Read Nzema Edw 37 Bible Online

Edw 37 - Nzema bible

Edw 37

¹[28] Mmafonla ɛ nwo wɔ amumuyɛma ati; mmamaa ɛ nye bolo ɛtanema!

²Ɔluakɛ ɔnrɛhyɛ na bɛanwoso kɛ ndile, na bɛawe kɛ nya amolɛ.

³Fa ɛ rɛle wula Ɛdɛnkɛma anu na di boɛ, amaa wɔadɛnla azɛlɛ ne azo, ɛ nwo adɔ wɔ.

⁴Maa ɛ nye ɛlie Ɛdɛnkɛma anwo, na ɔbamaa wɔanyia mɔɔ ɛkpondɛ la.

⁵Fa ɛ nwo maa Ɛdɛnkɛma; fa ɛ rɛle wula ye nu, ɔbali yeamaa wɔ.

⁶Ɔbamaa wɔ benlelilɛ ala ali wienyi, wɔ tenleneyɛlɛ ada kɛ ewiazo sɛnzɛne.

⁷Gyinla ɛ nwo wɔ Ɛdɛnkɛma anyunlu, na si abotane kendɛ ye; mmafonla ɛ nwo wɔ mɔɔ ɛkpazi la anwo, anzɛɛ wɔ mɔɔ bɔ adwenle ɛtane la anwo.

⁸Mmafa ɛya, yɛɛ mmamaa wɔ ahonle futu! Mmafonla ɛ nwo; ɔwie munzule.

⁹Ɔluakɛ bɛbaminli amumuyɛma abo zo; na bɛdabɛ mɔɔ bɛ rɛle wɔ Ɛdɛnkɛma anu la bava azɛlɛ ne.

¹⁰Ɔnrɛhyɛ biala ɛnee amumuyɛnli ne abo zo ɛminli, ɛbahɔnlea ɛleka mɔɔ ɔwɔ la, na ɛnrɛnwu ye.

¹¹ Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.

¹²Amumuyɛnli pepɛ tenlenenli agyakɛ anzi, ɔkpɔ ye, na ɔbu ye anyehoanlɛ.

¹³Na Ɛdɛnkɛma sele amumuyɛnli ne, ɔluakɛ ɔnwu kɛ ye awieleɛ ɛbikye.

¹⁴Amumuyɛma twe dadeɛ na bɛkpo bɛ ɛda ne mɔ, kɛ bɛku ehyianli ne nee mɔɔ ɛhyia la, kɛ bɛku bɛdabɛ mɔɔ bɛdi pɛlepɛle la;

¹⁵bɛ dadeɛ bawɔ bɛ ngome bɛ ahonle nu, yɛɛ bɛ ɛda ne mɔ babubu.

¹⁶Ekyi mɔɔ tenlenenli lɛ la le kpalɛ tɛla amumuyɛma ɛdeɛ dɔɔnwo ne.

¹⁷Ɔluakɛ bɛbabubu amumuyɛma asa; na Ɛdɛnkɛma bazɔ tenlenema nu.

¹⁸Ɛdɛnkɛma ze mɔɔ ɛnze nwolɛ bie la kenle, bɛ agyadeɛ bayɛ bɛ ɛdeɛ dahuu.

¹⁹Munzule ba a bɛ nyunlu ɛngua aze, ɛhɔne mekɛ nu bɛlɛ aleɛ molozo.

²⁰Noko amumuyɛma abo zo minli; Ɛdɛnkɛma kpɔvolɛma anyunlunyia le kɛ ndile, bɛminli, bɛle kɛ esike, bɛ bo zo minli bɔkɔɔ.

²¹Amumuyɛnli biza bosea a ɔndua, na tenlenenli asa do, ɔbuke ɔ sa nu;

²²ɔluakɛ bɛdabɛ mɔɔ Ɛdɛnkɛma ɛyila bɛ la bava azɛlɛ ne, na bɛdabɛ mɔɔ yedua bɛ kakɛ la abo zo baminli.

²³Ɛdɛnkɛma a maa sonla tudu ɔ gyakɛ a, na ɔmaa mɔɔ ɔ nye die ɔ nwo la kpazi.

²⁴Saa ɔtɔ aze bɔbɔ a, ɔnrɛha ɛkɛ, ɔluakɛ Ɛdɛnkɛma bakpogya ye zo.

²⁵Ɛnee mele kakula, na kɛkala meyɛ kpanyinli; na metɛnwunle kɛ bɛkpo tenlenenli ɛlɛ; yɛɛ metɛnwunle kɛ ɔ mra ɛlɛsɛlɛzɛlɛ aleɛ ali.

²⁶Ɔ sa dwu menli nwo zo yɛɛ ɔbɔ awie biala bosea; ɔ mra le nyilalɛ kpole.

²⁷Twe ɛ nwo fi ɛtane nwo na di boɛ, na wɔadɛnla aze wɔahyɛ.

²⁸Ɔluakɛ Ɛdɛnkɛma kulo pɛlepɛlelilɛ; ɔnrɛkpo ye menli ne mɔɔ di nɔhalɛ la. Ɔbabɔ tenlenema anwo bane dahuu, na yeaminli amumuyɛma abo zo.

²⁹Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.

³⁰Tenlenenli ka nrɛlɛbɛ edwɛkɛ, yɛɛ ɔdi pɛlepɛle wɔ ye edwɛkɛhanlɛ nu.

³¹Ye Nyamenle ne mɛla wɔ ye ahonle nu; ɔndwe ɔ nwo ɔnvi nwolɛ.

³²Amumuyɛnli bu tenlenenli anyehoanlɛ, na ɔbɔ mɔdenle kɛ ɔku ye.

³³Ɛdɛnkɛma ɛnrɛye ye ɛnrɛmaa ɔ sa ɛnrɛha ye, bɛdi ye edwɛkɛ a, ɔnrɛmaa bɛnrɛbua ye ewule fɔlɛ.

³⁴Fa ɛ rɛle wula Ɛdɛnkɛma anu na dua ye adenle ne anu, na ɔbakpogya wɔ zo yeamaa wɔanyia azɛlɛ ne; ɛbanwu amumuyɛma ɛzɛkyelɛ.

³⁵Menwu nrenya amumuyɛnli atisesebɛ bie, ye anwonyia hɔle anwuma kɛ Lɛbanɔn sida baka.

³⁶Nzinlii menzenle ɛkɛ ne, na nea, ɔnle ɛkɛ; memkpondɛle ye, na meannwu ye.

³⁷Nea sonla ne mɔɔ di boɛ, na nea tenlenenli ne, ɔluakɛ anzonudwolɛ sonla lɛ ɔ bo zo amra.

³⁸Na bɛbazɛkye mɛladonlɛma, amumuyɛma ɛnrɛnyia bɛ bo zo amra.

³⁹Tenlenema ngoanelielɛ vi Ɛdɛnkɛma, ɔle bɛ ɛvealeka wɔ ngyegyelɛ nu.

⁴⁰Ɛdɛnkɛma boa bɛ na ɔdie bɛ ngoane; ɔye bɛ ɔfi amumuyɛma asa anu, ɔdie bɛ ngoane; ɔboalekɛ bɛnriandi bɛbafea ye nu.