Read Nzema Edw 18 Bible Online

Edw 18 - Nzema bible

Edw 18

²Ɛdɛnkɛma le me bodane, me aranemgbole nee me dievolɛ, me Nyamenle, me bodane mɔɔ menriandi mefea nu a, me enyinlike, me ngoanedievolɛ nee me ɛvealeka kpundii.

³Mefɛlɛ Ɛdɛnkɛma, yemɔ mɔɔ ɔfɛta ayɛlɛyelɛ a, ɔdie me ɔfi me kpɔvolɛma asa anu.

⁴Ewule nyɛmanyɛma bɛkɛbɛkale me, azɛlɛkye sɛkyera bule vale me nwo zo;

⁵Ɛbolɔ nyɛmanyɛma bɛkɛbɛkale me, ewule zuale me ɛhane.

⁶Me rɛle bɔle la menvɛlɛle Ɛdɛnkɛma; menvɛlɛle me Nyamenle ne kɛ ɔboa me. Ɔdele me ne wɔ ye Ɛzonlenlɛ Sua ne anu, na me ɛzunlɛ dwule ɔ nzo nu.

⁷Azɛlɛ ye bɔle twitwi na ɔkpusule, awoka ne adiabo ne mɔ kpusule, ɔboalekɛ Nyamenle vale ɛya.

⁸Esike vi ɔ bonyi nu vindele, senle gɔhyee vi ɔ nloa anu vindele, samɛnlankɛ woonwu vi ɔ nwo kpomgbɔle guale.

⁹Ɔvi anwuma ɔdwule aze, awozinli kabii wɔ ɔ gyakɛ abo.

¹⁰Ɔdɛnlanle tease abɔdeɛ zo ɔdule; na ndɛndɛ ne ala ɔragyinlanle anwoma ne azo.

¹¹Ɔvale awozinli ɔhedale ɔ nwo, ɔvale nzulemungu ɔzinzele ɔ ti zo.

¹²Ezuawolɛ nee senle samɛnlankɛ kpakye fi wienyi ne mɔɔ li ɔ nyunlu la anu.

¹³Ɛdɛnkɛma hulule anwuma lɔ, Anwuma Anwumanli ne ane lieliele; na ezuawolɛ nee senle samɛnlankɛ dɔle.

¹⁴Ɔtotole ye ɛda ne mɔ ɔbɔle kpɔvolɛma ne asande; ɔkpakyele ɛsɛnlɛmanye, na bɛnriandile.

¹⁵Nyevile bo azɛlɛ ne yele dɔle zo, ewiade adiabo ne mɔ anwo yele guale zo, wɔ mekɛ mɔɔ Ɛdɛnkɛma hwile kpɔvolɛma anyunlu, na ɔvale ɔ bonyi nu anwoma ɔkpanle bɛ nu la.

¹⁶Ɛdɛnkɛma vi anwuma dwule razɔle me, ɔyele me ɔvile azule buma ne anu.

¹⁷Ɔliele me ɔvile me kpɔvolɛma mɔɔ anwo yɛ se, nee bɛdabɛ mɔɔ ɛnee bɛkyi me la asa anu, ɔluakɛ bɛ anwosesebɛ bo me nwo zo.

¹⁸Menwunle me nyunlu la, bɛratetale me; na Ɛdɛnkɛma liele me ti.

¹⁹Ɔvale me ɔrale ɛleka mɔɔ tɛlɛ la; ɔliele me, ɔboalekɛ ɔ nye liele me nwo.

²⁰Ɛdɛnkɛma lole me, wɔ me pɛlepɛlelilɛ ti, me sa anwo bɔkɔbɔkɔ ti, ɔlole me,

²¹ɔluakɛ meli Ɛdɛnkɛma mɛla ne mɔ azo, metɛkakyile me nzi metɛsile me Nyamenle ne anyefuu nu.

²²Menlile ye mɛla ne mɔ amuala azo; meambulu ye mɛla ne mɔ azo.

²³Meanli fɔlɛ wɔ ɔ nyunlu, mendwenle me nwo menvile fɔlɛlilɛ nwo.

²⁴Yemɔti Ɛdɛnkɛma lole me, wɔ me pɛlepɛlelilɛ ti, ɔlole me, kɛmɔ me sa anwo bɔkɔbɔkɔ si de wɔ ɔ nye zo la.

²⁵Ɛle nɔhalɛ ɛmaa bɛdabɛ mɔɔ bɛdi nɔhalɛ bɛmaa wɔ la, mɔɔ nvonleɛ ɛnle ɔ nwo la, ɛmaa ɔnwu kɛ nvonleɛ ɛnle ɛ nwo.

