Read Nzema Edw 10 Bible Online

Edw 10 - Nzema bible

Edw 10

¹O Ɛdɛnkɛma, duzu ati a ɛwɔ moa zɛhae ɛ? Duzu ati a ɛfa ɛ nwo ɛfea amaneɛnwunlɛ mekɛ nu ɛ?

²Amumuyɛma tu ehyianvolɛma mgbaliko atisesebɛ nu; maa bɛ adwenle mɔɔ bɛva la ɛbu ɛzia bɛ.

³Ɔluakɛ amumuyɛnli fa mɔɔ ɔkpondɛ la tu ɔ nwo, yɛɛ mɔɔ di ndunlumi la ɛmbu Nyamenle, ɔkpo ye.

⁴Amumuyɛnli fa adubɛnwo kpo Ɛdɛnkɛma, ye adwenle muala a le kɛ, “Nyamenle ɛnle ɛkɛ.”

⁵Mekɛ biala ɔkpazi; wɔ ndɛnebualɛ ne, ɔnde ɔ bo; ɔmemaa ɔ nwo zo ɔkile ye kpɔvolɛma amuala.

⁶Ɔdwenle ɔka kɛ, “Menrɛhyia ɛlɛ, munzule ɛnrɛdo me ɛlɛ wɔ awolɛndoazo kɔsɔɔti anu.”

⁷ Ɔ nloa anu le amowa, nzisi nee adalɛ ngome; amumuyɛ nee ɛtane vea ɔ tafinlima abo.

⁸Ɔkɔ nzia wɔ namunamu nu, ɔfea ɔku menli mɔɔ ɛnze nwolɛ bie. Ɔgua ɔ nye aze ɔkpondɛ menli mɔɔ ɛnlɛ boavolɛ la,

⁹ɔfea ɔ nwo kɛ awenade mɔɔ ɛhɔ nzia; ɔkɔ menli mɔɔ ɛhyia la anwo nzia, ɔkye ehyianli ye ɛhane nu na ɔtwenle ye ɔkɔ.

¹⁰Ɔtinli mɔɔ ɛnlɛ awie la ɔmaa ɔgolo ɔgua, ɔfa ye anwosesebɛ ɔdi ɔ nwo zo konim.

¹¹Ɔdwenle ɔka kɛ, “Nyamenle arɛle ɛvi, yeheda ɔ nye, ɔnrɛnwu ye ɛlɛ.”

¹²O Ɛdɛnkɛma, dwazo; O Nyamenle, maa ɛ sa zo; mmamaa ɛ rɛle fi mɔɔ ɛlɛnwu nyane la.

¹³Duzu ati a amumuyɛnli kpo Nyamenle, na ɔka kɛ, “Ɔnrɛvɛlɛ me kɛ memambu mgbonda” ɛ?

¹⁴Ɛdawɔ ɛnwu ye; ɛhɛe, ɛnwu amaneɛ nee nyane ne, ɛkola ɛsɔ ye ɛ sa mu nwiɔ; mɔɔ ɛnlɛ boavolɛ la fa ɔ nwo maa wɔ; wɔyɛ bɛdabɛ mɔɔ bɛnlɛ bɛ ze mɔ la boavolɛ.

¹⁵Bubu amumuyɛ nee ɛtanenli ne tumi ne; neɛnlea ye nuhua ye amumuyɛ biala mɔɔ bie ɛnga a.

¹⁶Ɛdɛnkɛma le belemgbunli dahuu; bɛdabɛ mɔɔ bɛnzonle ye la abo zo baminli ye azɛlɛ ne azo.

¹⁷O Ɛdɛnkɛma, tie bɛlɛvoma nzɛlɛlɛ, si bɛ ahonle; gyele ɛ nzo tie bɛ.

¹⁸Di pɛlepɛle maa mɔɔ ɛnlɛ ɔ ze, nee mɔɔ bɛlɛsisi ye la, amaa sonla mɔɔ le ndɛtɛlɛ la anga ɛzulolɛ bieko.