Read Nzema Edw 36 Bible Online

Edw 36 - Nzema bible

Edw 36

¹[27] Ɛtane tendɛ kile amumuyɛnli ne wɔ ye ahonle nu; ɔkpo Nyamenle yɛɛ ɔnzulo ye adenle biala anu.

²Ɔluakɛ ɔbɛlɛbɛla ɔ nwo kɛ ye ɛtane ne ɛnrɛvinde na awie ahyi ye.

³Ɔle ngunzi yɛɛ ɔbɔ adalɛ, yegyakyi nrɛlɛbɛ ɛbɛlabɔlɛ nee boɛlilɛ.

⁴Ɔda ye ɛkpa zo ɔbɔ adwenle ɛtane; ɔfa ndenle mɔɔ ɛnle kpalɛ la anu; ɔngyi debie mɔɔ le ɛtane la.

⁵O Ɛdɛnkɛma, wɔ ɛhulolɛ kpundii ne dwu anwomanyunlu, wɔ nɔhalɛlilɛ ne dwu amungu ne mɔ anu.

⁶Wɔ tenleneyɛlɛ ne kpole le kɛ Nyamenle awoka ne mɔ, wɔ ndɛnebualɛ ne mɔ abo kuma le kɛ azule buma; O Ɛdɛnkɛma, ɛdie menli nee nane ngoane.

⁷O Nyamenle, wɔ ɛhulolɛ kpundii ne sonle bolɛ! Menli kɔsɔɔti nriandi fea ɛ ndɛba abo.

⁸Bɛdi bɛ ko yi wɔ wɔ sua nu, na ɛmaa bɛ nzule mɔɔ vi wɔ anyelielɛ azule nu la bɛno.

⁹Ɔluakɛ wɔmɔ a ɛle ngoane nzufeanvea a; wɔ wienyi ne anu yɛɛ yɛnwu wienyi a.

¹⁰O kile wɔ ɛhulolɛ kpundii ne wɔ bɛdabɛ mɔɔ bɛze wɔ la anwo zo, na maa mɔɔ ahonle nu te la wɔ ngoanelielɛ ne.

¹¹Mmamaa adubɛnwonli bikye me, mmamaa amumuyɛnli asa ka me.

¹²Nea, kɛ amumuyɛma ɛdu ɛgua ɛ, bɛvuandi bɛ bɛgua, bɛngola dwazo.