Read Nzema Edw 38 Bible Online

Edw 38 - Nzema bible

Edw 38

¹O Ɛdɛnkɛma, mmafa ɛya ɛtea me, anzɛɛ mmafa ɛya ɛtwe me nzo!

²Ɔluakɛ wɔ ɛda ne mɔ ɛboda me, yɛɛ ɛ sa ɛla me nwo zo.

³Wɔ ɛya kpole ne ati me nwonane nu ɛnde, me ɛtane ti, mende kpɔkɛ.

⁴Ɔluakɛ me amumuyɛ ɛbo me nwo zo, bɛ ɛnlomboɛ ɛyɛ adesoa ɛbo me nwo zo.

⁵Me nganlɛ ne mɔ ɛkpɔlɔ na bɛbɔ, ɔboalekɛ meyɛ ngoasea ninyɛne.

⁶Megolo megua mutulɛ nu, alehyenlɛ kɔsɔɔti medi nyane.

⁷Ɔluakɛ me nze nu dwe me yɛɛ me nwonane nu ɛnde.

⁸Menwa nrenzenrenze, me ɛnwomenle ɛwie, me ahonle nriandi me kunlu maa mekponle.

⁹Awulae, ɛze me ngyianlɛ muala, me ɛkponlenlɛ ɛnvea wɔ.

¹⁰Me ahonle si me kunlu, me anwosesebɛ ɛwie; me nye zo ɛyɛ awozinli.

¹¹Me gɔnwo mɔ gyinla ahane nea me nee me anwubɛnyunlu, yɛɛ me nwo amra ɛmbikye me.

¹²Bɛdabɛ mɔɔ bɛkpondɛ me nee ewule la suozua me ngane, bɛdabɛ mɔɔ bɛkpondɛ me nee nyane la nwunlonwunla me, yɛɛ dahuu bɛkɔ me ti akpamo.

¹³Mele kɛ anzondiliravolɛ, mende ɛhwee, medɔ mumule, membuke me nloa.

¹⁴Ɛhɛe, mele kɛ anzondiliravolɛ, ɔmbuke ɔ nloa ɔndwi awie anyunlu.

¹⁵O Ɛdɛnkɛma, wɔmɔ yɛɛ me rɛle wɔ wɔ nu a; O Ɛdɛnkɛma me Nyamenle, wɔmɔ yɛɛ ɛbabua me a.

¹⁶Ɔluakɛ mesɛlɛ kɛ, “Mmamaa bɛsi me nwo zo agole, bɛmɛ mɔɔ metu koti a bɛsele me la!”

¹⁷Ɔluakɛ asɛɛ medɔ aze mewie, yɛɛ dahuu mete nyane me nu.

¹⁸Meka me ɛtane meto gua, medi me ɛtane nwo nyane.

¹⁹Bɛdabɛ mɔɔ mgbane gyɛne ne ala bɛkpɔ me la anwo yɛ se, yɛɛ bɛdabɛ mɔɔ mgbane gyɛne ne ala bɛkyi me la zonle.

²⁰Bɛdabɛ mɔɔ bɛfa ɛtane bɛtua me kpalɛyɛlɛ kakɛ la le me kpɔvolɛma, ɔboalekɛ medi kpalɛ nzi.

²¹O Ɛdɛnkɛma, mmakpo me! O me Nyamenle, mmafi me nwo ɛkɔ moa!

²²Ka ɛ nwo baboa me, O Awulae, me ngoanedievolɛ!