Read Nzema Edw 119 Bible Online

Edw 119 - Nzema bible

Edw 119

¹Nyilalɛ ɛha bɛdabɛ mɔɔ bɛ ndenle nu ɛnlɛ ngehanleɛ, na bɛbɔ bɛ ɛbɛla kɛmɔ Ɛdɛnkɛma mɛla ne de la.

²Nyilalɛ ɛha bɛdabɛ mɔɔ bɛdi ye ngyehyɛlɛ zo, na bɛfa bɛ ahonle muala bɛkpondɛ ɔ bo zo,

³bɛdabɛ mɔɔ bɛnyɛ ɛtane biala, na bɛdua ye ndenle ne mɔ anu la.

⁴Wɔva wɔ mɛla ne mɔ wɔmaa yɛ kɛ yɛli zolɛ kpalɛ.

⁵O anrɛɛ me ndenle adenrɛ fɔɔnwo wɔ me Nyamenle ne mɛlalilɛ zo.

⁶Akee me nyunlu ɛnrɛgua aze ko, kɛmɔ me nye wɔ wɔ mɛla ne mɔ azo la.

⁷Mebava ahonle mɔɔ nuhua te la meaye wɔ ayɛlɛ, mekɛ mɔɔ menwɔzukoa wɔ tenleneyɛlɛ mɛla ne mɔ la.

⁸Mebali wɔ mɛla ne mɔ azo; O mmakpo me bɔkɔɔ.

⁹Kɛ ɔkɛyɛ na kpavolɛ adenle nu ayɛ bɔkɔbɔkɔ ɛ? Kyesɛ ɔdua wɔ edwɛkɛ zo ɔsinza ɔ nwo.

¹⁰Mebuke me ahonle nu mekpondɛ wɔ; mmamaa metwe me nwo mefi wɔ mɛla ne mɔ anwo.

¹¹Meva wɔ edwɛkɛ ne mezie me ahonle nu, amaa meanyɛ ɛtane meantia wɔ.

¹²O Ɛdɛnkɛma, ayɛlɛyelɛ ɛha wɔ; kilehile me wɔ mɛla ne mɔ.

¹³Mebabɔ wɔ mɛla ne mɔ mɔɔ wɔhyehyɛ la nolo.

¹⁴Me nye die wɔ ngyehyɛlɛ ne mɔ anwo kɛmɔ me nye die anwonyia nwo la.

¹⁵Mebadwenledwenle wɔ mɛla ne mɔ anwo, na meamaa me nye agyinla wɔ ndenle ne mɔ anwo.

¹⁶Me nye balie wɔ mɛla ne mɔ anwo; me rɛle ɛnrɛvi wɔ edwɛkɛ ne.

¹⁷Ɛ nee wɔ sonvolɛ ɛli ye kɛnlɛma, amaa meanyia ngoane, na meali wɔ edwɛkɛ zo.

¹⁸Buke me nye, amaa meanwu nwanwane ninyɛne mɔɔ wɔ wɔ mɛla ne anu la.

¹⁹Mele ɛyɛvolɛ wɔ azɛlɛ ye azo; mmafa wɔ mɛla ne mɔ ɛfea me.

²⁰Me ɛkɛla anwo dɔ wɔ mɛla ne mɔ mekɛ biala.

²¹Ɛtea mgbanyizonlema, munzuvoma ne mɔɔ twe bɛ nwo fi wɔ mɛla ne mɔ anwo la.

²²Ye bɛ ndeanlɛ ne fi me nwo zo, ɔluakɛ meli wɔ ngyehyɛlɛ ne mɔ azo.

²³Arelemgbunli kɔ me nwo akpamo bɔbɔ ɛdeɛ, noko wɔ sonvolɛ badwenledwenle wɔ mɛla ne mɔ anwo.

²⁴Wɔ ngyehyɛlɛ ne mɔ a le me anyelielɛ a, bɛmɛ a bɛtu me folɛ a.

²⁵Medɔ aze; asɛɛ mewu, kɛmɔ wɔ edwɛkɛ ne se la, maa me anwosesebɛ.

²⁶Menganle me edwɛkɛ la, ɛbuale me; kilehile me wɔ mɛla ne mɔ!

