Read Nzema Edw 115 Bible Online

Edw 115 - Nzema bible

Edw 115

¹Tɛ yɛmɛ, O Ɛdɛnkɛma, tɛ yɛmɛ, na wɔmɔ yɛɛ ɔwɔ kɛ anyunlunyia ka wɔ, wɔ wɔ ɛhulolɛ kpundii ne nee wɔ nɔhalɛlilɛ ne ati a.

²Duzu ati a maanle maanle ne mɔ kɛbiza kɛ, “Bɛ Nyamenle ne wɔ nienwu” a?

³Yɛ Nyamenle ne wɔ anwuma; ɔyɛ debie biala mɔɔ ɔdaye ɔkulo la.

⁴ Bɛ mmonle ne mɔ le dwɛtɛ fufule nee ezukoa nvutuke, bɛle menli asa anloa gyima.

⁵Bɛlɛ ɛnloanlɛ, noko bɛndendɛ; bɛlɛ ɛnyelɛ, noko bɛnnwu debie.

⁶Bɛlɛ ɛnzonlɛ, noko bɛnde edwɛkɛ; bɛlɛ ɛbonyilɛ, noko bɛnde nvoanle.

⁷Bɛlɛ ɛsalɛ, noko bɛnva bɛnvua debie; bɛlɛ egyakɛ, noko bɛndia; yɛɛ bɛnlɛ ɛnelɛ bɛnva bɛnyɛ alɛra.

⁸Bɛdabɛ mɔɔ bɛyɛ mmonle la le kɛ mmonle ne mɔ ala la, zɔhane ala yɛɛ bɛdabɛ mɔɔ bɛ rɛle wɔ bɛ nu la de a.

⁹O Yizilayɛma, bɛva bɛ rɛle bɛwula Ɛdɛnkɛma anu! Ɔle bɛ boavolɛ nee bɛ enyinlike.

¹⁰O Aalɔn sua nu amra, bɛva bɛ rɛle bɛwula Ɛdɛnkɛma anu! Ɔle bɛ boavolɛ nee bɛ enyinlike.

¹¹Bɛmɛ mɔɔ bɛsulo Ɛdɛnkɛma, bɛva bɛ rɛle bɛwula ye nu! Ɔle bɛ boavolɛ nee bɛ enyinlike.

¹²Ɛdɛnkɛma dwenle yɛ nwo, ɔbayila yɛ; ɔbayila Yizilayɛma amuala; ɔbayila Aalɔn sua nu amra;

¹³ ɔbayila bɛdabɛ mɔɔ bɛsulo Ɛdɛnkɛma la, mgbolema nee koahweabanema amuala.

¹⁴Ɛdɛnkɛma ɛmaa bɛwo dɔɔnwo, bɛdabɛ nee bɛ bo zo amra amuala.

¹⁵Ɛdɛnkɛma ɛyila bɛ, yemɔ mɔɔ ɔbɔle anwuma nee aze.

¹⁶Anwuma lɔ le Ɛdɛnkɛma ɛdeɛ, yɛɛ yeva azɛlɛ ye yemaa menli.

¹⁷Mɔwuamra ɛnye Ɛdɛnkɛma ayɛlɛ, zɔhane ala yɛɛ mɔɔ kɛhɔ monvonle la de a.

¹⁸Na yɛmɛ, yɛbaye Ɛdɛnkɛma ayɛlɛ, ɛnɛ nee dahuu. Bɛye Ɛdɛnkɛma ayɛlɛ!