Read Nzema Edw 147 Bible Online

Edw 147 - Nzema bible

Edw 147

¹Bɛye Ɛdɛnkɛma ayɛlɛ! Ɔle kpalɛ kɛ yɛkɛye yɛ Nyamenle ne ayɛlɛ, ɔluakɛ ɔle dovolɛ yɛɛ ayɛlɛyelɛ edwɛne fɛta ye.

²Ɛdɛnkɛma kyekye Gyɛlusalɛm; ɔboɔboa Yizilayɛma mɔɔ awie ɛmbu bɛ bie la anloa.

³Ɔkyekye mɔɔ arɛle ɛbɔ la arɛle, na ɔyɛ mɔɔ ɛboda la ayile.

⁴Ɔze nwɔlɔra ne mɔ dodo, na ɔtoto bɛ kɔsɔɔti aluma.

⁵Yɛ Ɛdɛnkɛma Nyamenle ne le kpole, yɛɛ ye tumi le kpole; ye ndelebɛbo, bɛnzuzu.

⁶Ɛdɛnkɛma kpogya mɔɔ le bɛlɛvo la zo, ɔfuandi amumuyɛnli ne ɔto aze.

⁷Bɛva moyɛlɛ bɛdo edwɛne bɛmaa Ɛdɛnkɛma; bɛva getaa bɛbɔ edwɛne bɛmaa Ɛdɛnkɛma!

⁸Ɔfa amungu ɔkeda anwomanyunlu; ɔmaa ezule tɔ azɛlɛ ye azo, na ɔmaa ndile fifi awoka ne mɔ azo.

⁹Ɔmaa nanemgbole aleɛ, na ɔmaa ahɔhɔsɛlɛ mralɛ mɔɔ su la aleɛ.

¹⁰Ɔ nye ɛnlie ɛkpɔnwɔ anwosesebɛ nwo, yɛɛ ɔ nye ɛnlie ɛlɔnenli akɛnrasesebɛ nwo,

¹¹na Ɛdɛnkɛma anye die bɛdabɛ mɔɔ bɛsulo ye la anwo, bɛdabɛ mɔɔ bɛ anyelazo wɔ ye ɛhulolɛ kpundii ne anu la.

¹²O Gyɛlusalɛmma, bɛye Ɛdɛnkɛma ayɛlɛ! O Zayɔnoma, bɛye bɛ Nyamenle ne ayɛlɛ!

¹³Ɔluakɛ ɔmaa bɛ nlenkɛ mgbole nzi mbulalɛ nu yɛ se; ɔyila bɛ mra mɔɔ bɛ nee bɛ de la.

¹⁴Ɔmaa anzonudwolɛ ba bɛ ɛweɛne ne mɔ azo; ɔmaa bɛnyia aleɛ bɛ kunlu dwo bɛ nwo.

¹⁵Ɔtendɛ ɔkile azɛlɛ ye, mɔɔ ɔkɛha la yɛ zɔ ndɛndɛ.

¹⁶Ɔmaa ezukɔtweaba tɔ yɛ tofotofo kɛ mboane ndɛkɛ, ɔbɔ ɛbɔndwoba[81] ɔkponde kɛ nzonle.

¹⁷Ɔtɔ ayese ɔgua kɛ awozaka; nwane a kɛhola ye ɛyɛlɛ ne anloa gyinla a?

¹⁸Ɔ nloa edwɛkɛ maa bɛ muala bɛkolo; ɔmaa anwoma tu na azule ne mɔ se.

¹⁹Ɔka ye edwɛkɛ ne ɔkile Gyekɔbo, ɔfa ye mɛla nee ye ngyehyɛlɛ ɔmaa Yizilayɛma.

²⁰Ɔtɛyɛle ɛhye ɔtɛmanle maanle biala; bɛnze ye mɛla ne mɔ. Bɛye Ɛdɛnkɛma ayɛlɛ!