²⁷Maa mende wɔ mɛla ne mɔ abo, na mebadwenledwenle wɔ nwanwane gyima ne mɔ anwo.

²⁸Nyane ngome maa me ɛkɛla minli me nwo, wɔ edwɛkɛ ne ati, maa me anwosesebɛ!

²⁹Ye me fi ndenle ɛtane ɛtane nu, na ɛlolɛ nu ala kilehile me wɔ mɛla ne.

³⁰Meva nɔhalɛ adenle ne, meva wɔ mɛla ne mɔ mezie me nyunlu.

³¹O Ɛdɛnkɛma, mehisa wɔ ngyehyɛlɛ ne mɔ kyengye; mmamaa me nyunlu gua aze ɛlɛ.

³²Mebanriandi meava wɔ mɛla ne mɔ adenle zo, saa ɛmaa me ndelebɛbo yɛ kpole a.

³³O Ɛdɛnkɛma, kilehile me wɔ mɛla ne mɔ ndenle, na mebalua nu meahɔ awieleɛ.

³⁴Maa me ndelebɛbo, amaa meava wɔ mɛla ne meazie, na meava me ahonle muala meali zo.

³⁵Fa me dua wɔ mɛla adenle ne anu, ɔluakɛ me nye die nwolɛ.

³⁶Maa me ahonle ɛbikye wɔ ngyehyɛlɛ ne mɔ ɛdɛla kɛ menwɔnyia me nwo.

³⁷Ye me nye fi ninyɛne mgbane mgbane nwo, na maa me ngoane wɔ wɔ ndenle ne mɔ anu.

³⁸Wɔ ɛwɔkɛ ne mɔɔ wɔbɔ bɛdabɛ mɔɔ bɛsulo wɔ la, moa zolɛ maa wɔ sonvolɛ.

³⁹Ye me fi ndeanlɛ ne mɔɔ mesulo ye la anu, ɔluakɛ wɔ mɛla ne mɔ le kpalɛ.

⁴⁰Nea, me nwo ɛlɛdɔ wɔ mɛla ne mɔ; maa me ngoane wɔ wɔ tenleneyɛlɛ ne ati.

⁴¹O Ɛdɛnkɛma, maa wɔ ɛhulolɛ kpundii ne ɛdwu me nwo zo, maa wɔ ngoanelielɛ ne ɛrɛla, kɛmɔ wɔ ɛwɔkɛ ne se la,

⁴²amaa meahola meabua bɛdabɛ mɔɔ bɛtwi me nyunlu la, ɔluakɛ me rɛle wɔ wɔ edwɛkɛ ne anu.

⁴³Mmaye nɔhalɛ edwɛkɛ ɛfi me nloa, ɔluakɛ melɛ anyelazo wɔ wɔ mɛla ne mɔ anu.

⁴⁴Mebali wɔ mɛla ne azo dahuu, wɔ melɛ mɔɔ ɛnlɛ awieleɛ,

⁴⁵na me nwo badɔ me wɔ me ɛlualɛ nu, ɔluakɛ meli wɔ mɛla ne azo.

⁴⁶Mebabɔ wɔ mɛla ne mɔ nolo meahile arelemgbunli, menrɛze nwolɛ nyiane,

⁴⁷ɔluakɛ me nye die wɔ mɛla ne mɔ anwo; mekulo wɔ mɛla ne mɔ.

⁴⁸Medi wɔ mɛla ne mɔ eni, mekulo bɛ; mebadwenledwenle wɔ mɛla ne mɔ anwo.

⁴⁹Kakye wɔ ɛwɔkɛ ne mɔɔ wɔbɔ wɔ sonvolɛ, mɔɔ ɔlua zo wɔmaa menyia anyelazo la.

⁵⁰Ɛhye le me arɛlekyekyelɛ wɔ me amaneɛnwunlɛ nu, ɔluakɛ wɔ ɛwɔkɛ ne maa me ngoane.

⁵¹Menli mɔɔ ɛnze Nyamenle la si me amgbu kpole, noko mendwe me nwo menvi wɔ mɛla ne anwo ɛlɛ.

