Read Nzema Edw 34 Bible Online

Edw 34 - Nzema bible

Edw 34

¹[25] Mebayɛ Ɛdɛnkɛma mo dahuu; dahuu mebaye ye ayɛlɛ.

²Me ɛkɛla fa Ɛdɛnkɛma tu ɔ nwo; anwubɛnyunluma ɛdie na bɛli fɛlɛko.

³O bɛ nee me ɛyeyɛ Ɛdɛnkɛma; bɛmaa yɛbɔ nu yɛkpogya ye duma ne zo.

⁴Menzɛlɛle Ɛdɛnkɛma, na ɔliele zo, na ɔliele me ɔvile me ɛzulolɛ muala anu.

⁵Bɛva bɛ nye bɛdo ɔ nwo zo na bɛmaa bɛ nye ɛlie, amaa bɛ nyunlu angua aze ɛlɛ.

⁶Ehyianli ɛhye zunle, na Ɛdɛnkɛma diele ye, na ɔliele ye ɔvile ye amaneɛnwunlɛ muala anu.

⁷Ɛdɛnkɛma soanvolɛ sinza bɛdabɛ mɔɔ bɛsulo ye la, na ɔdie bɛ ngoane.

⁸ O bɛzɔ Ɛdɛnkɛma bɛnlea na bɛkɛnwu kɛ ɔle kpalɛ! Nyilalɛ ɛha sonla ne mɔɔ nriandi kɔtane ye la.

⁹O bɛmɛ Nyamenle menli, bɛzulo Ɛdɛnkɛma, ɔluakɛ bɛdabɛ mɔɔ bɛsulo ye la ɛngyia ɛhwee!

¹⁰Awenade ngakula bɔbɔ kyia na ɛhɔne ku bɛ, noko bɛdabɛ mɔɔ bɛkpondɛ Ɛdɛnkɛma abo zo la ɛngyia debie kpalɛ biala anwo.

¹¹Bɛrɛla, O ayi mɔ, bɛdie me, mebahilehile bɛ Ɛdɛnkɛma ɛzulolɛ ne.

¹² Sonla boni a kpondɛ ngoane, na ɔkpondɛ kenle dɔɔnwo, amaa ɔ nye alie kpalɛ nwo a?

¹³Sɔ ɛ nloa, mmaka ɛtane, yɛɛ mmabɔ adalɛ biala.

¹⁴Twe ɛ nwo fi ɛtane nwo, na di boɛ; kpondɛ anzonudwolɛ na di ɔ nzi.

¹⁵Ɛdɛnkɛma anye wɔ tenlenema anwo zo, yɛɛ ɔte bɛ ɛzunlɛ.

¹⁶Ɛdɛnkɛma fa ɔ nye wula nindavoma anyunlu, kɛ ɔminli bɛ bo zo wɔ ewiade.

¹⁷Saa tenlenema biza moalɛ a, Ɛdɛnkɛma tie bɛ, na ɔdie bɛ ɔfi bɛ amaneɛnwunlɛ nu.

¹⁸Ɛdɛnkɛma bikye mɔɔ nyane ɛha ye la, na ɔdie mɔɔ ye anyelazo ɛwie la.

¹⁹Sonlakpalɛ nwu amaneɛ dɔɔnwo, noko Ɛdɛnkɛma ye ye fi ɔ muala anu.

²⁰ Ɔsie ye gyɛlɛɛnye, ɔmmaa ye bowule ko bɔbɔ ɛmbu.

²¹Ɛtane bahu amumuyɛma; yɛɛ bɛbabua bɛdabɛ mɔɔ bɛkyi tenlenema la ewule fɔlɛ.

²²Ɛdɛnkɛma die ye sonvolɛma ngoane; bɛnrɛbua bɛdabɛ mɔɔ bɛtane ye la ewule fɔlɛ.