Read Nzema Edw 102 Bible Online

Edw 102 - Nzema bible

Edw 102

¹O Ɛdɛnkɛma, tie me nzɛlɛlɛ; maa me ɛzunlɛ ɛdwu ɛ nyunlu.

²Mmafa ɛ nye ɛfea me wɔ me ngyianlɛ mekɛ nu. Gyele ɛ nzo tie me; saa mefɛlɛ wɔ a die me zo ndɛndɛ.

³Ɔluakɛ me mekɛ ɛlɛse kɛ esike, me mbowule nu dɔ kɛ fonlomo.

⁴Me ahonle ɛde kɛ nya, na yenwoso; me rɛle fi bɔbɔ kɛ menwɔli aleɛ.

⁵Me ɛkponlenlɛ ɛyɛ kpole, mewie nwa bɔkɔɔ.

⁶Meyɛ kɛ fienemgbole nu ɛkpɔtɛ, meyɛ kɛ kpadule wɔ suadu zo.

⁷Meyɛ kɛ anloma mɔɔ ɔ ngome ɔgyi sua ti zo, meda a menlafe.

⁸Me kpɔvolɛma twi me nyunlu dahuu, bɛdabɛ mɔɔ bɛsi me amgbu la fa me duma yɛ ndonwo wa amonle.

⁹Wɔ ɛya kpole ne ati, nzonle ɛhakyi me aleɛ. Me nye monle twi gua me nzule nu, ɔluakɛ wɔmaa me zo na wɔvuandi me wɔdo.

¹¹Me mekɛ le kɛ nɔsolɛ nu ɛlawolɛ; menwoso kɛ ndile.

¹²Na wɔmɔ, O Ɛdɛnkɛma, ɛle belemgbunli dahuu; wɔ duma ne gyi ɛkɛ maa awolɛndoazo muala.

¹³Dwazo na nwu Zayɔn anwunvɔne; mekɛ ɛdwu mɔɔ ɔwɔ kɛ ɛnwu ye anwunvɔne a; mekɛ ne mɔɔ ɛhilele la ɛdwu.

¹⁴Ɔluakɛ ye awolɛ ne sonle bolɛ maa wɔ sonvolɛma na ye ɛzɛkyelɛ ne maa bɛdi nyane.

¹⁵Maanle maanle bazulo Ɛdɛnkɛma duma ne, ewiade arelemgbunli kɔsɔɔti bazulo ye anyunlunyia ne.

¹⁶Ɔluakɛ Ɛdɛnkɛma bakyekye Zayɔn, na yeavinde anyunlunyia nu.

¹⁷Ɔbadie bɛdabɛ mɔɔ bɛnlɛ awie la nzɛlɛlɛ, na ɔnrɛkpo bɛ modolɛ nzɛlɛlɛ.

¹⁸Bɛhɛlɛ ɛhye bɛmaa awolɛndoazo mɔɔ bara la, amaa menli mɔɔ bɛtɛwole bɛ la aye Ɛdɛnkɛma ayɛlɛ kɛ:

¹⁹Ɛdɛnkɛma de ye anwuma nwuanzanwuanza lɔ, ɔbelele ɔ nye ɔnleanle azɛlɛ ye,

²⁰kɛ ɔtie pilizama ɛkponlenlɛ, na yeatulu bɛdabɛ mɔɔ bɛ nee bɛ ɛlɛkɔ ahunleɛ la;

²¹amaa menli abɔ Ɛdɛnkɛma duma ne nolo wɔ Zayɔn, na bɛaye ye ayɛlɛ wɔ Gyɛlusalɛm,

²²wɔ mekɛ mɔɔ menli kɛwie yia, na maanle maanle kɛyia kɛ bɛsonle Ɛdɛnkɛma la.

²³Ɛdɛnkɛma ɛmaa meyɛ bɛtɛɛ wɔ me mgbavolɛ nu, yepɛ me ngoane zo.

²⁴Na menganle kɛ, “O me Nyamenle, mmaye me zo wɔ me mgbavolɛ nu. “Wɔmɔ, wɔ ɛvolɛ gyi kpundii, wɔ awolɛndoazo muala anu.”

²⁵ Mɔmoane yɛɛ ɛwulale azɛlɛ ye adiabo aze a, yɛɛ anwumaneamra le ɛ sa anloa gyima.

²⁶Bɛ bo zo baminli, noko wɔmɔ, ɛwɔ ɛkɛ ne dahuu; bɛ muala bɛbatete kɛ adɛladeɛ. Ɛdi bɛ ngakyile kɛ ɛdanlɛ, na bɛse bɛkɔ,

²⁷noko kɛ ɛde la ala a ɛde a, wɔ mekɛ ɛnlɛ awieleɛ.

²⁸Wɔ sonvolɛma abo zo amra anwo badɔ bɛ; bɛ bo zo amra badɛnla ɛ nyunlu kpɔkpɔ.