Read Nzema Edw 106 Bible Online

Edw 106 - Nzema bible

Edw 106

¹ Bɛye Ɛdɛnkɛma ayɛlɛ! O bɛyɛ Ɛdɛnkɛma mo, ɔluakɛ ɔle kpalɛ; ye ɛhulolɛ kpundii ne wɔ ɛkɛ ne dahuu. Gyɛ 33.11

²Nwane a kɛhola kɛha ninyɛne mgbole mɔɔ Ɛdɛnkɛma ɛyɛ la, anzɛɛ kɛhola kɛhile ye ayɛlɛyelɛ muala a?

³Nyilalɛ ɛha bɛdabɛ mɔɔ bɛdi pɛlepɛle, na bɛbɔ tenlene ɛbɛla mekɛ biala la.

⁴O Ɛdɛnkɛma, saa ɛyila wɔ menli ne a, kakye me; saa ɛdie bɛ ngoane a, boa me,

⁵amaa meanwu wɔ menli ne mɔɔ wɔkpa nu wɔye bɛ la ɛkpazilɛ; amaa me nye alie wɔ maanle ne fɛlɛkolilɛ nu, na me nee wɔ menli ne ali fɛlɛko.

⁶Yɛ nee yɛ nlenya mɔ yɛyɛ ɛtane; yɛyɛ ninyɛndane, yɛyɛ amumuyɛ.

⁷ Yɛ nlenya mɔ wɔ Yigyibiti la, bɛandwenle wɔ nwanwane gyima ne mɔ anwo; bɛangakye wɔ ɛhulolɛ kpundii kpole ne mɔɔ wɔ bɛ nwo zo la, na bɛdele Anwuma Anwumanli ne anwo atua wɔ Nyevile Kɔkɔlɛ ne anloa.

⁸Noko ye duma ne ati, ɔliele bɛ ngoane, amaa yeamaa ye tumi kpole ne ala ali wienyi.

⁹ Ɔdeanle Nyevile Kɔkɔlɛ ne, na ɔwele resee; na ɔvale bɛ ɔpɛle buma ne kɛ bɛlua azɛlɛ resee zo.

¹⁰Yemɔti ɔliele bɛ ɔvile kpɔvolɛ ne asa anu, na ɔliele bɛ ɔvile kpɔvolɛ ne tumi bo.

¹¹Nzule ne vale kpɔvolɛma ne; ko bɔbɔ anga.

¹² Akee bɛliele ye edwɛkɛ ne bɛlile; bɛdole ye ayɛlɛyelɛ edwɛne.

¹³Noko yeangyɛ biala yɛɛ bɛ rɛle vile ye gyima ne mɔ a; bɛangendɛ bɛandie ye folɛdulɛ.

¹⁴ Bɛnyianle atiakunluwɔzo ɛtane wɔ fienemgbole ne anu, na bɛzɔle Nyamenle bɛnleanle wɔ ɛsɛlɛ ne azo;

¹⁵ɔvale mɔɔ bɛbizale la ɔmanle bɛ, na ɔyele ewule ɛzulolɛ bie ɔdole bɛ nwo.

¹⁶ Mɔɔ menli mɔɔ wɔ azokoɛleɛ ne la anye bolole Mosisi nee Aalɔn, nwuanzanwuanza ko ne mɔɔ Ɛdɛnkɛma ɛye ye la,

¹⁷azɛlɛ ne kpukele menle Deetan, na ɔhedale Abaelam nee ɔ nwo amra anwo zo.

¹⁸Eza senle dɔle bɛ avinli; senle ne yelale amumuyɛma ne hunle bɛ.

¹⁹ Bɛyɛle ɛnlankɛ nyinli ananze wɔ Saenae, na bɛzonlenle ananze ne mɔɔ bɛguale la.

²⁰Bɛvale Nyamenle anyunlunyia ne bɛmanle ɛnlankɛ mɔɔ di ndile la ananze ne.

²¹Bɛ rɛle vile Nyamenle bɛ Dievolɛ ne, mɔɔ ɛyɛ ninyɛne mgbole wɔ Yigyibiti,

²²ye nwanwane gyima ne mɔɔ ɔyɛle wɔ Yigyibiti nee ninyɛne ɛzulolɛ ɛzulolɛ ne mɔ mɔɔ ɔyɛle bɛ Nyevile Kɔkɔlɛ ne anloa la.

²³Yemɔti ɔhanle kɛ ɔbɔ bɛ bo zo, na Mosisi mɔɔ yekpa nu yeye ye la, gyinlanle kpundii wɔ ɔ nyunlu, ɔmanle ɔgyakyile ye ɛya ne, yeanzɛkye bɛ.

