Read Nzema Edw 108 Bible Online

Edw 108 - Nzema bible

Edw 108

¹[62] O Nyamenle, me ahonle gyi kpundii, me ahonle gyi kpundii! Mebado edwɛne meaye wɔ ayɛlɛ! Me ɛkɛla, dwazo!

²Bɛdwazo, getaa mgbole nee ngyikyi! Mebamaa mangyee ye anu akpudwu!

³O Ɛdɛnkɛma, mebayɛ wɔ mo, wɔ menli ngakyile kɔsɔɔti avinli, mebaye wɔ ayɛlɛ wɔ maanle maanle kɔsɔɔti avinli.

⁴Ɔluakɛ wɔ ɛhulolɛ kpundii ne le kpole tɛla anwuma, wɔ nɔhalɛlilɛ ne dwu amungu ne mɔ anu lɔ.

⁵O Nyamenle, maa wɔ kpoleyɛlɛ ne zo anwuma lɔ! Maa wɔ anyunlunyia ɛda ewiade amuala!

⁶Amaa wɔalie menli mɔɔ ɛkulo bɛ la ngoane; bua me, na dua wɔ tumi ne azo boa yɛ.

⁷Nyamenle ɛbɔ ɛwɔkɛ wɔ ye ɛleka nwuanzanwuanza ne, ɔse, “Mebahyɛ Hyikɛm anu konimlilɛ nu, na meahyɛ Sɛko Bɔnza meamaa me menli ne.

⁸Geleade le me ɛdeɛ; Manasɛ le me ɛdeɛ; Yifelaem le me bulalɛ kyɛlɛ; Dwuda le me tumi kpɔma;

⁹Mowabe le me kyɛnze bonkuma; mefuandi me mgbɔlaboa megua Yidɔm anwo zo; metea nu konimlilɛ nu wɔ Filisitiama anwo zo.”

¹⁰Nwane a kɛva me kɛhɔ suakpole ne mɔɔ bɛhye nwo la azo a? Nwane a kɛva me kɛhɔ Yidɔm a?

¹¹O Nyamenle, asoo ɛtɛkpole yɛ ɛ? O Nyamenle, ɛ nee yɛ ɛlɔnema ne ɛngɔ.

¹²O boa yɛ maa yɛho yɛtia kpɔvolɛ ne, ɔluakɛ sonla moalɛ le mgbane.

¹³Nyamenle wɔ yɛ afoa a yɛbaho yɛadɔ zo; yemɔ yɛɛ ɔbaha kpɔvolɛma ne yeagua a.