Read Nzema Edw 17 Bible Online

Edw 17 - Nzema bible

Edw 17

¹O Ɛdɛnkɛma, tie me nɔhalɛ edwɛkɛ nee me ɛzunlɛ. Gyele ɛ nzo tie me nzɛlɛlɛ, membɔ adalɛ.

²Bua me benle, ɔboalekɛ ɛdawɔ ɛ nye dua nɔhalɛ ne.

³Saa ɛsɔ me ɛnea, saa ɛba me nwo nɔɔzo, saa ɛneɛnlea me nu a, ɛkɛnwu kɛ menle amumuyɛ; menva me nloa menga ɛtane.

⁴Kɛmɔ ɛ nloa edwɛkɛ se la, mekpo kɛ menrɛli ɛtane, kɛmɔ menli ne bie mɔ yɛ la.

⁵Melua wɔ adenle ne anu fɔɔnwo, metɛfonle adenle ne.

⁶O Nyamenle, mefɛlɛ wɔ, ɔluakɛ ɛdie me zo; gyele ɛ nzo tie me edwɛkɛ.

⁷O, Ngoanedievolɛ mɔɔ die bɛdabɛ mɔɔ bɛkpondɛ ɛvealeka bɛfi bɛ kpɔvolɛma asa anu wɔ ɛ sa fema zo la, kile wɔ nwanwane ɛhulolɛ kpundii ne.

⁸Fa me sie kɛ ɛnyelɛ kuduarizi, fa me fea ɛ ndɛba abo

⁹fi amumuyɛma mɔɔ sɛkye me, nee kpɔvolɛma ahɔdiawu mɔɔ ɛbɔ ɛyia me la asa anu.

¹⁰Bɛnze anwunvɔne; bɛka mgbole.

¹¹Bɛtu me mgbaliko bɛkye me; kɛkala bɛbɔ bɛyia me; bɛyɛ bɛ adwenle kɛ bɛto me aze.

¹²Bɛle kɛ awenade mɔɔ tete nane nu, bɛle kɛ awenade ralɛ mɔɔ ɛhɔ nzia.

¹³O Ɛdɛnkɛma, dwazo, yia bɛ na ka bɛ gua. Fa wɔ dadeɛ ne die me ngoane fi amumuyɛma asa anu.

¹⁴O Ɛdɛnkɛma, fa wɔ tumi ne die me fi menli sa nu, menli mɔɔ bɛ kyɛfoa a le ewiade la. Maa mɔɔ wɔva wɔzie bɛ la ɛyi bɛ ko; maa bɛ mra ɛnyia bie ɛmaa ɔbo zo; na bɛdabɛ bɛgyakyi bie bɛmaa bɛ mra.

¹⁵Mame ɛdeɛ, mebalua tenleneyɛlɛ zo meanwu ɛ nyunlu. Saa aleɛ kye na medwazo menea ɛ nyunlu a, wɔ ɛnwunlɛ ne angome bɔbɔ yi me ko.