Read Nzema Edw 27 Bible Online

Edw 27 - Nzema bible

Edw 27

¹[19] Ɛdɛnkɛma le me wienyi nee ngoanelielɛ; menrɛzulo awie biala. Ɛdɛnkɛma le me ɛbɛla nu ɛvealeka; menrɛzulo awie biala.

²Saa amumuyɛma teta me, bɛbɔ me nwo nzekue bɔbɔ a, me kpɔvolɛma nee bɛdabɛ mɔɔ bɛkyi me la badu koti na bɛadu bɛagua.

³Saa ɛlɔnema bɛnra yia me a, menrɛzulo ɛhwee; saa konle fa me aze a, me ahonle ɛnrɛdu.

⁴Debie ko yɛɛ mebiza ye Ɛdɛnkɛma ɛkɛ a, na yemɔ yɛɛ mebakpo ɔ bo zo a; kɛ menwɔdɛnla Ɛdɛnkɛma sua nu dahuu, wɔ mekɛ mɔɔ mede ngoane nu, kɛ menwɔnwu kɛ Ɛdɛnkɛma kɛnlɛma si de, na meabiza moalɛ wɔ ye Ɛzonlenlɛ Sua ne anu.

⁵Ɔluakɛ ɔbava me yeavea ɔ ndɛba abo wɔ amaneɛnwunlɛ mekɛ nu. Ɔbava me yeavea ye Ɛzonlenlɛ Sua ne anu, na yeava me yeazie bodane zo anwuma.

⁶Kɛkala akee bɛbakpogya me zo wɔ me agbɔvolɛ mɔɔ ɛbɔ ɛyia me la avinli; mebava anyelielɛ meabɔ azu, wɔ ye Ɛzonlenlɛ Sua ne anu, meado edwɛne, meabɔ agole meayeyɛ Ɛdɛnkɛma.

⁷O Ɛdɛnkɛma, metea mefɛlɛ wɔ a, tie me, nwu me anwunvɔne na bua me.

⁸Wɔha kɛ, “Kpondɛ me nyunlu.” Meka ye me ahonle nu mekile wɔ kɛ, “Ɛdɛnkɛma, ɛ nyunlu ala a mekpondɛ a.”

⁹Mmaye ɛ nye ɛto ɛbɔ nu. Mmafa ɛya ɛfoa wɔ sonvolɛ, wɔmɔ yɛɛ wɔyɛ me boavolɛ a. Mmato me lɔ, mmamaa ɛ rɛle fi me. O me ngoanelielɛ Nyamenle!

¹⁰Ɔluakɛ egya nee ɔmɔ ɛkpo me, na Ɛdɛnkɛma bava me.

¹¹O Ɛdɛnkɛma, kilehile me wɔ adenle ne, na ɔlua me kpɔvolɛma ati, fa me dua adenle sɛsɛ nu.

¹²Mmaye me ɛmaa me kpɔvolɛma, ɔluakɛ dasewiama ɛdwazo ɛtia me. Nzakadolɛ ala a wɔ bɛ ti anu a.

¹³Medie medi kɛ mebanwu Ɛdɛnkɛma kpalɛyɛlɛ ne, wɔ teasema azɛlɛ ne azo.

¹⁴Fa ɛ rɛle wula Ɛdɛnkɛma anu; mia ɛ nwo na si wɔ ahonle, ɛhɛe, fa ɛ rɛle wula Ɛdɛnkɛma anu.