Read Nzema Edw 19 Bible Online

Edw 19 - Nzema bible

Edw 19

¹[11] Anwumaneamra ɛlɛkile Nyamenle anyunlunyia ne; anwomanyunlu bɔ ɔ sa anloa gyima ne nolo.

²Alehyenlɛ biala ka edwɛkɛ ne, yɛɛ aledwolɛ biala maa nwolɛ adwenle.

³Bɛnva ɛnloanlɛ anzɛɛ edwɛkɛkpɔkɛ, awie ɛnde bɛ ne;

⁴ noko bɛ ne pɛ azɛlɛ ye amuala, bɛ edwɛkɛ dwu ewiade ɛleka biala. Bɛ avinli, Nyamenle ɛyɛ sua ɛmaa sɛnzɛne ne,

⁵mɔɔ finde kɛ atɔfolɛ nrenya vi ye sua nu ɛlɛfinde; ɔle kɛ sonla mɔɔ anwo yɛ se, na ɔfa anyelielɛ ɔnriandi ɔdua ye adenle nu.

⁶Ɔtudu ɔfi anwumaneamra ne awieleɛ lɔ, na ɔdua bɛ avinli ɔkɔ bɛ awieleɛ lɔ. Debie ɛngola ɛnvea ɔ nwo wɔ ye wuluwulu ne anu.

⁷Ɛdɛnkɛma mɛla ne di munli, ɔmaa ɛkɛla ne anwo kpundi ye; Ɛdɛnkɛma ngyehyɛlɛ ne le kpundii, ɔmaa mɔɔ ɛnze nrɛlɛbɛ la nwu nrɛlɛbɛ.

⁸Ɛdɛnkɛma ngyehyɛlɛ ne mɔ le fɔɔnwo, ɔmaa ahonle di fɛlɛko; Ɛdɛnkɛma mɛla ne anwo te, ɔmaa ndelebɛbo yɛ gyima.

⁹Ɛdɛnkɛma ɛzonlenlɛ nwo te, ɔwɔ ɛkɛ ne dahuu; Ɛdɛnkɛma mɛla ne mɔ le nɔhalɛ, bɛ muala bɛle fɔɔnwo.

¹⁰Bɛ ɛkpondɛlɛ hyia tɛla ezukoa nvutuke, ɔtɛla ezukoa nvutuke tagyee bɔbɔ. Ɔyɛ fɛ ɔtɛla wolɛ, ɔpepe ɔtɛla wolɛ mɔɔ ɛwie da la.

¹¹Bɛkakyehakye medame, wɔ sonvolɛ; zolɛlilɛ le nyilalɛ kpole.

¹²Awie ɛngola ɛnnwu ɔdaye ye nvonleɛ, Ɛdɛnkɛma, die me fi me nvonleɛ mɔɔ vea la anu.

¹³Twe wɔ akɛlɛ fi anyefuu ɛtaneyɛlɛ nwo; mmamaa bɛfo me nwo zo, amaa meanli ɛzonle, amaa meavi mɛladonlɛ mgbole nu.

¹⁴O Ɛdɛnkɛma, me bodane nee me dievolɛ, maa me nloa edwɛkɛ nee me ahonle nu nzɛlɛlɛ ɛdwu ɛ nyunlu na ɔzɔ ɛ nye.