Read Nzema Edw 40 Bible Online

Edw 40 - Nzema bible

Edw 40

¹[30] Menzile abotane mengendɛle Ɛdɛnkɛma; na ɔdiele me na ɔdele me ɛzunlɛ.

²Ɔyele me ɔvile kuma anu ɛzulolɛ ne anu, ɔyele me ɔvile moto ne anu, na ɔvale me ɔziele bodane zo, ɔmanle mengyinlanle boɛ.

³Ɔmanle mendole edwɛne fofolɛ, mendole ayɛlɛyelɛ edwɛne memanle yɛ Nyamenle ne. Dɔɔnwo banwu ye na bɛazulo, na bɛava bɛ rɛle bɛawula Ɛdɛnkɛma anu.

⁴Nyilalɛ ɛha sonla ne mɔɔ ɔ rɛle wɔ Ɛdɛnkɛma anu, na ɔnva ɔ nwo ɔndo mgbanyizonlema anwo, anzɛɛ menli mɔɔ sonle awozonle na bɛkpo Nyamenle la anwo la.

⁵O Ɛdɛnkɛma me Nyamenle, wɔmaa wɔ adwenle, nee wɔ nwanwane nyɛleɛ wɔ yɛ nwo ɛyɛ mɔnwo; awie biala nee wɔ ɛnzɛ! Saa mebɔ nolo meaha bɛ nwo edwɛkɛ a, anrɛɛ bɛzonle somaa mɔɔ bɛngola bɛ tia a.

⁶ Ɛmkpondɛ azubɔlɛ nee azubɔdeɛ; noko wɔmaa me ɛnzonlɛ kɛ menva mendie wɔ. Ɛyelalɛ azubɔdeɛ nee ɛtane azubɔdeɛ, wɔamkpondɛ ɛhye mɔ biala.

⁷Akee menganle kɛ, “Medame ɛ, mera; bɛhɛlɛ me nwo edwɛkɛ wɔ buluku ne anu;

⁸O me Nyamenle, mekulo kɛ meyɛ wɔ ɛhulolɛdeɛ; wɔ mɛla ne wɔ me ahonle nu.”

⁹Meha wɔ ngoanelielɛ nwo edwɛkɛ fɛlɛko ne, wɔ mekɛ mɔɔ wɔ menli ne amuala yiale la. Kɛmɔ ɛdawɔ ɛze la, O Ɛdɛnkɛma, metɛgyakyile wɔ nolobɔlɛ ne.

¹⁰Metɛkedale wɔ ngoanelielɛ nwo edwɛkɛ ne azo. Meha wɔ nɔhalɛlilɛ nee wɔ ngoanelielɛ nwo edwɛkɛ ne; meanva wɔ ɛhulolɛ kpundii ne nee wɔ nɔhalɛlilɛ ne meanvea wɔ menli ne wɔ nyianu kpole ne anu.

¹¹O Ɛdɛnkɛma, mmakpo kɛ ɛkɛze me anwunvɔne, maa wɔ ɛhulolɛ kpundii ne nee wɔ nɔhalɛlilɛ ne ɛbɔ me nwo bane dahuu.

¹²Munzule dɔɔnwo, menze bɛ nloa, ɛbɔ ɛyia me; me ɛtane ne mɔ ɛbo me nwo zo, mennwu aze; bɛzonle bɛtɛla me ti enrinli; me nwo ɛgolo me.

¹³O Ɛdɛnkɛma, mesɛlɛ wɔ, die me! O Ɛdɛnkɛma, ka ɛ nwo baboa me!

¹⁴Bɛdabɛ mɔɔ bɛkpondɛ me bɛahu me la, maa bɛbɔ anyiemgba na bɛ adwenle ɛha ɛbɔ nu; bɛdabɛ mɔɔ bɛkulo kɛ medi nyane la, maa bɛzia bɛ nzi na bɛ nyunlu ɛzi bile.

¹⁵Maa bɛdabɛ mɔɔ bɛgolo me nwo kɛ, “Ɛhɛɛ, Ɛhɛɛ” la, anyunlu ɛgua aze na bɛ rɛle ɛbɔ.

¹⁶Maa bɛdabɛ mɔɔ bɛkpondɛ ɛ bo zo la anye ɛlie na wɔmɔ ɛ ti bɛli fɛlɛko. Maa bɛdabɛ mɔɔ bɛkulo wɔ ngoanelielɛ ne la, ɛha ye dahuu kɛ, “Ɛdɛnkɛma le bedevinli.”

¹⁷Mame, mele ehyianli, menlɛ bie; na Awulae dwenle me nwo. O me Nyamenle, ɛle me boavolɛ, ɛle me ngoanedievolɛ, mmakyɛ!