Read Nzema Edw 145 Bible Online

Edw 145 - Nzema bible

Edw 145

¹[80] Mebayeyɛ wɔ, me Nyamenle nee me Belemgbunli, na meayɛ wɔ mo dahuu.

²Kenle biala mebayɛ wɔ mo, na meaye wɔ ayɛlɛ dahuu.

³Ɛdɛnkɛma le kpole, yɛɛ ɔwɔ kɛ bɛye ye ayɛlɛ kpole; ye kpoleyɛlɛ, sonla ɛngola ɛnvedevede nu.

⁴Awolɛndoazo biala bahanvo wɔ, na bɛabɔ wɔ gyima mgbole mɔɔ wɔli la nolo.

⁵Mebadwenledwenle wɔ belemgbunlililɛ ne anyunlunyia nwo, na meadwenledwenle wɔ nwanwane gyima ne mɔ anwo.

⁶Menli babɔ wɔ tumi gyima mgbole ne mɔ nolo, na medame mebabɔ wɔ kpoleyɛlɛ ne nolo.

⁷Bɛbaha wɔ kpalɛyɛlɛ dɔɔnwo ne anwo edwɛkɛ, na bɛado wɔ tenleneyɛlɛ ne anwo edwɛne.

⁸Ɛdɛnkɛma le dovolɛ yɛɛ ɔse anwunvɔne, ɔnva ɛya mgbane mgbane yɛɛ ye ɛhulolɛ le kpundii.

⁹Ɛdɛnkɛma le kpalɛ maa awie biala, ye anwunvɔnezelɛ wɔ debie biala mɔɔ yebɔ la anwo zo.

¹⁰O Ɛdɛnkɛma, ɛ sa anloa gyima kɔsɔɔti bayɛ wɔ mo, Nyamenle menli ne amuala baye wɔ ayɛlɛ!

¹¹Bɛbaha wɔ belemgbunlililɛ ne anyunlunyia nwo edwɛkɛ, na bɛaha wɔ tumi ne anwo edwɛkɛ.

¹²Bɛbamaa menli anwu wɔ tumi nyɛleɛ ne mɔ, nee wɔ belemgbunlililɛ ne anyunlunyia ne kɛnlɛma.

¹³Wɔ belemgbunlililɛ ne ɛmbɔ aze ɛlɛ, yɛɛ ɛle belemgbunli dahuu wɔ awolɛndoazo kɔsɔɔti anu. Ɛdɛnkɛma le nɔhalɛ wɔ ye edwɛkɛ kɔsɔɔti anu, yɛɛ ɔle dovolɛ wɔ ye nyɛleɛ kɔsɔɔti anu.

¹⁴Ɛdɛnkɛma sɔ bɛdabɛ mɔɔ bɛlɛgua aze la nu, na ɔkpogya bɛdabɛ mɔɔ bɛgua aze la zo.

¹⁵Ɛdɛnkɛma, menli kɔsɔɔti anye la ɛ nwo zo, yɛɛ ɛmaa bɛ aleɛ wɔ ye mekɛ nloa.

¹⁶Ɛbuke ɛ sa nu, ɛmaa tease abɔdeɛ biala akunlu dwo ɔ nwo.

¹⁷Ɛdɛnkɛma di pɛlepɛle wɔ ye ndenle kɔsɔɔti anu, yɛɛ ɔ ti akunlu le kɛnlɛma wɔ ye nyɛleɛ kɔsɔɔti anu.

¹⁸Ɛdɛnkɛma bikye bɛdabɛ mɔɔ bɛfɛlɛ ye la amuala, ɔbikye bɛdabɛ mɔɔ bɛfɛlɛ ye nɔhalɛ nu la.

¹⁹Ɔmaa bɛdabɛ mɔɔ bɛsulo ye la nyia mɔɔ bɛkpondɛ la, eza ɔte bɛ ɛzunlɛ na ɔdie bɛ.

²⁰Ɛdɛnkɛma bɔ bɛdabɛ mɔɔ bɛkulo ye la anwo bane; na amumuyɛma ɛdeɛ, ɔbazɛkye bɛ.

²¹Mebaye Ɛdɛnkɛma ayɛlɛ; awie biala ɛye ye ayɛlɛ dahuu.