Read Nzema Edw 105 Bible Online

Edw 105 - Nzema bible

Edw 105

¹O bɛyɛ Ɛdɛnkɛma mo, bɛbɔ ye duma ne nolo; bɛmaa ye nyɛleɛ ɛla ali wɔ maanle maanle avinli.

²Bɛdo edwɛne bɛmaa ye, bɛdo ayɛlɛyelɛ edwɛne bɛmaa ye, bɛbɔ ye nwanwane gyima ne mɔ amuala nolo.

³Bɛli fɛlɛko wɔ ye duma nwuanzanwuanza ne ati; bɛmaa bɛdabɛ mɔɔ bɛsonle Ɛdɛnkɛma la anye ɛlie.

⁴Bɛkpondɛ Ɛdɛnkɛma nee ye anwosesebɛ ne, bɛkpondɛ ɔ nyunlu dahuu.

⁵O bɛmɛ ye sonvolɛ Ebileham abo zo amra, Gyekɔbo abo zo amra, mɔɔ yekpa nu yeye bɛ a, bɛhakye nwanwane gyima mɔɔ yeli la; ye nwanwane sɛkɛlɛneɛ nee ye ndɛnebualɛ ne mɔ.

⁷Yemɔ a ɔle Ɛdɛnkɛma yɛ Nyamenle a; ye ndɛnebualɛ wɔ ɛkɛ maa ewiade amuala.

⁸Ɔ rɛle ɛnvi ye ngyekyeleɛ ne ɛlɛ, awolɛndoazo apenle, ɔ rɛle ɛnvi mɔɔ ɔhanle la.

⁹ Ye ngyekyeleɛ ne mɔɔ ɔ nee Ebileham kyekyele, ye ɛwɔkɛ ne mɔɔ ɔhanle ndane ɔbɔle Ayezeke,

¹⁰ na ɔmoanle zolɛ kɛ ɔle mɛla ɔmaa Gyekɔbo nee Yizilayɛma, kɛ ɔle ngyekyeleɛ mɔɔ bɛntulu ye ɛlɛ

¹¹na ɔzele kɛ, “Mebava Keena azɛlɛ ne meamaa bɛ kɛ ɔle bɛ ɛdeɛ bɔkɔɔ” la, ɔ rɛle ɛnrɛvi.

¹²Mekɛ mɔɔ ɛnee bɛ nwo anzo, na awie ɛmbu bɛ, bɛle adendulɛma wɔ Keena azɛlɛ zo,

¹³bɛlɛkpɔsa, bɛvi maanle ko anu bɛkɔ ko anu, bɛvi belemgbunli ko abo bɛkɔ menli gyɛne nu la,

¹⁴yeammaa awie adenle yeammaa yeansisi bɛ; bɛ ti, ɔdeanle arelemgbunli,

¹⁵ɔhanle kɛ, “Awie biala mmafa ɔ sa ka me menli ne mɔɔ mekpa nu meye bɛ la; awie biala mmagyegye me kpɔmanvolɛma ne.”

¹⁶ Ɔmanle ɛhɔne zile azɛlɛ ne azo, ɔmanle bɛ aleɛ kɔsɔɔti wiele.

¹⁷ Ɔzoanle sonla ɔmanle ɔlumuale bɛ nyunlu, Dwosefi, mɔɔ bɛdɔnenle ye kɛ kanranli la.

¹⁸ Bɛguale ɔ gyakɛ anga, bɛvale bulalɛ kɛba bɛdole ɔ kɔme,

¹⁹hɔdwule kɛ mɔɔ ɔhanle la yɛle zɔhane, Ɛdɛnkɛma edwɛkɛ ne buale ye benle.

²⁰ Belemgbunli ne manle bɛyele ye efiade ne, sonla ne mɔɔ sie menli ne la gyakyile ye.

²¹ Ɔyɛle ye kpanyinli mɔɔ nea ye sua nu ɛkɛ a, na ɔyɛle ye ninyɛne kɔsɔɔti azo neavolɛ,

²²kɛ ɔnlea belemgbunli mbɔlɔba ne mɔ anwo zo, na ɔdu mgbanyima mɔɔ zua belemgbunli la folɛ.

