Read Nzema Edw 31 Bible Online

Edw 31 - Nzema bible

Edw 31

¹[23] O Ɛdɛnkɛma, wɔ nuhua yɛɛ menriandi mefea a; mmamaa me nyunlu gua aze ɛlɛ; die me wɔ wɔ kpalɛyɛlɛ ne ati.

²Gyele ɛ nzo tie me, na die me ndɛndɛ! Yɛ me bodane mɔɔ menriandi mefea ɔ bo a, aranemgbole kpundii mɔɔ mevea nu a me nwo kɔlɔnwo a!

³Nɔhalɛ, ɛle me bodane nee me aranemgbole; wɔ duma ne ati di me nyunlu na sinza me.

⁴Ye me fi ɛhane mɔɔ bɛzua me la anu, ɔluakɛ wɔmɔ a ɛle me ɛvealeka a.

⁵ Ɛ sa nu yɛɛ mefa me sunsum mewula a; O Ɛdɛnkɛma, nɔhavo Nyamenle, wɔlie me ngoane.

⁶Ɛkyi bɛdabɛ mɔɔ bɛsɔ mmonle la; na mame, me rɛle wɔ Ɛdɛnkɛma anu.

⁷Wɔ ɛhulolɛ kpundii ne ati mebali fɛlɛko na me nye alie, ɔboalekɛ wɔnwu me amaneɛnwunlɛ; wɔnwu munzule mɔɔ ɛdo me la.

⁸Ɛtɛyele me ɛtɛmanle me kpɔvolɛma; wɔva me wɔzie azɛlɛ tɛtɛlɛ zo.

⁹O Ɛdɛnkɛma, nwu me anwunvɔne, ɔluakɛ ngyegyelɛ ɛdo me, nyane ngome ɛbɔ me nye; me nwonane ne nee me ɛkɛla ɛwie kɔ.

¹⁰Ɔluakɛ alɔbɔlɛ ngome ɛwie me kyekye, yɛɛ me mekɛ kɔsɔɔti, ɛzunlɛ ala a mesu a. Anwubɛnyunlu ɛmaa me nwo ɛvɔ, me agbɔkɛ nu ɛtuto.

¹¹Meyɛ agolobɛnwo sonla wɔ me kpɔvolɛma anyunlu, me nwo ka me gɔnwo mɔ ɛzulolɛ. Meyɛ debie ɛzulolɛ bie wɔ menli mɔɔ ze me la anye zo; bɛnwu me gua zo a bɛnriandi me.

¹²Mevi bɛ adwenle nu kɛ sonla mɔɔ ɛwu la; meyɛ kɛ buakɛ mɔɔ ɛbɔ la.

¹³Ɛhɛe, mete dɔɔnwo azukuedulɛ ne, ɛzulolɛ wɔ ɛleka biala! Bɛyia bɛfa me nwo adwenle, bɛbɔ kpɔkɛ kɛ bɛku me.

¹⁴O Ɛdɛnkɛma, me rɛle wɔ wɔ nu, mese, “Wɔmɔ a ɛle me Nyamenle a.”

¹⁵Me mekɛ ne wɔ ɛ sa nu; die me fi me kpɔvolɛma nee me kpɔdekpɔdeyɛlɛma asa anu.

¹⁶Maa ɛ nye ɛrɛla wɔ sonvolɛ anwo zo; dua wɔ ɛhulolɛ kpundii ne azo die me.

¹⁷O Ɛdɛnkɛma, mmamaa me nyunlu gua aze, ɔluakɛ mefɛlɛ wɔ; maa amumuyɛma anyunlu ɛgua aze; maa bɛyɛ bɛ nloa kpulu bɛhɔ ɛbolɔ.

¹⁸Maa adalɛma ɛdɔ mumule; mgbanyizonle nu bɛtendɛ mgbole bɛtia menli mɔɔ di pɛlepɛle la.

¹⁹O, wɔ kpalɛyɛlɛ ne zonle, wɔva wɔzie wɔmaa bɛdabɛ mɔɔ bɛsonle wɔ la. Ɛkile ye wɔ bɛdabɛ mɔɔ bɛbafea wɔ nu la anwo zo, wɔ menli kɔsɔɔti anye zo.

²⁰Ɛfa bɛ ɛfea ɛ nwo ɛkɛ ne ɛfi menli mɔɔ bɔ adwenle ɛtane la anwo; ɛfa bɛ ɛsie gyɛlɛɛnye wɔ ɛ ndɛba abo ɛfi aholoba nee safule mgbole nwo.

²¹Bɛye Ɛdɛnkɛma ayɛlɛ, ɔluakɛ yehile me ye ɛhulolɛ kpundii ne nwanwane nu, wɔ mekɛ mɔɔ bɛbɔle bɛyiale me kɛ suakpole mɔɔ ɛlɔnema ɛbɔ ɛyia ye la.

²²Me ahonle dule na menganle kɛ, “Wɔye me wɔvi ɛ nye zo ala ɛne,” Na ɛdele me modolɛ ne, mekɛ mɔɔ menzunle kɛ ɛboa me la.

²³Bɛmɛ Nyamenle menli, bɛhulo Ɛdɛnkɛma; Ɛdɛnkɛma sinza mɔɔ di nɔhalɛ la, na ɔtua bɛdabɛ mɔɔ bɛmemaa bɛ nwo zo la kakɛ kɛmɔ ɔfɛta la.

²⁴Bɛdabɛ mɔɔ bɛ rɛle wɔ Ɛdɛnkɛma anu la, bɛzi ahonle na bɛgyinla kpundii.