Read Nzema Edw 30 Bible Online

Edw 30 - Nzema bible

Edw 30

¹[22] O Ɛdɛnkɛma, mebayeyɛ wɔ, ɔluakɛ wɔmaa me zo, wɔammaa me kpɔvolɛma anzi me nwo zo agole.

²O Ɛdɛnkɛma me Nyamenle, menzunle menvɛlɛle wɔ kɛ ɛboa me, na wɔyɛ me ayile.

³O Ɛdɛnkɛma, wɔye me ɛkɛla wɔvi Ɛbolɔ, wɔye me mɔwuamra anu wɔra ngoane nu.

⁴O bɛmɛ Nyamenle menli, bɛdo edwɛne bɛye Ɛdɛnkɛma ayɛlɛ, na bɛyɛ ye mo.

⁵Ɔluakɛ ye ɛyavalɛ ɛngyɛ, yɛɛ ye nyeleyɛlɛ ɛnlɛ awieleɛ. Ɛzunlɛ bahɔ zo aledwolɛ ne, na alehyenlɛ ne fa anyelielɛ ba.

⁶Na mame, menganle wɔ me ɛkpazilɛ mekɛ nu kɛ, “Awie ɛnrɛhola me.”

⁷O Ɛdɛnkɛma, ɔlua wɔ ɛlolɛ zo, wɔmaa megyinla kpundii kɛ boka kpole bie; ɛyele ɛ nye ɛdole ɛbɔ nu, na ɛzulolɛ hanle me.

⁸O Ɛdɛnkɛma, menzunle menvɛlɛle wɔ; menvale me modolɛ mendole Ɛdɛnkɛma anyunlu kɛ:

⁹“Duzu nvasoɛ a wɔ me ewule zo a? Duzu nvasoɛ a wɔ me Ɛbolɔ Kuma nu ɛhɔlɛ zo a? Asoo ndɛtɛlɛ bahola aye wɔ ayɛlɛ? Asoo ɔbaha wɔ nɔhalɛlilɛ ne anwo edwɛkɛ?

¹⁰O Ɛdɛnkɛma, tie me na nwu me anwunvɔne! O Ɛdɛnkɛma, yɛ me boavolɛ!”

¹¹Wɔmaa me nyane ɛhakyi ɛzelekɛ, wɔkpa me ɛrele wɔgua na wɔmaa me nye ɛlie,

¹²amaa me ɛkɛla anyɛ koonwu na yeaye wɔ ayɛlɛ. O Ɛdɛnkɛma me Nyamenle, mebayɛ wɔ mo dahuu.