Read Nzema Edw 132 Bible Online

Edw 132 - Nzema bible

Edw 132

¹O Ɛdɛnkɛma, kakye Devidi nee amaneɛ kpole mɔɔ ɔnwunle ye;

²ye ɛwɔkɛ mɔɔ ɔbɔle wɔmɔ Ɛdɛnkɛma nee amonle mɔɔ ɔlile ɔhilele Gyekɔbo Tumivolɛ Nyamenle ne

³kɛ, “Menrɛhɔ me sua ne anu, anzɛɛ menrɛla me ɛkpa ne azo;

⁴menrɛmuomua me nye menrɛlafe, anzɛɛ menrɛbɔ ngɔsɔkɛ na me nye ahɔ dɔɔnwo,

⁵kɔkpula kɛ menwɔnyia ɛleka menwɔmaa Ɛdɛnkɛma, ɛleka mɔɔ Gyekɔbo Tumivolɛ Nyamenle ne badɛnla la.”

⁶ Nea, yɛdele Ngyekyeleɛ Ɛlɛka ne nganeɛ wɔ Bɛtelɛhɛm,[70] yɛnwunle ye wɔ Keleate Gyialem ɛya nu.

⁷Yɛhanle kɛ, “Bɛmaa yɛhɔ Ɛdɛnkɛma Sua nu; bɛmaa yɛbutu ɔ gyakɛ abo yɛzonle ye!”

⁸O Ɛdɛnkɛma, dwazo kɔ wɔ sua ne anu, ɛdawɔ yɛɛ wɔ Ngyekyeleɛ Ɛlɛka ne mɔɔ kile wɔ tumi la.

⁹Maa wɔ sɛlɛvolɛma ɛbɔ ɛbɛla mɔɔ tenrɛ, na maa wɔ menli ne ɛva anyelielɛ ɛdea nu.

¹⁰Wɔ sonvolɛ Devidi ati, mmakakyi ɛ nzi ɛsi mɔɔ wɔkpokpa ye nwole la.

¹¹ Ɛdɛnkɛma bɔle Devidi ɛwɔkɛ, na ɔnrɛhakyi ɔ nloa ɛlɛ. Ɔse, “Ɛ mra mrenya ne mɔ mɔɔ wɔwo bɛ la anu ko yɛɛ mebava meazie wɔ ebia ne azo a.

¹²Saa ɛ mra mrenya ne mɔ di me mɛla zo, bɛdi me ngilehilelɛ mɔɔ mebahilehile bɛ la azo a, bɛdabɛ noko bɛ mra mrenya badɛnla wɔ ebia ne azo mekɛ biala.”

¹³Ɛdɛnkɛma ɛnlea nu ɛye Zayɔn; yehulo kɛ ɛkɛ ne a ɔtɛnla a:

¹⁴Ɔse, “Ɛke le me ɛnwomenlelielɛ ɛleka dahuu; ɛke a mebadɛnla a, ɔluakɛ mehulo ɛke.

¹⁵Mebamaa yeanyia ninyɛne dɔɔnwo; mebamaa ye ehyianvolɛma anyia aleɛ.

¹⁶Mebamaa ye sɛlɛvolɛma anyia ngoanelielɛ, na meamaa me menli ne mɔɔ wɔ zo la ava anyelielɛ adeɛdea nu.

¹⁷ Ɛke a mebamaa Devidi abo zo amra ne mɔ ko adwazo ayɛ belemgbunli kpole a, na mebazinza mɔɔ mekpa nu meye ye belemgbunli la.

¹⁸Mebamaa ye kpɔvolɛma abɔ anyiemgba, na meamaa ye belemgbunlililɛ ayɛ kpole.”