⁵²Saa medwenle wɔ mɛla ne mɔɔ vi tete la anwo a, O Ɛdɛnkɛma, ɛnee me rɛle ɛkyekye.

⁵³Ɛya ku me kpole kpalɛ, wɔ amumuyɛma mɔɔ kpo wɔ mɛla ne la ati.

⁵⁴Meva wɔ mɛla ne mɔ meyɛ me edwɛne wɔ me ɛbɛlabɔlɛ adendulɛ nu.

⁵⁵O Ɛdɛnkɛma, aledwolɛ nu mekakye wɔ duma, na medi wɔ mɛla ne azo.

⁵⁶Nyilalɛ ɛhye ɛyɛ me ɛdeɛ, ɔluakɛ meli wɔ mɛla ne mɔ azo.

⁵⁷Ɛdɛnkɛma le me kyɛfoa; mebɔ ɛwɔkɛ kɛ mebali wɔ mɛla ne mɔ azo.

⁵⁸Meyeye me ahonle nu mebiza wɔ moalɛ; wɔ ɛwɔkɛ ne ati, nwu me anwunvɔne.

⁵⁹Saa medwenle wɔ ndenle ne mɔ anwo a, mekakyi me nye meba wɔ mɛla ne mɔ anwo.

⁶⁰Meka me nwo, mensisi aze kɛ menwɔli wɔ mɛla ne mɔ azo.

⁶¹Amumuyɛma nyɛma ɛkyekye me bɔbɔ ɛdeɛ, me rɛle ɛnvi wɔ mɛla ne.

⁶²Medwazo alevinli mu nwiɔ avinli meye wɔ ayɛlɛ, wɔ wɔ mɛla tenlene ne mɔ ati.

⁶³Me nee menli mɔɔ sulo wɔ la a tu a; bɛdabɛ mɔɔ bɛdi wɔ mɛla zo la a me nee bɛ tu a.

⁶⁴O Ɛdɛnkɛma, wɔ ɛhulolɛ kpundii ne ɛyi azɛlɛ ye tɛkɛɛ; kilehile me wɔ mɛla ne mɔ.

⁶⁵O Ɛdɛnkɛma, ɛ nee wɔ sonvolɛ ɛli ye boɛ, kɛmɔ wɔ edwɛkɛ ne se la.

⁶⁶Maa me nrɛlɛbɛ nee adwenlenubukelɛ, ɔluakɛ medie wɔ mɛla ne mɔ medi.

⁶⁷Menvonle adenle la yɛɛ menwunle me nyunlu a, na kɛkala medi wɔ edwɛkɛ zo.

⁶⁸Ɛle kpalɛ yɛɛ ɛyɛ kpalɛ; kilehile me wɔ mɛla ne mɔ.

⁶⁹Adubɛnwoma bɔ me nwo nzekue, na mame, mefa me ahonle muala medi wɔ mɛla ne mɔ azo.

⁷⁰Bɛ ahonle ɛlafe tuanwu kɛ nane ɛnlome, na mame, me nye die wɔ mɛla ne mɔ anwo.

⁷¹Ɔle kpalɛ kɛ menwunle me nyunlu a, amaa meazukoa wɔ mɛla ne mɔ.

⁷²Wɔ mɛla ne mɔ le kpalɛ maa me tɛla ezukoa nvutuke nee dwɛtɛ fufule apenle apenle.

⁷³Ɛdawɔ yɛɛ wɔbɔ me na wɔziezie me a; maa me ndelebɛbo, amaa meazukoa wɔ mɛla ne mɔ.

⁷⁴Bɛdabɛ mɔɔ bɛsulo wɔ la banwu me na bɛ nye alie, ɔboalekɛ menyia anyelazo wɔ wɔ edwɛkɛ ne anu.

⁷⁵O Ɛdɛnkɛma, meze kɛ wɔ ndɛnebualɛ ne mɔ le fɔɔnwo, na wɔdea me nɔhalɛ nu.

⁷⁶Maa wɔ ɛhulolɛ kpundii ne ɛkyekye me rɛle, kɛmɔ wɔ ɛwɔkɛ ne mɔɔ wɔbɔ wɔ sonvolɛ ne la de la.

