Read Nzema Edw 29 Bible Online

Edw 29 - Nzema bible

Edw 29

¹[21] O bɛmɛ anwuma amra, bɛye Ɛdɛnkɛma ayɛlɛ, bɛye Ɛdɛnkɛma anyunlunyia nee ye tumi ne ayɛlɛ.

² Bɛye Ɛdɛnkɛma anyunlunyia duma ne ayɛlɛ; bɛva nwuanzanwuanzayɛlɛ bɛzonle Ɛdɛnkɛma.

³Ɛdɛnkɛma ane dielie azule ne mɔ anye; anyunlunyia Nyamenle ne kuluhulu, Ɛdɛnkɛma ane dielie azule ne mɔ anye.

⁴Tumi wɔ Ɛdɛnkɛma ane ne anu, Ɛdɛnkɛma ane ne kile ye belemgbunlililɛ ne.

⁵Ɛdɛnkɛma ane bubu sida mbaka, ɔbubu Lɛbanɔn sida mbaka bɔbɔ.

⁶Ɔmaa Lɛbanɔn awoka wuluwulu kɛ nlankɛ mralɛ, na Hɛmɔn Boka wuluwulu kɛ ɛnlankɛ ralɛ nyinli.

⁷Ɛdɛnkɛma ane kpomgbɔ senle.

⁸Ɛdɛnkɛma ane kpusu ɛsɛlɛ, Ɛdɛnkɛma maa Keedɛhye ɛsɛlɛ kpusu.

⁹Ɛdɛnkɛma ane maa weɛlɛ wo mgbemgbene nu; ɔkpolo mbaka nya ɔgua; na bɛtea nu wɔ ye Ɛzonlenlɛ Sua ne anu kɛ, “Anyunlunyia ɛha Nyamenle!”

¹⁰Ɛdɛnkɛma de ye belemgbunli ebia nu wɔ azuyilɛ nye; Ɛdɛnkɛma di belemgbunli dahuu.

¹¹Ɛdɛnkɛma ɛmaa ye menli ne anwosesebɛ, na ɔva anzonudwolɛ ɔyila ye menli ne.