Read Nzema Edw 26 Bible Online

Edw 26 - Nzema bible

Edw 26

¹[18] O Ɛdɛnkɛma, bua me benle, ɔluakɛ meyɛ mɔɔ le kpalɛ la. Meva me rɛle mewula Ɛdɛnkɛma anu kpundii.

²O Ɛdɛnkɛma, neɛnlea me nu na sɔ me nea, sɔ me adwenle nee me ahonle nea.

³Ɔluakɛ wɔ ɛhulolɛ kpundii ne a gyi me nyunlu a, medi nɔhalɛ memaa wɔ.

⁴Me nee adalɛma ɛndɛnla, yɛɛ me nee nabalabama ɛndu.

⁵Mekyi nindavoma agɔnwolɛvalɛ, yɛɛ me nee amumuyɛma ɛnrɛdɛnla.

⁶Menrinzi me sa anwo mekile kɛ menli fɔlɛ, O Ɛdɛnkɛma, na mebɔ wɔ azukponle ne mgbɔlɔka,

⁷metea nu meto moyɛlɛ edwɛne meyɛ wɔ mo, na mebɔ wɔ nwanwane gyima ne mɔ nolo.

⁸O Ɛdɛnkɛma, mekulo wɔ sua ne mɔɔ ɛde nu la, ɛleka mɔɔ wɔ anyunlunyia ne wɔ la.

⁹Mmafa me ɛboka ɛtanema ɛkpoa me ɛgua, anzɛɛ mmatia me ɛboka kɔdiawuma anwo.

¹⁰Menli zɛhae mɔ dwenle ɛtane nwo, bɛ sa fema nu le ndoloboa ngome.

¹¹Na mame, meyɛ mɔɔ le kpalɛ la, die me, na nwu me anwunvɔne.

¹²Me gyakɛ gyi azɛlɛ sɛsɛ zo; mebaye Ɛdɛnkɛma ayɛlɛ wɔ ye menli ne ayia kpole ne anu.