Read Nzema Edw 139 Bible Online

Edw 139 - Nzema bible

Edw 139

¹[74] O Ɛdɛnkɛma, wɔnleɛnlea me nu wɔnwu me!

²Ɛze me azedɛnlanlɛ nee me ɛdwazolɛ nu; ɛze me adwenle muala.

³Ɛneɛnlea na ɛnwu me ndenle muala, saa melɛdie me ɛnwomenle anzɛɛ melɛyɛ gyima a ɛze.

⁴O Ɛdɛnkɛma, mekabuke me nloa bɔbɔ la, ɛnee ɛze mɔɔ mebaha la amuala.

⁵Ɛwɔ me nyunlu, ɛwɔ me nzi, na ɛfa ɛ sa ɛto me nwo zo.

⁶Zɛhae adwenle ne yɛ me nwanwane; ɔwɔ anwuma ɔbo me ndelebɛbo zo.

⁷Saa mekoati wɔ Sunsum ne a, nienwu yɛɛ mekɔ a? Anzɛɛ mekoati wɔ a, nienwu yɛɛ menriandi meahɔ a?

⁸Saa mekɔ anwuma a, ɛwɔ ɛkɛ! Saa mekɔda mɔwuamra maanle nu a, ɛwɔ ɛkɛ!

⁹Saa mefa nwonlomɔ ndɛbalɛ metu faa mekɔ nyevile nzi moa moa lɔ a,

¹⁰ɛkɛ ne bɔbɔ, wɔ tumi ne a nee me bahɔ a, yɛɛ wɔ tumi kpole ne a bazɔ me a.

¹¹Saa meka kɛ, “Awozinli ɛheda me nwo zo, na me nwo wienyi ne ɛnlu ɛyɛ aledwolɛ” a,

¹²awozinli ne ɛnle kisii ɛmmaa wɔ, aledwolɛ ne ta wienyi kɛ alehyenlɛ, ɔluakɛ ɛ nyunlu, awozinli nee wienyi le debie ko.

¹³Ɛdawɔ a ɛhyehyɛle debie biala mɔɔ wɔ me nu la a, ɛdawɔ a ɛnwonle me wɔ ɔmɔ akunlu a.

¹⁴Meye wɔ ayɛlɛ, ɔluakɛ ɛ nwo yɛ ɛzulolɛ nee nwanwane. Wɔ gyima yɛ nwanwane! Ɛze me kpalɛ bɔkɔɔ.

¹⁵Mekɛ mɔɔ bɛlɛkyehyɛ me mbowule, bɛava bɛasisa zo wɔ ɔmɔ akunlu, na fealera nu ala melɛnyi la, ɛnee ɛze kɛ mewɔ ɛkɛ.

¹⁶Mekɛ mɔɔ metɛsɔhonle ɛhwee la ɛnee ɛ nye gyi me nwo; ɛnee bɛhɛlɛ me nwo edwɛkɛ biala wɔ wɔ buluku ne anu; mekɛ mɔɔ ɛnee bɛtɛbɔle me ɛleka biala bɔbɔ la, ɛnee bɛhɛlɛ kenle dodo mɔɔ bɛva bɛmaa me la.

¹⁷O Nyamenle, wɔ adwenle ne mɔ sonle bolɛ maa me! Bɛ muala bɛbɔ nu a ɔle kpole kpalɛ!

¹⁸Saa mese kɛ metia a, bɛzonle bɛtɛla ɛnwea. Saa metunwue a, ɛnee metɛbɔ ɛ nwo ɛkɛ ne ala.

¹⁹O Nyamenle, anrɛɛ wɔahu amumuyɛma, na kɔdiawuma vi me nwo ahwe bɛ nwo.

²⁰Bɛfa adwenle ɛtane bɛtendɛ bɛtia wɔ; wɔ kpɔvolɛma ne tendɛ ɛtane tia wɔ.

²¹O Ɛdɛnkɛma, asoo mengyi menli mɔɔ kyi wɔ la? Asoo memkpɔ menli mɔɔ dwazo tia wɔ la?

²²Mekpɔ bɛ ɛkpɔlɛ sanlera kpalɛ; mebu bɛ me kpɔvolɛma.

²³Neɛnlea me nu, O Nyamenle, na nwu me ahonle nu! Sɔ me nea, na nwu me adwenle!

²⁴Nea saa amumuyɛ bie wɔ me nu a, na fa me dua ngoane adenle ne anu dahuu.