Read Nzema Edw 103 Bible Online

Edw 103 - Nzema bible

Edw 103

¹[59] O me ɛkɛla, ye Ɛdɛnkɛma ayɛlɛ; mɔɔ wɔ me nu la amuala, bɛye ye duma nwuanzanwuanza ne ayɛlɛ!

²O me ɛkɛla, ye Ɛdɛnkɛma ayɛlɛ, na mmamaa ɛ rɛle fi ye ahunlunyele ne mɔ.

³Ɔfa wɔ ɛtane ne mɔ amuala ɔkyɛ wɔ, ɔyɛ wɔ ewule kɔsɔɔti ayile.

⁴Ɔdie wɔ ngoane ɔfi Ewule Kuma nu, na ɔkile ye ɛhulolɛ kpundii ne nee ye anwunvɔnezelɛ ne ɛ nwo zo.

⁵Ɔmaa wɔ ɛbɛla nu ninyɛne kpalɛ, wɔ mekɛ mɔɔ ɛde ngoane nu la.

⁶Ɛdɛnkɛma di pɛlepɛle na ɔbua mɔɔ bɛlɛsisi ye la benle.

⁷Ɔlale ye ndenle ne ali wienyi ɔhilele Mosisi, ɔmanle Yizilayɛma nwunle ye nyɛleɛ ne mɔ.

⁸ Ɛdɛnkɛma le dovolɛ nee anwunvɔnezelɛnli, ɛhulolɛ kpundii ɛyi ye, ɔnva ɛya mgbane mgbane.

⁹Ɔndwi sonla nyunlu dahuu, yɛɛ ɔnva ɛya ɔnzie ɔ kunlu dahuu.

¹⁰Ɔ nee yɛ ɛnli ye kɛmɔ yɛ ɛtane ne mɔ si de la, yɛɛ ɔnnea yɛ ninyɛndane nwo ɔndua yɛ kakɛ.

¹¹Ɔluakɛ kɛ anwuma nee azɛlɛ avinli si de tendenle nee kpole la, zɔhane ala yɛɛ ye ɛhulolɛ kpundii ne de maa menli mɔɔ sulo ye la a.

¹²Kɛ aduduleɛ nee adɔleɛ avinli si twe la, zɔhane ala yɛɛ ɔye yɛ ɛtane ne mɔ ɔmaa yɛ nee bɛ avinli twe a.

¹³Kɛ selɛ si nwu ɔ mra anwunvɔne la, zɔhane ala yɛɛ Ɛdɛnkɛma nwu bɛdabɛ mɔɔ bɛsulo ye la anwunvɔne a.

¹⁴Ɔluakɛ ɔze kɛ yɛsi yɛde la; ɔkakye kɛ yɛle ndɛtɛlɛ ala.

¹⁵Sonla ɛdeɛ, ye mekɛ le kɛ ndile; ye ɛkpazilɛ le kɛ ɛbɔ nu ndotolo;

¹⁶kɛ anwoma bɔ ye la ɛnee yekpolo, ɔ bo zo ne ɛnze ye bieko.

¹⁷Ɛdɛnkɛma ɛhulolɛ kpundii ne wɔ ɛkɛ dahuu maa bɛdabɛ mɔɔ bɛsulo ye la, ye tenleneyɛlɛ ne wɔ ɛkɛ maa awolɛndoazo kɔsɔɔti.

¹⁸Ɔwɔ ɛkɛ ɔmaa bɛdabɛ mɔɔ bɛdi ye ngyekyeleɛ ne azo la, na bɛkakye bɛyɛ mɔɔ ye mɛla ne mɔ se la.

¹⁹Ɛdɛnkɛma belemgbunli ebia ne wɔ anwuma, Ɛdɛnkɛma di debie biala anwo zo belemgbunli.

²⁰Bɛye Ɛdɛnkɛma ayɛlɛ, bɛmɛ Nyamenle soanvolɛma, bɛmɛ katakyiema mɔɔ yɛ mɔɔ ɔka, na bɛtie ɔ nloa edwɛkɛ la.

²¹Bɛye Ɛdɛnkɛma ayɛlɛ, bɛmɛ anwuma ɛlɔnema, ye sonvolɛma mɔɔ yɛ mɔɔ ɔkpondɛ la.

²²Abɔdeɛ biala ɛye Ɛdɛnkɛma ayɛlɛ, wɔ ɛleka biala mɔɔ ɔdi belemgbunli la. O me ɛkɛla, ye Ɛdɛnkɛma ayɛlɛ.