⁷⁷Nwu me anwunvɔne, amaa meanyia ngoane, ɔluakɛ me nye die wɔ mɛla ne anwo.

⁷⁸Maa adubɛnwoma anyunlu ɛgua aze, ɔboalekɛ bɛva adalɛ bɛli me ɛwɔne; na mame, mebadwenledwenle wɔ mɛla ne mɔ anwo.

⁷⁹Maa bɛdabɛ mɔɔ bɛsulo wɔ la ɛrɛla me ɛkɛ, amaa bɛanwu wɔ mɛla ne mɔ.

⁸⁰Mmamaa medi fɔlɛ wɔ wɔ mɛla ne mɔ anwo, amaa me nyunlu angua aze.

⁸¹Me ɛkɛla anwo dɔ wɔ ngoanelielɛ; melɛ anyelazo wɔ wɔ edwɛkɛ ne anu.

⁸²Mehendɛ wɔ ɛwɔkɛ ne toonwo akee me nye ɛbu, mebiza kɛ, “Kenlenzu yɛɛ ɛkɛkyekye me rɛle a?”

⁸³Ɔluakɛ meyɛ kɛ nwanye nwoma kodoku mɔɔ la senle nu, noko me rɛle ɛtɛfile wɔ mɛla ne mɔ.

⁸⁴Wɔ sonvolɛ, mengendɛ mengɔndwu kenlenzu? Kenlenzu a ɛkɛdea menli mɔɔ yɛ me kpɔdekpɔde la a?

⁸⁵Adubɛnwoma ɛpɛ me nwo kuma, menli mɔɔ ɛnli wɔ mɛla zo la.

⁸⁶Wɔ mɛla ne amuala gyi kpundii; bɛfa adalɛ bɛyɛ me kpɔdekpɔde; boa me!

⁸⁷Asɛɛ bɛhu me ala ɛne, noko metɛkpole wɔ mɛla ne mɔ.

⁸⁸Wɔ ɛhulolɛ kpundii ne ati, die me ngoane, amaa meali wɔ mɛla ne mɔ azo.

⁸⁹O Ɛdɛnkɛma, wɔ edwɛkɛ ne gyi kpundii wɔ anwuma lɔ dahuu.

⁹⁰Wɔ nɔhalɛ ne wɔ ɛkɛ maa awolɛndoazo muala; ɛdawɔ a wɔbɔ ewiade ye a, yɛɛ ɔgyi kpundii.

⁹¹Kɛ ɛzile ɛhyehyɛle bɛ la yɛɛ ninyɛne kɔsɔɔti tɛde ɛnɛ a, ɔluakɛ ninyɛne kɔsɔɔti le wɔ sonvolɛma.

⁹²Saa me nye anlie wɔ mɛla ne mɔ anwo a, anrɛɛ menwule wɔ me anwubɛnyunlu nu.

⁹³Me rɛle ɛnrɛvi wɔ mɛla ne mɔ, ɔluakɛ ɔlua bɛ nwo zo wɔmaa me ngoane.

⁹⁴Mele wɔ ɛdeɛ, die me; ɔluakɛ mebɔ mɔdenle kɛ medi wɔ mɛla ne azo.

⁹⁵Amumuyɛma ɛhɔ nzia kɛ bɛku me, na mame, medwenle wɔ mɛla ne mɔ anwo.

⁹⁶Menwu ɛleka mɔɔ kpalɛ biala ɔwɔ kɛ dwu la, noko wɔ mɛla ne mɔ tɛlɛ bo zolɛ.

⁹⁷O, mekulo wɔ mɛla ne somaa! Medwenledwenle nwolɛ alehyenlɛ biala.

⁹⁸Wɔ mɛla ne maa menwu nrɛlɛbɛ metɛla me kpɔvolɛma, ɔluakɛ ɔwɔ me nu dahuu.

⁹⁹Melɛ ndelebɛbo metɛla me kilehilevolɛma amuala, ɔluakɛ wɔ mɛla ne mɔ ala a medwenledwenle nwolɛ a.

¹⁰⁰Melɛ ndelebɛbo metɛla mgbanyinli, ɔluakɛ medi wɔ mɛla ne mɔ azo.

