Read Nzema Edw 104 Bible Online

Edw 104 - Nzema bible

Edw 104

¹O me ɛkɛla, ye Ɛdɛnkɛma ayɛlɛ! O Ɛdɛnkɛma me Nyamenle, ɛle bedevinli! Anyunlunyia nee enililɛ ɛyi wɔ tɛkɛɛ;

²ɛfa wienyi ɛkeda kɛ ɛdanlɛ, wɔdɛlɛ anwomanyunlu nu kɛ ndanlɛ sua,

³wɔzi wɔ sua wɔ anwuma nzule ne mɔ azo. Wɔva amungu ne mɔ wɔyɛ wɔ ɛkpɔnwɔ ehwili, na ɛtɛnla anwoma zo ɛkpɔsa.

⁴ Ɛfa anwoma ne mɔ ɛyɛ wɔ soanvolɛma, ɛfa senle nee ɛsɛnlɛmanye ɛyɛ wɔ sonvolɛma.

⁵Ɛdawɔ yɛɛ ɛwulale azɛlɛ ye adiabo ne mɔ a, amaa bɛangola ye kpusu.

⁶Ɛvale nzule ɛhedale ye kɛ ɛdanlɛ; nzule ne mɔ monlanle awoka ne mɔ.

⁷Ɛdeanle nzule ne mɔ, na bɛnriandile; bɛdele kɛ ɛ ne ɛlɛkulu, na bɛguale ndwɛlɛ aze.

⁸Awoka ne mɔ ati vindele, mbɔnza ne mɔ yele bɛ nwo, na nzule ne mɔ hɔdedale ɛleka mɔɔ ɛhyehyɛle ɛmanle bɛ la.

⁹Ɛhilele nzule ne mɔ ɛweɛne mɔɔ ɔnle kɛ bɛbɔ bɛtɛla, amaa bɛangeda azɛlɛ ye azo bieko.

¹⁰Ɛmaa nzubula finde mbɔnza ne mɔ anu; bɛsenze bɛdua awoka ne mɔ avinli,

¹¹bɛmaa ɛbɔ nu nane nyia bie no; ɛbɔ nu asoaso nyia bie nua bɛ ahonle.

¹²Nloma yɛ bɛ sane wɔ ɔ nloa mbaka ne mɔ azo; bɛtɛnla mbaka ngane ne mɔ anu bɛto edwɛne.

¹³Ɛtɔ ezule ɛfi ɛleka mɔɔ ɛde la ɛdoɔloa awoka ne mɔ; wɔ nyilalɛ ɛyi azɛlɛ ye tɛkɛɛ.

¹⁴Ɛmaa ndile fifi maa nlankɛ, yɛɛ mbaka fifi maa sonla nyia bie so, amaa yeanyia aleɛ wɔ azɛlɛ ne azo;

¹⁵yeanyia nwanye yeamaa sonla nye alie, yeanyia nwole yeamaa ɔ nyunlu ada, na yeanyia aleɛ yeamaa sonla nwo ayɛ se.

¹⁶Bɛgugua Ɛdɛnkɛma mbaka ne mɔ azo nzule dɔɔnwo, Lɛbanɔn sida mbaka mɔɔ ɔdaye ɔluale la.

¹⁷Nloma yɛ bɛ sane wɔ zolɛ; bɔngɔ yɛ ye sua wɔ bolonyia mbaka ne mɔ anu.

¹⁸Awoka ndendenle ne mɔ le ɛbɔ nu mbɔnkye ɛdeɛ; bodane ne mɔ le abotokila ne mɔ ɛvealeka.

¹⁹Wɔbɔ siane mɔɔ kile ɛlobɔ ne mɔ; sɛnzɛne ze mekɛ mɔɔ ɔfa ɔtɔ a.

²⁰Wɔbɔ awozinli, na ɔle aledwolɛ mɔɔ maa ɛbɔ nu nanemgbole finde a.

²¹Awenade mralɛ kpo kpondɛ aleɛ, bɛkpondɛ aleɛ bɛfi Nyamenle ɛkɛ.

²²Sɛnzɛne ne tudu a, bɛwolowolo na bɛkɔdeda bɛ mbɔne nu.

²³Sonla kɔ kɔyɛ ye gyima, ɔyɛ gyima toonwo aledwolɛ.

²⁴O Ɛdɛnkɛma, wɔ gyima ne mɔ zonle! Ɛvale nrɛlɛbɛ yɛɛ ɛbɔle bɛ muala a; wɔ abɔdeɛ ɛyi azɛlɛ ye tɛkɛɛ.

²⁵Nyevile ne a la lɔ la, ɔle kpole, ɔle faanwo, nuhua ninyɛne bo anda, anyewɔzo ninyɛne ngyikyi nee mgbole.

²⁶ Meli dua nyevile zo. yɛɛ Lɛveatan,[60] nane anwo ɛzulolɛ ne mɔɔ wɔbɔ la ɔdaye ɔdi ye nwɔhoa wɔ nuhua.

²⁷Ɛhye mɔ amuala anye la ɛ nwo zo, kɛ mekɛ dwu a ɛkɛmaa bɛ aleɛ.

²⁸Saa ɛfa ɛmaa bɛ a, bɛboɔboa ɔ nloa; saa ɛbuke ɛ sa nu a, bɛnyia ninyɛne kpalɛ.

²⁹Saa ɛye ɛ nye ɛfea a, ɛnee bɛ rɛle ɛbɔ, ɛdie bɛ ɛnwomenle ne a, bɛwu na bɛsia bɛkɔ ndɛtɛlɛ nu.

³⁰Saa ɛmaa bɛ ɛnwomenle[61] a, bɛlɛ ngoane; na ɛkakyi azɛlɛ ne anye fofolɛ.

³¹Ɛdɛnkɛma anyunlunyia ne ɛdɛnla ɛkɛ ne dahuu, Ɛdɛnkɛma anye ɛlie ye gyima nwo.

³²Ɔto ɔ nye azɛlɛ ye azo a azɛlɛ ne kpusu, ɔfa ɔ sa ɔka awoka a bɛkpu esike.

³³Mekɛ tendenle mɔɔ mede aze la, mebado edwɛne meamaa Ɛdɛnkɛma; mede ngoane nu la, mebado ayɛlɛyelɛ edwɛne meamaa me Nyamenle.

³⁴Mesɛlɛ kɛ me nzɛlɛlɛ kɛzɔ ɔ nye, ɔluakɛ Ɛdɛnkɛma ati me nye die.

³⁵Bɛmaa ɛtanema abo ɛdu azɛlɛ ye azo, na amumuyɛma abo ɛdu bɔkɔɔ! O me ɛkɛla, ye Ɛdɛnkɛma ayɛlɛ! Bɛye Ɛdɛnkɛma ayɛlɛ!