Read Nzema Edw 20 Bible Online

Edw 20 - Nzema bible

Edw 20

¹[12] Ɛdɛnkɛma ɛdie wɔ wɔ anwongyelelɛ nu! Gyekɔbo Nyamenle ne duma ɛbɔ ɛ nwo bane!

²Ɔva moalɛ ɔvi ye Ɛzonlenlɛ Sua ne anu ɔraboa wɔ, na ɔva anwosesebɛ ɔvi Zayɔn Boka ɔrɛlɛ wɔ.

³Ɔmaa wɔ azubɔdeɛ ne mɔ amuala ɛzɔ ɔ nye, na ɔlie wɔ ɛyelalɛ azubɔlɛ ne mɔ.

⁴Ɔmaa ɛ sa ɛha mɔɔ ɛkpondɛ la, na ɔmaa wɔ adwenle ngyehyɛlɛ muala ɛyɛ zɔ.

⁵Ɔmaa yɛva anyelielɛ yɛdeɛdea nuhua wɔ wɔ konimlilɛ ne anwo, yɛvola yɛ fɛlɛnra ne mɔ wɔ yɛ Nyamenle ne duma nu. Ɛdɛnkɛma ɛmaa mɔɔ ɛkɛbiza la amuala ɛyɛ ɛkɛ.

⁶Kɛkala, meze kɛ Ɛdɛnkɛma baboa mɔɔ yekpa nu yeye ye la; ɔbabua ye wɔ anwuma lɔ ye ɛleka nwuanzanwuanza ne, yeava tumi kpole yeamaa yeali konim mgbole.

⁷Bie mɔ fa konle ehwili tu bɛ nloa anu, yɛɛ bie mɔ fa mgbɔnwɔ; na yɛmɛ, yɛfa Ɛdɛnkɛma yɛ Nyamenle ne duma a yɛtu yɛ nloa anu a.

⁸Bɛbagolo bɛagua, na yɛmɛ, yɛbadwazo yɛagyinla.

⁹O Ɛdɛnkɛma, maa belemgbunli ne ɛli konim; yɛfɛlɛ wɔ a die yɛ zo.