¹⁰¹Metwe me nwo mefi munzule adenle biala anu, amaa meahola meali wɔ edwɛkɛ zo.

¹⁰²Mendwe me nwo menvi wɔ mɛla ne mɔ anwo, ɔluakɛ ɛdawɔ yɛɛ wɔhilehile me a.

¹⁰³Wɔ edwɛkɛ ne yɛ me fɛ somaa, ɔyɛ fɛ ɔtɛla wolɛ.

¹⁰⁴Medua wɔ mɛla ne mɔ azo menyia ndelebɛbo, yemɔti mekyi adalɛ adenle biala.

¹⁰⁵Wɔ edwɛkɛ ne le kɛnlaneɛ maa me, ɔle wienyi wɔ me adenle nu.

¹⁰⁶Meha ndane na memoa zolɛ kɛ menwɔli wɔ pɛlepɛle mɛla ne mɔ azo.

¹⁰⁷Menwu amaneɛ kpole; O Ɛdɛnkɛma, maa me ngoane, kɛmɔ wɔ edwɛkɛ se la.

¹⁰⁸O Ɛdɛnkɛma, die me moyɛlɛ azubɔdeɛ ne mɔ, na kilehile me wɔ mɛla ne mɔ.

¹⁰⁹Me ahonle la me sa nu dahuu, noko me rɛle ɛnvi wɔ mɛla ne mɔ.

¹¹⁰Amumuyɛma ɛzua me ɛhane, noko mendwe me nwo menvi wɔ mɛla ne mɔ anwo.

¹¹¹Wɔ mɛla ne mɔ le me agyadeɛ dahuu; ɛhɛe, me ahonle la nwo.

¹¹²Meyeye me ahonle nu kɛ meyɛ mɔɔ wɔ mɛla ne se la, wɔ melɛ mɔɔ ɛnlɛ awieleɛ.

¹¹³Mekyi menli mɔɔ bɛ adwenle le nwiɔ nwiɔ la, na mekulo wɔ mɛla ne.

¹¹⁴Ɛle me ɛvealeka nee me enyinlike; melɛ anyelazo wɔ wɔ edwɛkɛ ne anu.

¹¹⁵Bɛmɛ ɛtaneyɛlɛma, bɛhwe bɛ nwo bɛvi me nwo ɛke, amaa meali me Nyamenle ne mɛla ne mɔ azo.

¹¹⁶Maa me anwosesebɛ, kɛmɔ wɔ ɛwɔkɛ ne se la, amaa meanyia ngoane; mmamaa me anyelazo wie anyiemgba nu.

¹¹⁷Sɔ me nu, amaa me nwo ayɛ kɔlɔnwo, na meali wɔ mɛla ne azo dahuu.

¹¹⁸Ɛkyi awie biala mɔɔ kpo wɔ mɛla ne la; ɛhɛe, bɛ nrɛlɛbɛ adwenle biala le mgbane.

¹¹⁹Ɛbu ewiade ye amumuyɛma kɛ ewula, yemɔti mekulo wɔ mɛla ne mɔ.

¹²⁰Wɔ ɛzulolɛ ti me nwo wozo me, yɛɛ mesulo wɔ ndɛnebualɛ ne mɔ.

¹²¹Meyɛ mɔɔ le pɛlepɛle na ɔtenrɛ la, mmagyakyi me ɛmaa menli mɔɔ sisi me la.

¹²²Die wɔ sonvolɛ ati dahuu; mmamaa adubɛnwoma sisi me.

¹²³Mehendɛ wɔ ngoanelielɛ ne nee wɔ tenlene ɛwɔkɛ ne toonwo me nye ɛbu.

¹²⁴Ɛ nee wɔ sonvolɛ ɛli kɛmɔ wɔ ɛhulolɛ kpundii ne de la, na kilehile me wɔ mɛla ne mɔ.

¹²⁵Mele wɔ sonvolɛ; maa me ndelebɛbo, amaa meanwu wɔ mɛla ne mɔ!

¹²⁶Mekɛ ɛdwu mɔɔ ɔwɔ kɛ Ɛdɛnkɛma keha ɔ nwo a, ɔluakɛ bɛtietia wɔ mɛla ne mɔ azo.