²³ Akee Yizilayɛ rale Yigyibiti, Gyekɔbo hɔdɛnlanle Yigyibiti azɛlɛ zo.

²⁴ Ɛdɛnkɛma manle ye menli ne wole mralɛ dɔɔnwo, na bɛ nwo yɛle se dɛlale bɛ kpɔvolɛma ne.

²⁵Ɔmanle kpɔvolɛma ne hyile ye menli ne, na bɛyɛle Ɛdɛnkɛma sonvolɛma ne asa.

²⁶ Ɛdɛnkɛma zoanle ye sonvolɛ Mosisi, yɛɛ Aalɔn mɔɔ yekpa nu yeye bɛ la.

²⁷Bɛyɛle nwanwane sɛkɛlɛneɛ wɔ bɛ avinli, bɛyɛle nwanwane ninyɛne wɔ Yigyibiti azɛlɛ zo.

²⁸ Ɔmanle awozinli rale, na maanle ne anu yɛle kabii, noko Yigyibitima ne dele ye edwɛkɛ ne anwo atua.

²⁹ Ɔmanle Yigyibitima ne nzule hakyile mogya, ɔmanle nuhua fɛlɛ muala wule.

³⁰ Bɛ azɛlɛ ne azo yɛle ahɛlɛne ngome, ahɛlɛne yile bɛ arelemgbunli suakunlu.

³¹ Ɛdɛnkɛma dendɛle, na nrɛzenra adɔka rale, na ngokowule vale maanle ne.

³² Ɔmanle ezuawolɛ dɔle, na ɛsɛnlɛmanye kpakyele maanle ne anu amuala.

³³Ɔhunle bɛ vanye nee feege mbaka kɔsɔɔti, na ɔbubule maanle ne anu mbaka kɔsɔɔti.

³⁴ Ɔdendɛle, na abɛbɛ rale, abɛbɛ mralɛ mɔɔ awie ɛnze bɛ nloa la

³⁵ralile azɛlɛ ne azo ninyɛne kɔsɔɔti, na bɛlile bɛ ɛya nu nzoleɛ kɔsɔɔti.

³⁶ Ɔhunle maanle ne anu belamunli mralɛ kɔsɔɔti, bɛ anwosesebɛ mekɛ nu awolɛ mɔɔ lumua.

³⁷ Akee ɔlile Yizilayɛma ati ɔyele bɛ ɔvile Yigyibiti, ɔmanle bɛnyianle dwɛtɛ fufule nee ezukoa nvutuke, ye mbusua ekpunli ekpunli ne mɔ anu ko bɔbɔ andu koti.

³⁸Ɔyɛle Yigyibitima fɛ kɛ Nyamenle menli ne ɛlɛkɔ a, ɔluakɛ ɛnee bɛ nwo ɛzulolɛ ɛdɔ bɛ nwo zo.

³⁹ Ɛdɛnkɛma manle amungu hedale bɛ nwo zo, nɔɔzo ɔzɔle senle ɔmanle bɛ wienyi.

⁴⁰ Bɛbizale, na Ɛdɛnkɛma rɛlɛle bɛ kyelɛwele, na ɔmanle bɛ anwuma kpanwo molozo.

⁴¹ Ɔkpukele bolɛ, na nzule vi nu vindele; ɔzenle ɛsɛlɛ ne azo kɛ azule.

⁴²Ɔluakɛ ɔhakyele ye ɛwɔkɛ nwuanzanwuanza ne, yɛɛ ye sonvolɛ Ebileham.

⁴³Yemɔti ɔlile ye menli ne anyunlu anyelielɛ nu, ɔvale edwɛndolɛ ɔlile ye menli ne mɔɔ yekpa nu yeye bɛ la ati.

⁴⁴ Na ɔvale maanle maanle ne mɔ azɛlɛ ne ɔmanle bɛ; na bɛvale menli ne ɛya avule kɔsɔɔti,

⁴⁵amaa ye menli ne azie ye ngyehyɛlɛ ne mɔ, na bɛali ye mɛla ne mɔ azo. Bɛye Ɛdɛnkɛma ayɛlɛ!