Read Nzema Edw 28 Bible Online

Edw 28 - Nzema bible

Edw 28

¹[20] O Ɛdɛnkɛma, wɔmɔ yɛɛ mefɛlɛ wɔ a, me bodane, mmatuodua ɛ nzo wɔ me nwo; saa wɔandɛne me zo a, menwɔyɛ kɛ bɛdabɛ mɔɔ bɛkɔ ɛbolɔ Kuma nu la.

²Tie me modolɛ nzɛlɛlɛ, melɛsu meavɛlɛ wɔ kɛ ɛboa me, yemɔti medende me sa, wɔ wɔ ɛleka nwuanzanwuanza ne.

³Mmafa me ɛfonla amumuyɛma ne, bɛdabɛ mɔɔ bɛbɔ nindavo ɛbɛla, mɔɔ bɛka anzonudwolɛ nwo edwɛkɛ bɛkile bɛ gɔnwo mɔ, noko adalɛ ngome ɛyi bɛ ahonle nu la.

⁴ Bua bɛ ndɛne, kɛmɔ bɛ gyima si de la, nee kɛmɔ bɛ ninyɛndane ne mɔ si de la. Tua bɛ kakɛ, kɛmɔ bɛ sa anloa gyima si de la. tua bɛ kakɛ mɔɔ fɛta la.

⁵Kɛmɔ bɛmbu Ɛdɛnkɛma gyima ne mɔ bie, anzɛɛ ɔ sa anloa gyima ne bie la, ɔbabubu bɛ yeagua, yɛɛ ɔnrɛzi bɛ bieko.

⁶Ayɛlɛyelɛ ɛha Ɛdɛnkɛma, ɔluakɛ yede me modolɛ nzɛlɛlɛ ne.

⁷Ɛdɛnkɛma le me anwosesebɛ nee me enyinlike. Ye nuhua yɛɛ me rɛle wɔ a. Yemɔti menyia moalɛ, yɛɛ medi fɛlɛko, na mefa edwɛndolɛ meye ye ayɛlɛ.

⁸Ɛdɛnkɛma a le ye menli ne anwosesebɛ a, ɔle mɔɔ yekpa nu yeye ye la ngoanelielɛ ɛvealeka.

⁹O die wɔ menli ne na yila wɔ agyadeɛ; yɛ bɛ neavolɛ na nea bɛ boɛ dahuu.