Read Nzema Edw 140 Bible Online

Edw 140 - Nzema bible

Edw 140

¹[75] O Ɛdɛnkɛma, die me fi ɛtanema asa anu; bɔ me nwo bane wɔ amumuyɛma asa anu.

²Bɛbɔ adwenle ɛtane wɔ bɛ ahonle nu, na bɛka konle dahuu.

³ Bɛ nloa yɛ nla kɛ ɛwɔlɛ, bɛ nloa nu bɔlɔ le kɛ ɛwɔbile ɛdeɛ ne.

⁴O Ɛdɛnkɛma, sinza me wɔ amumuyɛma asa anu; bɔ me nwo bane wɔ kɔdiawuma asa anu; bɛhyehyɛ kɛ bɛkpane me gyakɛ.

⁵Adubɛnwoma ɛzua me ɛhane ɛvea, bɛva nyɛmanyɛma bɛdo nwowa; bɛzuozua me ngane wɔ adehane.

⁶Meka mekile Ɛdɛnkɛma kɛ, “Ɛle me Nyamenle.” O Ɛdɛnkɛma, gyele ɛ nzo tie me modolɛ ɛzunlɛ.

⁷O Ɛdɛnkɛma, me Awulae, me dievolɛ kpole, wɔheda me nwo zo wɔ konle nu.

⁸O Ɛdɛnkɛma, mmakponle mɔɔ amumuyɛnli ne kulo kɛ ɔyɛ la azo; mmamaa ye amumuyɛ adwenle ne di munli.

⁹Maa amumuyɛma mɔɔ ɛbɔ ɛyia me ɛlɛdi fɛlɛko la fɛlɛkolilɛ ne ɛhakyi munzule.

¹⁰Maa samɛnlakɛ ɛkpomgbɔ ɛgua bɛ ti zo! Maa bɛvuandi bɛ bɛgua kuma nu mɔɔ bɛndwazo ko ɛlɛ a.

¹¹Mmamaa mɔɔ bɔ ɔ gɔnwo anwo nzekue la tɛnla maanle ne anu; maa munzule ɛdu kɔdiawuma ne mgbaliko.

¹²Meze kɛ Ɛdɛnkɛma di mɔɔ ɛlɛnwu amaneɛ la edwɛkɛ maa ye, na ɔbua mɔɔ ɛhyia la ndɛne nɔhalɛ nu ɔmaa ye.

¹³Nɔhalɛ, tenlenema bayɛ wɔ mo, yɛɛ mɔɔ ye ɛbɛla tenrɛ la badɛnla ɛ nyunlu.