Read Nzema Edw 144 Bible Online

Edw 144 - Nzema bible

Edw 144

¹[79] Ayɛlɛyelɛ ɛha Ɛdɛnkɛma, me bodane, mɔɔ kilehile me konle nye zo, na ɔsiezie me ɔmaa mekɔ konle la.

²Ɔle me bodane nee me ɛvealeka, me aranemgbole nee me dievolɛ. Ɔle me enyinlike, ye nuhua yɛɛ mefea a, na ɔmaa medi maanle maanle nwo zo konim.

³ O Ɛdɛnkɛma, sonla le duzu, mɔɔ ɛbu ye bie zɛhae a, anzɛɛ sonla ra le duzu, mɔɔ ɛdwenle ɔ nwo a?

⁴Sonla le kɛ ɛnwomenle, ye mekɛ le kɛ ɛlawolɛ.

⁵O Ɛdɛnkɛma, ka anwuma aze na bɛla! Fa ɛ sa ka awoka ne mɔ maa bɛkpu esike!

⁶Kpakye ɛsɛnlɛmanye bɔ bɛ asande; to wɔ ɛda ne mɔ maa wɔ kpɔvolɛma ɛgua ɛbɔ nu.

⁷Tenrɛ ɛ sa fi anwuma lɔ, sɔ me na die me fi nzule ne mɔ anu; die me fi nyɛvolɛ asa anu.

⁸Bɛnga nɔhalɛ ɛlɛ, yɛɛ bɛdi amonle bɔbɔ a bɛbɔ adalɛ.

⁹O Nyamenle, mebado edwɛne fofolɛ meamaa wɔ; mebabɔ ye wɔ nyɛma bulu getaa zo meamaa wɔ,

¹⁰wɔmɔ mɔɔ ɛmaa arelemgbunli di konim, wɔmɔ mɔɔ ɛdie wɔ sonvolɛ Devidi a,

¹¹die me fi konle dadeɛ atisesebɛ nloa, na die me fi nyɛvolɛ asa anu. Bɛnga nɔhalɛ ɛlɛ, yɛɛ bɛdi amonle bɔbɔ a bɛbɔ adalɛ.

¹²Maa yɛ mra mrenya mgbavolɛ nu ɛyɛ kɛ mbaka mɔɔ ɛwie nyi; maa yɛ mra mraalɛ ɛyɛ kɛ mgbɛnezo bolɛ mpila mɔɔ bɛboɔboa kɛ bɛfa bɛazi belemgbunli sua la.

¹³Maa yɛ bonwolo ne mɔ ɛyi, mɔɔ aleɛ ngakyile kɔsɔɔti wɔ ɛkɛ; maa yɛ mboane ɛda, bɛyɛ apenle apenle nee apenle bulu bulu wɔ yɛ ɛya nu.

¹⁴Maa yɛ nlankɛ ɛnrenzɛnrenzɛ; mmamaa bɛ ko kpɔne yɛɛ mmamaa bɛdi abawuo. Mmamaa yɛte nyane ɛzunlɛ biala wɔ yɛ kpalɛ ne mɔ azo.

¹⁵Nyilalɛ ɛha menli mɔɔ nyilalɛ ɛhye le bɛ ɛdeɛ la! Nyilalɛ ɛha menli mɔɔ Ɛdɛnkɛma le bɛ Nyamenle la!