Read Nzema Edw 143 Bible Online

Edw 143 - Nzema bible

Edw 143

¹[78] O Ɛdɛnkɛma, tie me nzɛlɛlɛ; tie me modolɛ nzɛlɛlɛ. Dua wɔ nɔhalɛ ne azo bua me; wɔ tenleneyɛlɛ ne ati, bua me.

² Mmabua wɔ akɛlɛ ndɛne; ɔluakɛ ɛ nyunlu, awie biala ɛnli benle.

³Kpɔvolɛ ne ɛvoa me ndinlizo; yetinli me azɛlɛ ne anwo; yedo me awozinli nu kɛ bɛdabɛ mɔɔ bɛwu dɛbadɛba la.

⁴Yemɔti me nwo ɛbubu me; me ahonle ɛdu kpole kpalɛ.

⁵Mekakye dɛba, medwenledwenle mɔɔ wɔyɛ la anwo; menwu mɔɔ wɔyɛ la amuala.

⁶Metenrɛ me sa memaa wɔ; ɛ nwo nzuhɔne ku me kɛ azɛlɛ mɔɔ ɛwe resee la.

⁷O Ɛdɛnkɛma, ka ɛ nwo bua me! Me ɛnwomenle ɛwie! Mmafa ɛ nye ɛfea me, anrɛɛ menwɔyɛ kɛ bɛdabɛ mɔɔ bɛwu la.

⁸Maa mende wɔ ɛhulolɛ kpundii ne anwo bie nwonlomɔ mangyee ne, ɔluakɛ wɔ nuhua yɛɛ me rɛle wɔ a. Kilehile me adenle mɔɔ menva zo la, ɔluakɛ wɔmɔ ala a me nye la ɛ nwo zo a.

⁹O Ɛdɛnkɛma, die me fi me kpɔvolɛma asa anu! Menriandi meravea wɔ nu.

¹⁰Kilehile me maa menyɛ mɔɔ ɛkulo la, ɔluakɛ wɔmɔ a ɛle me Nyamenle a! Maa wɔ Sunsum kpalɛ ne ɛli me nyunlu, wɔ munzule adenle zo.

¹¹O Ɛdɛnkɛma, wɔ duma ne ati, bɔ me ngoane nwo bane! Dua wɔ tenleneyɛlɛ ne azo ye me fi ngyegyelɛ nu.

¹²Wɔ ɛhulolɛ kpundii ne ati, bɔ me kpɔvolɛma gua, na sɛkye bɛdabɛ mɔɔ bɛkyi me la amuala, ɔluakɛ mele wɔ sonvolɛ.