Read Nzema Edw 33 Bible Online

Edw 33 - Nzema bible

Edw 33

¹O bɛmɛ tenlenema, bɛli fɛlɛko wɔ mɔɔ Ɛdɛnkɛma ɛyɛ la ati! Bɛmɛ mɔɔ bɛdi boɛ la, bɛye ye ayɛlɛ.

²Bɛva getaa kpole bɛye Ɛdɛnkɛma ayɛlɛ, bɛva nyɛma bulu getaa bɛbɔ agole!

³Bɛdo edwɛne fofolɛ bɛmaa ye, bɛbɔ nyɛma bulu getaa ne kpalɛ na bɛdeɛdea nu anyelielɛ nu.

⁴Ɔluakɛ Ɛdɛnkɛma edwɛkɛ ne le nɔhalɛ; yɛɛ ye gyima kɔsɔɔti di munli.

⁵Ɛdɛnkɛma kulo tenleneyɛlɛ nee pɛlepɛlelilɛ; Ɛdɛnkɛma ɛhulolɛ kpundii ne ɛyi azɛlɛ ye.

⁶Ɛdɛnkɛma vale ɔ nloa bɔle anwuma, ɔvale ɔ nloa a ɔbɔle anwumaneamra a.

⁷Ɔboɔboale nyevile ne anloa kɛ nzule mɔɔ wɔ toba nu; ɔguale nyevile buma ne mɔ efiade.

⁸Bɛmaa azɛlɛ ye ɛzulo Ɛdɛnkɛma, ewiade amra kɔsɔɔti ɛzulo ye, ɛli ye eni.

⁹Ɔluakɛ ɔdendɛle, na ɔyɛle zɔ; ɔzele, na ɔyɛle zɔ.

¹⁰Ɛdɛnkɛma maa maanle maanle adwenle ngyehyɛlɛ yɛ mgbane; ɔsɛkye menli ngyehyɛlɛ mɔɔ bɛkɛhyehyɛ la.

¹¹Ɛdɛnkɛma ngyehyɛlɛ ne wɔ ɛkɛ ne dahuu, ɔbɔ kpɔkɛ a ɔka awolɛndoazo kɔsɔɔti.

¹²Nyilalɛ ɛha maanle ne mɔɔ Ɛdɛnkɛma le ye Nyamenle la, nyilalɛ ɛha menli ne mɔɔ yeye bɛ yeyɛ bɛ ye menli la.

¹³Ɛdɛnkɛma wɔ anwuma lɔ, ɔto ɔ nye ɔnea aze, na ɔnwu menli kɔsɔɔti.

¹⁴Ɔde ye belemgbunli ebia nu lɔ, ɔbele ɔ nye ɔnea ewiade amra amuala.

¹⁵Yemɔ yɛɛ ɔmaa bɛ adwenle a, yɛɛ ɔnwu mɔɔ bɛyɛ la amuala.

¹⁶Belemgbunli biala ɛlɔne kpole ɛngola ɛnlie ye, ɛlɔnenli biala anwosesebɛ kpole ɛngola ɛnlie ye.

¹⁷Konle ɛkpɔnwɔ ɛnle konimlilɛ anyelazo, yɛɛ ye anwosesebɛ kpole ne ɛngola sonla ngoane die.

¹⁸Bɛnlea, Ɛdɛnkɛma anye wɔ bɛdabɛ mɔɔ bɛsulo ye, yɛɛ bɛdabɛ mɔɔ bɛ nye la ye ɛhulolɛ kpundii ne azo la anwo zo,

¹⁹amaa yealie bɛ yeavi ewule nu, na ɛhɔne ba a bɛanwu.

²⁰Yɛ ɛkɛla kendɛ Ɛdɛnkɛma; ɔle yɛ moalɛ nee yɛ enyinlike.

²¹Ɛhɛe, yemɔ ɔ ti yɛdi fɛlɛko, ɔboalekɛ yɛ rɛle wɔ ye duma nwuanzanwuanza ne anu.

²²O Ɛdɛnkɛma, maa wɔ ɛhulolɛ kpundii ne ɛrɛla yɛ nwo zo, ɔluakɛ yɛ anyelazo a le wɔ.