²⁴ Akee bɛkpole azɛlɛ kɛnlɛma ne, bɛanlie ye ɛwɔkɛ ne bɛanli.

²⁵Bɛdendɛle bɛ nzo abo wɔ bɛ ndanlɛ azua ne mɔ anu, bɛanyɛ tieyɛ bɛammaa Ɛdɛnkɛma.

²⁶Yemɔti ɔmanle ɔ sa zo ɔhanle ndane kɛ ɔmaa bɛ kɔsɔɔti bɛadɔ fienemgbole ne anu

²⁷ na yeamaa bɛ bo zo amra akponde, azande ahɔ maanle maanle ne mɔ anu.

²⁸ Akee Nyamenle menli ne zonlenle bozonle Beeyale wɔ Piyɔ, na bɛlile aleɛ mɔɔ bɛdo bɛmaa mɔwuamra la.

²⁹Bɛvale bɛ nyɛleɛ bɛhanle Ɛdɛnkɛma ɛya, na ewule nzane dɔle bɛ avinli.

³⁰Na Fenɛhase ragyinlanle kpɔdale bɛ ti, na ewule nzane ne gyakyile.

³¹Bɛkakye ye wɔ ɛhye anwo kɛ ɔle tenlenenli, wɔ awolɛndoazo muala anu.

³² Bɛhanle Ɛdɛnkɛma ɛya wɔ Mɛleba nzubula ne mɔ azo, bɛmanle bɛ ɛtane ne bule ziale Mosisi;

³³ɔluakɛ bɛyɛle bɛmanle ɔdaye ɔvale ɛya, na ɔdendɛle ɛdendɛlɛ ɛtane.

³⁴ Bɛanzɛkye maanle maanle ne mɔ, kɛmɔ Ɛdɛnkɛma zele bɛ la,

³⁵na bɛ nee bɛ bɔle nu dɛnlanle, na bɛzukoale bɛyɛle mɔɔ maanle ne anu amra yɛ la.

³⁶Bɛzonlenle bɛ awozonle ne mɔ, na ɔyɛle ɛhane ɔmanle bɛ.

³⁷ Bɛvale bɛ mra mrenya nee bɛ mra mraalɛ bɛbɔle azu bɛmanle awozonle.

³⁸ Bɛhanle mogya mɔɔ ɛnze nwolɛ bie la bɛguale, bɛ mra mrenya nee mraalɛ mogya, bɛvale bɛbɔle azu bɛmanle Keena awozonle, na bɛvale mogya bɛzɛkyele azɛlɛ ne.

³⁹Ɛhye ati bɛ nyɛleɛ manle evinli hanle bɛ, na bɛluale bɛ nyɛleɛ zo bɛbɔle nyamenlezonlenlɛ nu tuutuu ɛbɛla.

⁴⁰ Akee Ɛdɛnkɛma vale ye menli ne anwo ɛya, na ɔkpole ye agyadeɛ.

⁴¹Ɔyele bɛ ɔmanle maanle maanle ne mɔ, yemɔti menli ne mɔɔ kpɔ bɛ la ziele bɛ.

⁴²Bɛ kpɔvolɛma ne sisile bɛ, na bɛbɛlɛle bɛ aze wɔ bɛ tumi bo.

⁴³Ɔliele bɛ fane dɔɔnwo, noko bɛbɔle kpɔkɛ bɛdele ɔ nwo atua, na bɛ ɛtane ti bɛ kpɔvolɛma lile bɛ nwo zo konim.

⁴⁴Noko akee ɔdele bɛ ɛzunlɛ ne la, ɔ kunlu yelɛyelale ye wɔ bɛ amaneɛnwunlɛ nwo.

⁴⁵Bɛ ti, ɔhakyele ye ngyekyeleɛ ne, na ye ɛhulolɛ kpundii ne ati ɔhakyile ye adwenle.

⁴⁶Ɔmanle menli mɔɔ hyele bɛ nuokɛ la zele menli mɔɔ bɛhye bɛ nuokɛ la anwunvɔne.

⁴⁷ O Ɛdɛnkɛma yɛ Nyamenle, die yɛ, na boɔboa yɛ nloa fi maanle maanle ne mɔ anu, amaa yeayɛ wɔ mo, na yɛali fɛlɛko yeaye wɔ duma nwuanzanwuanza ne ayɛlɛ.

⁴⁸Ayɛlɛyelɛ ɛha Ɛdɛnkɛma, Yizilayɛ Nyamenle ne, ɔvi tete kɔdwu mekɛ mɔɔ ɛnlɛ awieleɛ. Na menli ne amuala ɛha kɛ “Amen!” Bɛye Ɛdɛnkɛma ayɛlɛ!