Read Nzema Edw 135 Bible Online

Edw 135 - Nzema bible

Edw 135

¹Bɛye Ɛdɛnkɛma ayɛlɛ! Bɛye Ɛdɛnkɛma duma ne ayɛlɛ, O Ɛdɛnkɛma sonvolɛma, bɛye ye ayɛlɛ,

²bɛmɛ mɔɔ bɛgyinla bɛsinza Ɛdɛnkɛma Sua ne, wɔ yɛ Nyamenle ne Ɛzonlenlɛ Sua ne alie nwo ɛkɛ ne la, bɛyeyɛ ye!

³Bɛye Ɛdɛnkɛma ayɛlɛ, ɔluakɛ ɔle kpalɛ; bɛdo edwɛne bɛmaa ye, ɔluakɛ ɔle dovolɛ!

⁴Ɔluakɛ Ɛdɛnkɛma ɛkpa nu ɛye Gyekɔbo ɛmaa ɔ nwo, yeva Yizilayɛ yeyɛ ye ɛdeɛ.

⁵Meze kɛ Ɛdɛnkɛma le kpole, yɛɛ yɛ Awulae bo nyamenle muala anwo zo.

⁶Debie biala mɔɔ Ɛdɛnkɛma kulo la yɛɛ ɔyɛ a, wɔ anwuma nee aze, nyevile nu nee buma kɔsɔɔti anu.

⁷Yemɔ a ɔmaa amungu dwazo ewiade ati lɔ a; ɔmaa ɛsɛnlɛmanye kpakye ezule nu, na ɔtukue anwoma anlenkɛ ɔmaa ɔtu a.

⁸Yemɔ yɛɛ ɔhunle Yigyibiti belamunli mralɛ, menli nee nane mɔɔ bɛlumuale bɛwole bɛ la.

⁹Yemɔ yɛɛ Yigyibitima avinli, ɔyɛle nwanwane ninyɛne nee sɛkɛlɛneɛ ɔtiale Falo[72] ne nee ye sonvolɛma a.

¹⁰Yemɔ yɛɛ ɔzɛkyele maanle maanle na ɔhunle arelemgbunli katakyiema a:

¹¹Amɔle Belemgbunli Saehɔn, yɛɛ Beehyan Belemgbunli Ɔɔgo, na ɔzɛkyele Keena arelemgbunli maanle ne mɔ a.

¹²Ɔvale bɛ azɛlɛ ne mɔ ɔmanle bɛyɛle bɛ agyadeɛ, ye menli Yizilayɛma agyadeɛ.

¹³O Ɛdɛnkɛma, wɔ duma ne wɔ ɛkɛ dahuu, O Ɛdɛnkɛma, awolɛndoazo kɔsɔɔti bade wɔ nganeɛ.

¹⁴Ɔluakɛ Ɛdɛnkɛma balie ye menli ne ati, na yeanwu ye sonvolɛma anwunvɔne.

¹⁵Maanle maanle mmonle ne mɔ, le dwɛtɛ fufule nee ezukoa nvutuke; bɛle menli asa anloa gyima.

¹⁶Bɛlɛ ɛnloanlɛ, noko bɛndendɛ, bɛlɛ ɛnyelɛ, noko bɛnnwu debie,

¹⁷bɛlɛ ɛnzonlɛ, noko bɛnde edwɛkɛ, yɛɛ ɛnwomenle biala ɛnle bɛ nu.

¹⁸Maa menli mɔɔ yɛ mmonle la, ɛhɛe, awie biala mɔɔ fa ɔ rɛle wula mmonle nu la, ɛyɛ kɛ mmonle la.

¹⁹O Yizilayɛma, bɛye Ɛdɛnkɛma ayɛlɛ! O Aalɔn awuke nu amra, bɛye Ɛdɛnkɛma ayɛlɛ!

²⁰O Livaema, bɛye Ɛdɛnkɛma ayɛlɛ! Bɛdabɛ mɔɔ bɛsulo Ɛdɛnkɛma la, bɛye ye ayɛlɛ.

²¹Ayɛlɛyelɛ vi Zayɔn ɛha Ɛdɛnkɛma, yemɔ mɔɔ ɔde Gyɛlusalɛm la. Bɛye Ɛdɛnkɛma ayɛlɛ.