Read Nzema Edw 41 Bible Online

Edw 41 - Nzema bible

Edw 41

¹[31] Nyilalɛ ɛha sonla ne mɔɔ dwenle ehyianvolɛma anwo la! Ɛdɛnkɛma die ye wɔ ye amaneɛnwunlɛ nu;

²Ɛdɛnkɛma bɔ ɔ nwo bane na ɔmaa ye ngoane; bɛfɛlɛ ye kɛ ɔle nyilalɛ wɔ azɛlɛ ne azo; Ɛdɛnkɛma ɛnye ye ɛmmaa ye kpɔvolɛma.

³Ɛdɛnkɛma maa ye anwosesebɛ wɔ ye anwondolɛ nu; ye anwonyane nu, ɛyɛ ye ewule biala ayile.

⁴Menganle kɛ, “O Ɛdɛnkɛma, nwu me anwunvɔne; meyɛ ɛtane metia wɔ na yɛ me ayile.”

⁵Me kpɔvolɛma fa adwenle ɛtane ka kɛ, “Kenlenzu a ɔkɛwu na ye duma aminli a?”

⁶Saa bɛ bie ba kɛ ɔbanlea me a, ɔka ye menlemenle, noko ye ahonle nu le asayɛlɛ ngome; ɔfinde ɔkɔ a, ɔkɔbɔ me ewule ne nolo.

⁷Bɛdabɛ mɔɔ bɛkyi me la tu bɛ nwo azukue wɔ me nwo; bɛdwenle mɔɔ ɛnle kpalɛ la a bɛmaa me a.

⁸Bɛka kɛ, “Anwonyane mɔɔ ɛbɔ ye la le kpole; ɔ nwo mɔɔ ɛdo ye la, ɔnrɛdwazo bieko.”

⁹ Me gɔnwo kpalɛ bɔbɔ mɔɔ me rɛle wɔ ye nu, mɔɔ nee me yɛto ɛsalɛ ɛyɛba ko anu la, ɛhakyi ɔ nzi ɛzi me.

¹⁰Noko, O Ɛdɛnkɛma, nwu me anwunvɔne, na dwazo me, amaa medame noko meadua bɛ kakɛ bie.

¹¹Ɛhye bamaa meanwu kɛ ɛ nye die me nwo, kɛ wɔammaa me kpɔvolɛma anli me nwo zo konim.

¹²Kɛmɔ medi boɛ la ati, wɔboa me, na wɔva me wɔzie ɛ nyunlu ɛkɛ ne dahuu.

¹³ Ayɛlɛyelɛ ɛha Ɛdɛnkɛma, Yizilayɛ Nyamenle ne, ɔvi aloamɔleɛ kɔdwu melɛ mɔɔ ɛnlɛ awieleɛ! Amen! Amen!