Read Nzema Edw 21 Bible Online

Edw 21 - Nzema bible

Edw 21

¹[13] O Ɛdɛnkɛma, wɔ tumi ne ati, belemgbunli anye die, yɛɛ ɔfa wɔ moalɛ ɔtu ɔ nwo.

²Wɔva mɔɔ ɔkpondɛ la wɔmaa ye, wɔanzi ye ɛbizalɛdeɛ ne aze.

³Ɔluakɛ wɔlo ye ninyɛne kpalɛ ngome; wɔbɔ ye ezukoa nvutuke kpalɛ abɔtile.

⁴Ɔbizale ngoane, na ɛvale ɛmanle ye, wɔmaa ye ngoane tendenle.

⁵Wɔ moalɛ ɛmaa ye anyunlunyia ɛyɛ kpole; wɔmaa ye duma kpole nee tumi.

⁶Ɛhɛe, wɔmaa ye nyilalɛ mɔɔ ɛnlɛ awieleɛ; ɛye ɛ nyunlu ɛmaa ɔ nye die.

⁷Belemgbunli ne arɛle wɔ Ɛdɛnkɛma anu, na ɔlua Anwuma Anwumanli ne ɛhulolɛ kpundii ne ati, dahuu ɔgyi kpundii.

⁸Ɛ sa bazɔ wɔ kpɔvolɛma amuala nu; ɛbahye awie biala mɔɔ kyi wɔ la.

⁹Saa ɛye ɛ nyunlu a, ɛbamaa bɛazɔ kɛ fonlomo senle. Ɛdɛnkɛma bava ɛya azɛkye bɛ, senle ne bayela bɛ muala wee.

¹⁰Ɛbabɔ bɛ bo zo amra abo zo wɔ azɛlɛ ye azo, na wɔazɛkye bɛ mra wɔavi menli avinli.

¹¹Saa bɛsuzu wɔ ɛtane, na bɛyɛ ɛ nwo esiayɛ a, bɛ sa ɛnrɛha wɔ.

¹²Ɔluakɛ ɛbadende wɔ ɛda ne bɛ nyunlu; ɛbamaa bɛagua ɛbɔ nu.

¹³O Ɛdɛnkɛma, yɛyeyɛ wɔ, wɔ tumi ne ati, yɛbado edwɛne yeaye wɔ tumi ne ayɛlɛ.