Read Nzema Edw 35 Bible Online

Edw 35 - Nzema bible

Edw 35

¹[26] O Ɛdɛnkɛma, ko tia menli mɔɔ ko tia me, na ko tia menli mɔɔ nee me ko la!

²Fa ɛ sa nu enyinlike ne, na dwazo baboa me.

³Twe wɔ atwɛ ne nee wɔ ɛtweneɛ ne wɔ bɛdabɛ mɔɔ bɛtu me mgbaliko la anwo zo! Ka kile me ɛkɛla kɛ, “Mele wɔ ngoanedievolɛ!”

⁴Maa bɛdabɛ mɔɔ bɛkulo kɛ bɛku me la anyunlu ɛzi bile, bɛ nyunlu ɛgua aze! Maa bɛdabɛ mɔɔ bɛkpondɛ me nee munzule la anye zo ɛda bɛ na bɛzia bɛ nzi.

⁵Maa bɛyɛ kɛ abonle wɔ anwoma gye nu, na Ɛdɛnkɛma soanvolɛ ne ɛlɛpia bɛ ahɔ la.

⁶Maa bɛ adenle nu ɛyɛ awozinli, ɛyɛ teteletetele, na Ɛdɛnkɛma soanvolɛ ne ɛlɛtu bɛ ako la.

⁷Ɔluakɛ mgbane gyɛne ne ala bɛzuale me ɛhane; mgbane gyɛne ne ala bɛpɛle me nwo kuma.

⁸Maa bɛpe kpotekpote arɛlevilɛ nu! Na maa bɛ ngome bɛ ɛhane ɛhye bɛ; maa bɛgua nu bɛwu.

⁹Ɛdɛnkɛma ati, akee me ɛkɛla anye balie, na meava ye ngoanelielɛ ne meadu me nwo.

¹⁰Me sonlabaka ne baha kɛ, “O Ɛdɛnkɛma, nwane a le kɛ ɛdawɔ a? Wɔmɔ a ɛdie mɔɔ ɛnlɛ anwosesebɛ la. ɛfi mɔɔ anwo yɛ se tɛla ye la asa anu, na ɛdie ehyianli nee mɔɔ ɛnlɛ anwosesebɛ la ɛfi awule asa anu a.”

¹¹Ahɔdiawu alasevolɛ dwazo; bɛbiza me mɔɔ menze nwolɛ bie la.

¹²Bɛfa ɛtane bɛtua me kpalɛyɛlɛ kakɛ; me ɛkɛla ɛwie me nwo minli.

¹³Noko mame, mɔɔ bɛnde kpɔkɛ la, mengedale ɛrele, mengyele ɛhɔne, mengilele me nwo nyane. Membɔle me ti aze menzɛlɛle

¹⁴kɛ asɛɛ melɛdi nyane meamaa agɔnwolɛ anzɛɛ adiema nrenya. Menluale kɛ asɛɛ melɛsu ɔmɔ, menzile me ti aze menlile nyane.

¹⁵Noko mendule koti la bɛyiale bɛzelele, bɛhuohuanle bɛ nloa bɛtiale me; abuburama mɔɔ menze bɛ la zɔle me nwo nzekuebɔlɛ nu a bɛangyakyi.

¹⁶Bɛzile me amgbu dɔɔnwo kpalɛ, bɛzelele me, bɛgolole me nwo.

¹⁷O Ɛdɛnkɛma, ɛnea ye zɛ wɔahɔdwu kenlenzu? Die me fi bɛ amumuyɛ ɛtetalɛ nu; die me ngoane fi awenadema ne mɔ asa anu!

¹⁸Na mebayɛ wɔ mo wɔ wɔ menli ne nyianu kpole ne anu; na meaye wɔ ayɛlɛ wɔ bɛ muala bɛ nyunlu ɛkɛ.

¹⁹ Mmamaa adalɛma mɔɔ kpɔ me la si me nwo zo agole, yɛɛ mmamaa me kpɔvolɛma mɔɔ mgbane gyɛne ne ala kpɔ me la fedevede bɛ nye kile me.

²⁰Ɔluakɛ bɛnga anzonudwolɛ edwɛkɛ, bɛtendɛ bɛtia awienvolɛma mɔɔ wɔ maanle ne anu la, na bɛboɔboa bɛbɔ adalɛ.

²¹Bɛbuke bɛ nloa bɛka mgbole bɛkile me; bɛka kɛ, “Ɛhɛe, ɛhɛe! Yɛ nye ɛnwu ye!”

²²O Ɛdɛnkɛma, ɛdawɔ wɔnwu ye; mmayɛ koonwu! O Awulae, mmafi me nwo ɛkɔ moa.

²³Keha ɛ nwo, na dwazo die me ti, me Nyamenle nee me Awulae, di me edwɛkɛ maa me.

²⁴O Ɛdɛnkɛma, me Nyamenle, ɛle tenlenenli na bua me benle; mmamaa bɛsi me nwo zo agole!

²⁵Mmamaa bɛka bɛkile bɛ nwo kɛ, “Ɛhɛe, akee yɛ kunlu ɛdwo!” Mmamaa bɛka kɛ, “Yɛ sa ɛha ye.”

²⁶Maa bɛdabɛ mɔɔ bɛdi fɛlɛko wɔ me anwubɛnyunlu nwo la ɛbɔ anyiemgba na bɛ adwenle ɛbɔ nu! Maa bɛdabɛ mɔɔ bɛmemaa bɛ nwo zo bɛtia me la anyunlu ɛzi bile na bɛbɔ anyiemgba.

²⁷Maa menli mɔɔ akunlu anrɛɛ bɛbua me benle la ɛva anyelielɛ nee fɛlɛkolilɛ ɛdea nuhua dahuu, na bɛha kɛ, “Ɛdɛnkɛma le kpole, ɔ nye die ye sonvolɛ ne kpalɛyɛlɛ nwo!”

²⁸Na mebabɔ wɔ tenleneyɛlɛ ne nolo, na meaye wɔ ayɛlɛ dahuu.