

²⁹Bɛbabua me ewulefɔlɛ, duzu ati a ɔwɔ kɛ mefonla me nwo a?

³⁰Saa mefa saminla mebia, na mefa anatele meyɛ me sa anwo a,

³¹ɛbavuandi me wɔado ewula nu, na medame me nwo ndanlɛ bɔbɔ bahyi me.

³²Ɔluakɛ ɔnle sonla kɛ medame la na meabua ye, na yɛ mu nwiɔ yɛaye ndɛne.

³³Kpɔdavolɛ biala ɛngyi yɛ avinli, mɔɔ kɛkpɔda yɛ mu nwiɔ a.

³⁴Bɛmaa ɔva me nwo empele ne ɔhɔ, na ɔmmafa ɔ nwo ɛzulolɛ ne ɔnwunlonwunla me.

³⁵Amaa meanzulo ye na meandendɛ, ɔluakɛ menle kɛ mɔɔ bɛmɛ bɛdwenle kɛ mele la.