Read Nzema Edw 39 Bible Online

Edw 39 - Nzema bible

Edw 39

¹[29] Menganle kɛ, “Mebanlea me nwo boɛ, amaa meanva me nloa meanga ɛtane; mebazɔ me nloa, mekɛ mɔɔ amumuyɛma gyigyi me nyunlu la.”

²Memuanle me nloa na menyɛle diinyi, menzɔle me nwo biala na yeanyɛ boɛ, me nyanelilɛ ne yɛle kpole,

³na me ahonle mɔɔ la me kunlu la lɔle katukatu. Mendwenledwenlenle nwolɛ la, me nwo yelɛyelale me; akee mendendɛle menzele kɛ,

⁴“Ɛdɛnkɛma, maa menwu me awieleɛ, nee me ngoane mekɛ ne tendenle; maa menwu kɛ me mekɛ ne ɛlɛsi anriandi la.”

⁵Nea, wɔyɛ me mekɛ ne ezinraa, me ngoane mekɛ ɛnle ɛhwee ɛ nye zo. Nɔhalɛ, awie biala ngoane le kɛ anwoma ala la!

⁶Nɔhalɛ, sonla le kɛ ɛlawolɛ! Nɔhalɛ, sonla fonla ɔ nwo mgbane; ɔkuohua, na ɔnze sonla mɔɔ bava la!

⁷Awulae, na kɛkala, mekendɛ duzu? Me anyelazo wɔ wɔ nu.

⁸Die me fi me mɛladonlɛ kɔsɔɔti anu. Mmamaa ahoasea sele me!

⁹Medɔ mumule, membuke me nloa, ɔluakɛ ɛdawɔ yɛɛ wɔyɛ a.

¹⁰Gyakyi me ɛbolɛ; wɔ adɛka ne mɔ ɛbo me nwo zo.

¹¹Saa sonla ɛtane ti ɛtwe ɔ nzo a, ɛsɛkye ye kɛ ɛlɛtɛba sɛkye ye ninyɛnkpa la; nɔhalɛ, sonla biala le kɛ anwoma ala la.

¹²O Ɛdɛnkɛma, tie me nzɛlɛlɛ, na gyele ɛ nzo tie me ɛzunlɛ; mmamaa me monle ɛhwinlɛ yɛ mgbane ɛ nyunlu. Ɔluakɛ mele wɔ ɛyɛvolɛ mɔɔ ɛlɛpɛ nu aze, adendulɛnli, kɛ yɛ nlenya mɔ la.

¹³Gyakyi me, amaa meali me ti ekyii, kolaa na meavi nu mɔɔ bɛnnwu me ko a!