Read Nzema Edw 116 Bible Online

Edw 116 - Nzema bible

Edw 116

¹Mekulo Ɛdɛnkɛma, ɔboalekɛ yede me ne nee me modolɛ nzɛlɛlɛ.

²Kɛmɔ ɔyɛle ɛnzonlɛ ɔdiele me la ati, mebavɛlɛ ye wɔ mekɛ tendenle mɔɔ mede ngoane nu la.

³Ewule ngane lile me bɔyia; Ɛbolɔ mbowule sosɔle me; menwunle nyane nee abodelɛ.

⁴Na menvɛlɛle Ɛdɛnkɛma kɛ, “O Ɛdɛnkɛma, mebodo wɔ, die me!”

⁵Ɛdɛnkɛma le dovolɛ, ɔle pɛlepɛlenli; yɛ Nyamenle ne se anwunvɔne.

⁶Ɛdɛnkɛma bɔ mɔɔ ɛnze nwolɛ bie la anwo bane, bɛholole me nwo zo la, ɔliele me.

⁷O me ɛkɛla, sia balie wɔ ɛnwomenle, ɔluakɛ Ɛdɛnkɛma ɛyɛ wɔ boɛ.

⁸Kɛmɔ wɔlie me ɛkɛla wɔvi ewule nu, wɔkyikyi me nye anwo monle, na meandu koti la ati,

⁹medua Ɛdɛnkɛma anyunlu, wɔ teasema azɛlɛ zo.

¹⁰ Menzɔle me diedi nu boɛ, bɔbɔ mɔɔ menganle kɛ, “Menwu amaneɛ kpole” la;

¹¹menvale ewugyemu menganle kɛ, “Anyelazo wɔ menli kɔsɔɔti anu le mgbane”

¹²Duzu yɛɛ menva memaa Ɛdɛnkɛma, wɔ ye ahyɛlɛdeɛ ɛwolaa ye anwo a?

¹³Mebamaa ngoanelielɛ kɔpo ne zo, na meabɔ Ɛdɛnkɛma duma meazonle ye.

¹⁴Mebaye me ɛwɔkɛ biala mɔɔ mebɔ Ɛdɛnkɛma la, wɔ ye menli ne kɔsɔɔti anyunlu.

¹⁵Nyamenle menli ne ewule le debie kɛnlɛma wɔ Ɛdɛnkɛma anye zo.

¹⁶O Ɛdɛnkɛma, mele wɔ sonvolɛ; mele wɔ sonvolɛ, wɔ sonvolɛ raalɛ ara nrenya. Wɔzianyi me nwɔnzɔnwɔnzɔ ne.

¹⁷Mebabɔ moyɛlɛ azu meamaa wɔ, na meabɔ Ɛdɛnkɛma duma meazonle ye.

¹⁸Mebaye me ɛwɔkɛ biala mɔɔ mebɔ Ɛdɛnkɛma la, wɔ ye menli ne kɔsɔɔti anyunlu.

¹⁹Mebaye ɛwɔkɛ ne wɔ Ɛdɛnkɛma Ɛzonlenlɛ Sua ne mɔɔ wɔ Gyɛlusalɛm la anu. Bɛye Ɛdɛnkɛma ayɛlɛ!