²⁶Ɛ nwo te maa menli mɔɔ anwo te la, na ɛyɛ kokonyinli wɔ maamɔvoma anwo zo.

²⁷Ɛdie bɛdabɛ mɔɔ bɛle bɛlɛvo la, na ɛbɛlɛ adubɛnwoma aze.

²⁸O Ɛdɛnkɛma, wɔmɔ, ɛle me kɛnlaneɛ; O me Nyamenle, ɛkpa me awozinli.

²⁹Nɔhalɛ, ɛmaa medi ɛlɔne nwo zo konim, medua me Nyamenle ne tumi zo mesɛkye bɛ nwo banebɔlɛ.

³⁰Nyamenle ɛhye, ye nyɛleɛ di munli, ye edwɛkɛ ɛnli mgbanwo! Ɔle enyinlike ɔmaa bɛdabɛ mɔɔ bɛtane ye la.

³¹Nyamenle a le nwane? Ɛdɛnkɛma ɔ. Nwane a le bodane a? Kyesɛ yɛ Nyamenle ne.

³²Yemɔ a ɔle Nyamenle mɔɔ manle me anwosesebɛ, na ɔmanle me adenle nu yɛle wienyi a.

³³ Ɔzieziele me gyakɛ kɛ kɛtɛboɛ, me nwo kɔlɔnwo wɔ awoka zo.

³⁴Ɔtete me konle nu, amaa meahola ɛda mɔɔ anu yɛ se la to.

³⁵O Ɛdɛnkɛma, wɔwowa me wɔlie me ngoane, wɔ tumi kpole ne ɛzɔ me, wɔ moalɛ ne manle menyɛle sonlakpole.

³⁶Ɛvale me ɛziele azɛlɛ mɔɔ tɛlɛ la azo; na meamkpo aze ɛlɛ.

³⁷Menvoanle me kpɔvolɛma menzɛkyele bɛ; meangyinla toonwo menwiele bɛ ku.

³⁸Membobɔle bɛ, menuanle bɛ bo zo; bɛguale aze, bɛangola me nyunlu gyinla.

³⁹Ɛmanle me konle nu anwosesebɛ; ɛmanle menlile me kpɔvolɛma anwo zo konim.

⁴⁰Ɛmanle me kpɔvolɛma nriandile vile me nyunlu, menzɛkyele bɛdabɛ mɔɔ bɛkyi me la.

⁴¹Bɛzunle kɛ bɛkpondɛ moalɛ, na bɛannyia bie; bɛdeanle bɛvɛlɛle Ɛdɛnkɛma, na yeanlie zo.

⁴²Meti bɛ motomoto kɛ munlutu wɔ anwoma gye nu, mefuandi bɛ megua kɛ kpalɛzo ndɛtɛlɛ.

⁴³Ɛliele me ɛvile menli mɔɔ dele atua la asa anu; ɛyɛle me maanle maanle belemgbunli; na menli mɔɔ menze bɛ la zonlenle me.

⁴⁴Maanle gyɛne nu amra rabɔle bɛ ti aze manle me; bɛte me ne ala a bɛtie me.

⁴⁵Nyɛvolɛ ne mɔ anwo mɔra dule, na bɛvale anwowozolɛ bɛvi bɛ aranemgbole ne mɔ anu bɛvindele.

⁴⁶Ɛdɛnkɛma de aze! Ayɛlɛyelɛ ɛha me Pepɛdievolɛ ne! Bɛbɔ me ngoanelielɛ Nyamenle ne kpoleyɛlɛ ne nolo!

⁴⁷Nyamenle ne mɔɔ lile me ti nzenralɛ la bɛlɛle maanle maanle ne mɔ aze wɔ me nyunlu;

⁴⁸na ɔliele me ɔvile me kpɔvolɛma asa anu. O Ɛdɛnkɛma, ɛmanle menlile me kpɔvolɛma anwo zo konim, ɛliele me ɛvile menli mɔɔ ko la asa anu.

⁴⁹ Ɛhye ati Ɛdɛnkɛma, mebaye wɔ ayɛlɛ wɔ maanle maanle avinli, na meado ayɛlɛyelɛ edwɛne meamaa wɔ.

⁵⁰Nyamenle maa ye belemgbunli ne di konim mgbole; ɔkile ye ɛhulolɛ kpundii ne ɔmaa sonla ne mɔɔ yekpa nu yeye ye, Devidi nee ɔ bo zo amra, wɔ mekɛ mɔɔ ɛnlɛ awieleɛ la.