Read Nzema Edw 118 Bible Online

Edw 118 - Nzema bible

Edw 118

¹ O bɛyɛ Ɛdɛnkɛma mo, ɔluakɛ ɔle kpalɛ; ye ɛhulolɛ kpundii ne wɔ ɛkɛ dahuu. 136.1; Gyɛ 33.11

²Bɛmaa Yizilayɛma ɛha kɛ, “Ye ɛhulolɛ kpundii ne wɔ ɛkɛ dahuu.”

³Bɛmaa Aalɔn abo zo amra ɛha kɛ, “Ye ɛhulolɛ kpundii ne wɔ ɛkɛ dahuu.”

⁴Bɛmaa bɛdabɛ mɔɔ bɛsulo Ɛdɛnkɛma la ɛha kɛ, “Ye ɛhulolɛ kpundii ne wɔ ɛkɛ dahuu.”

⁵Menvɛlɛle Ɛdɛnkɛma wɔ me nyanenwunlɛ nu; Ɛdɛnkɛma buale me na ɔyele me kɔme kpomgbolo.

⁶ Ɛdɛnkɛma wɔ me afoa, menzulo. Duzu a sonla kɛhola kɛyɛ me a?

⁷Ɛdɛnkɛma gyi me nzi kɛ ɔboa me, mebali bɛdabɛ mɔɔ bɛkpɔ me la anwo zo konim.

⁸Ɔle kpalɛ kɛ sonla kɛvea Ɛdɛnkɛma akɛnra anu, tɛla kɛ ɔkɛva ɔ rɛle ɔkɛwula dasanli nu.

⁹Ɔle kpalɛ kɛ sonla kɛvea Ɛdɛnkɛma akɛnra anu, tɛla kɛ ɔkɛva ɔ rɛle ɔkɛwula arelemgbunli nu.

¹⁰Maanle maanle kɔsɔɔti bɔle yiale me; Ɛdɛnkɛma duma nu, menganle bɛ menguale.

¹¹Bɛbɔle bɛyiale me, bɛbɔle bɛyiale me wɔ adenle biala anu; Ɛdɛnkɛma duma nu, menganle bɛ menguale.

¹²Bɛvɔle me kɛ wolɛ, na bɛyelale kɛ senle yela mbowule la; Ɛdɛnkɛma duma nu, menganle bɛ menguale.

¹³Bɛtiale me kpole kpalɛ, asɛɛ mendɔle aze, noko Ɛdɛnkɛma boale me.

¹⁴ Ɛdɛnkɛma le me anwosesebɛ, me konimlilɛ edwɛne, yelie me ngoane.

¹⁵Bɛdie, bɛlɛto konimlilɛ edwɛne fɛlɛkolilɛ nu wɔ tenlenema ndanlɛ sua ne anu: “Ɛdɛnkɛma tumi kpole ne ɛli gyima ne,

¹⁶Ɛdɛnkɛma tumi kpole ne ɛli konim, Ɛdɛnkɛma tumi kpole ne ɛli gyima ne!”

¹⁷Menrɛwu, mebadɛnla ngoane nu, na meabɔ mɔɔ Ɛdɛnkɛma ɛyɛ la nolo.

¹⁸Ɛdɛnkɛma ɛhwi me nyunlu kpole kpalɛ, noko ɔtɛyele me ɔtɛmanle ewule.

¹⁹Bɛbuke tenleneyɛlɛ nlenkɛ mgbole ne mɔ bɛmaa me, amaa mealua nuhua meawolo, na meayɛ Ɛdɛnkɛma mo.

²⁰Ɛdɛnkɛma anlenkɛ kpole ne ɛne; tenlenema balua nu awolo.

²¹Meyɛ wɔ mo kɛ wɔbua me, na wɔlie me ngoane a.

²² Bolɛ ne mɔɔ suasivoma ne kpole la ɛyɛ mgbɛnezo bolɛ mɔɔ anwo hyia a.

²³Ɛdɛnkɛma yɛɛ ɛyɛ ɛhye a; yɛnea a ɔyɛ nwanwane.

²⁴Ɛdɛnkɛma kenle ne mɔɔ ɛhyehyɛ la ɛne; bɛmaa yɛlie yɛ nye na yɛli fɛlɛko.

²⁵ O Ɛdɛnkɛma, yɛbodo wɔ, die yɛ! O Ɛdɛnkɛma, yɛbodo wɔ, maa yɛli konim.

²⁶ Nyilalɛ ɛha sonla ne mɔɔ dua Ɛdɛnkɛma duma nu wolo la! Yɛlɛ Ɛdɛnkɛma Sua nu nyilalɛ yɛyila wɔ.

²⁷Ɛdɛnkɛma le Nyamenle, yɛɛ yemaa yɛ wienyi. Bɛva mbaka ngane bɛdo ɛlɔnwɔne bɛbɔ ɛvoyialilɛ ne abo, na bɛbɔ azukponle ne mgbɔlɔka.

²⁸Ɛle me Nyamenle, mebayɛ wɔ mo; ɛle me Nyamenle, mebayeyɛ wɔ.

²⁹O bɛyɛ Ɛdɛnkɛma mo, ɔluakɛ ɔle kpalɛ; ye ɛhulolɛ kpundii ne wɔ ɛkɛ dahuu.