¹²⁷Yemɔti mekulo wɔ mɛla ne mɔ metɛla ezukoa nvutuke, metɛla nvutuke kpalɛ mɔɔ bɛdu nu la.

¹²⁸Kɛmɔ wɔ mɛla ne mɔ le fɔɔnwo la ati, mekyi adalɛ adenle biala.

¹²⁹Wɔ mɛla ne mɔ yɛ nwanwane; yemɔti mefa me ahonle muala medi zolɛ.

¹³⁰Wɔ edwɛkɛ ne anu ngilehilelɛ maa wienyi; ɔmaa mɔɔ ɛnze nwolɛ bie la nyia ndelebɛbo.

¹³¹Kɛmɔ me nwo dɔ wɔ mɛla ne mɔ somaa la ati, me ɛnwomenle bɔbɔ ɛndɔ me kunlu.

¹³²Kakyi ɛ nye me nwo na nwu me anwunvɔne, kɛmɔ ɛyɛ ɛmaa bɛdabɛ mɔɔ bɛkulo wɔ la.

¹³³Wɔ ɛwɔkɛ ne ati, mmamaa mekpo aze, yɛɛ mmamaa ɛtane di me nwo zo konim.

¹³⁴Die me fi menli mɔɔ sisi me la asa anu, amaa meali wɔ mɛla ne mɔ azo.

¹³⁵Maa ɛ nyunlu ɛda wɔ sonvolɛ anwo zo, na kilehile me wɔ mɛla ne mɔ.

¹³⁶Me nye monle twi bobobobo, ɔboalekɛ menli ɛnli wɔ mɛla ne mɔ azo. b

¹³⁷O Ɛdɛnkɛma, ɛle tenlenenli, yɛɛ wɔ ndɛnebualɛ le fɔɔnwo.

¹³⁸Wɔhyehyɛ wɔ mɛla ne mɔ tenlene nee nɔhalɛ adenle zo.

¹³⁹Me nwo yelɛyela me kɛ senle, ɔboalekɛ me kpɔvolɛma arɛle fi wɔ edwɛkɛ ne.

¹⁴⁰Mezɔ wɔ ɛwɔkɛ ne menlea ye kpalɛ, na wɔ sonvolɛ mekulo ye somaa.

¹⁴¹Mele ekyi, menli ɛmbu me, noko me rɛle ɛnvi wɔ mɛla ne mɔ.

¹⁴²Wɔ tenleneyɛlɛ le fɔɔnwo dahuu, yɛɛ wɔ mɛla ne le nɔhalɛ.

¹⁴³Melɛnwu amaneɛ nee nyane ɛdeɛ, noko me nye die wɔ mɛla ne mɔ anwo.

¹⁴⁴Wɔ mɛla ne mɔ le fɔɔnwo dahuu; maa me ndelebɛbo, amaa meanyia ngoane.

¹⁴⁵Mefa me ahonle muala mesu mefɛlɛ wɔ; O Ɛdɛnkɛma, bua me! Mebali wɔ mɛla ne mɔ azo.

¹⁴⁶Mesu mefɛlɛ wɔ; die me, amaa meali wɔ mɛla ne mɔ azo.

¹⁴⁷Medwazo aleɛbahye na mesu mefɛlɛ wɔ kɛ ɛboa me; me anyelazo wɔ wɔ edwɛkɛ ne anu.

¹⁴⁸Aledwolɛ muala me nye gyi zo, amaa meadwenledwenle wɔ ɛwɔkɛ ne anwo.

¹⁴⁹Wɔ ɛhulolɛ kpundii ne ati, tie me ne; O Ɛdɛnkɛma, dua wɔ pɛlepɛleyɛlɛ ne azo die me ngoane.

¹⁵⁰Menli mɔɔ fa adwenle ɛtane yɛ me kpɔdekpɔde la ɛbikye; bɛnze wɔ mɛla ne fee.

¹⁵¹Na wɔmɔ, O Ɛdɛnkɛma, ɛbikye me, yɛɛ wɔ mɛla ne mɔ le nɔhalɛ.

¹⁵²Menwu wɔ mɛla ne mɔ anu dɛbadɛba, kɛ wɔhyehyɛ wɔdo ɛkɛ melɛ mɔɔ ɛnlɛ awieleɛ.

¹⁵³Nea me anwubɛnyunlu na die me, ɔluakɛ me rɛle ɛnvi wɔ mɛla ne.

¹⁵⁴Die me ti na kpɔne me; wɔ ɛwɔkɛ ne ati, maa me ngoane.

¹⁵⁵Amumuyɛma ɛnrɛnyia ngoanelielɛ, ɔluakɛ bɛmkpo wɔ mɛla ne mɔ abo zo.

¹⁵⁶O Ɛdɛnkɛma, wɔ anwunvɔnezelɛ le kpole; wɔ pɛlepɛlelilɛ ti, maa me ngoane.

¹⁵⁷Me kpɔvolɛma nee bɛdabɛ mɔɔ bɛyɛ me kpɔdekpɔde la zonle, noko menvi wɔ mɛla ne mɔ anwo memkpɔkye me nwo.

¹⁵⁸Menea bɛdabɛ mɔɔ bɛnlɛ diedi la a me nwo yelɛyela me, ɔboalekɛ bɛnli wɔ mɛla ne mɔ azo.

¹⁵⁹Nea kɛ mesi mekulo wɔ mɛla ne mɔ la! Wɔ ɛhulolɛ kpundii ne ati, bɔ me ngoane nwo bane.

¹⁶⁰Wɔ edwɛkɛ ne mɔ kɔsɔɔti le kpɔkɛ ko, yemɔ a le nɔhalɛ; yɛɛ wɔ tenlene mɛla ne mɔ wɔ ɛkɛ ne dahuu.

¹⁶¹Mgbane gyɛne ala arelemgbunli yɛ me kpɔdekpɔde, noko me ahonle tu wɔ wɔ edwɛkɛ ne ati.

¹⁶²Wɔ edwɛkɛ ne maa me nye die kɛ sonla mɔɔ ɛnyia anwonyia la.

¹⁶³Mekyi yɛɛ mengulo adalɛ, na mekulo wɔ mɛla ne.

¹⁶⁴Meye wɔ ayɛlɛ fane nsuu kenle ko wɔ wɔ tenlene mɛla ne mɔ ati.

¹⁶⁵Bɛdabɛ mɔɔ bɛkulo wɔ mɛla ne la lɛ anzonudwolɛ kpole; debie biala ɛngola ɛmmaa bɛndu koti.

¹⁶⁶O Ɛdɛnkɛma, me nye la wɔ ngoanelielɛ ne azo, na meyɛ mɔɔ wɔ mɛla ne mɔ se la.

¹⁶⁷Medi wɔ mɛla ne mɔ azo; mekulo bɛ somaa!

¹⁶⁸Medi wɔ mɛla nee wɔ ngyehyɛlɛ ne mɔ azo, ɔluakɛ me ndenle muala la ɛ nyunlu.

¹⁶⁹O Ɛdɛnkɛma, maa me ɛzunlɛ ɛdwu ɛ nyunlu; ɛ nloa edwɛkɛ ti, maa me ndelebɛbo.

¹⁷⁰Maa me modolɛ ɛzunlɛ ɛdwu ɛ nyunlu; ɛ nloa edwɛkɛ ti, die me.

¹⁷¹Mebaye wɔ ayɛlɛ kɛ ɛkilehile me wɔ mɛla ne mɔ a.

¹⁷²Mebado wɔ edwɛkɛ ne anwo edwɛne, ɔluakɛ wɔ mɛla ne amuala le fɔɔnwo.

¹⁷³Fa wɔ tumi ne boa me, ɔluakɛ menlea nu meva wɔ mɛla ne mɔ.

¹⁷⁴O Ɛdɛnkɛma, me nwo dɔ wɔ ngoanelielɛ ne, me anyelielɛ a le wɔ mɛla ne.

¹⁷⁵Maa me ngoane, amaa meaye wɔ ayɛlɛ, na maa wɔ mɛla ne mɔ ɛboa me.

¹⁷⁶Meminli kɛ boane; kpondɛ wɔ sonvolɛ abo zo, ɔluakɛ me rɛle ɛnvi wɔ mɛla ne mɔ.