Read Nzema Edw 42 Bible Online

Edw 42 - Nzema bible

Edw 42

¹Kɛ weɛlɛ anwo si dɔ azule mɔɔ se la, O Nyamenle, zɔhane ala yɛɛ me nwo dɔ wɔ a.

²Nyamenle anwo nzuhɔne ku me ɛkɛla, tease Nyamenle ne anwo nzuhɔne ku me. Kenlenzu yɛɛ mebara mearanwu Nyamenle anyunlu a?

³Alehyenlɛ nee aledwolɛ, me monle ɛyɛ me aleɛ, na menli biza me dahuu kɛ, “Wɔ Nyamenle ne wɔ ni?”

⁴Meka me nyane edwɛkɛ a, mekakye ɛhye mɔ amuala; kɛ menzile me nee ɛlɔne ne luale, na menlile bɛ ti, yɛdole ɛlɔnwɔne, yɛdole moyɛlɛ edwɛne, yɛvale fɛlɛko yɛdeɛdeanle nu, yɛhɔle Nyamenle sua nu yɛlile ɛvoyia la.

⁵O me ɛkɛla, duzu ati a nyane ɛha wɔ zɛhae ɛ, duzu ati a ɛ nwo mɔra ɛdu zɛhae ɛ? Nyia anyelazo wɔ Nyamenle anu, na mebaye ye ayɛlɛ bieko kɛ, ɔle me boavolɛ nee me Nyamenle.

⁶Melɛdi nyane kpole wɔ nlɔnu ɛke, yemɔti me adwenle ɛrape ɛ nwo zo. Nyane ne ɛyɛ kɛ azɛlɛkye ɛbu ɛva me nwo zo, yemaa me adwenle ɛha ɛbɔ nu kɛ azuyilɛ mɔɔ vi Hɛmɔn Boka nee Mezaa Boka ɛlɛwola bobobobo agua Azule Dwɔdan ne anu la.

⁸Alehyenlɛ nu, Ɛdɛnkɛma kile ye ɛhulolɛ kpundii ne; aledwolɛ nu, meto edwɛne memaa ye, mefa mesɛlɛ Nyamenle ne mɔɔ le me ngoane la.

⁹Meka mekile Nyamenle, me bodane ne kɛ, “Duzu ati a ɛ rɛle ɛvi me ɛ? Duzu ati a ɔwɔ kɛ medi nyane kɛ me kpɔvolɛma ɛholo me nwo zo a?”

¹⁰Me kpɔvolɛma wowɔ me safule, bɛmaa ɔyɛ me nyane kɛ nganlɛ wɔ me nwonane nu; na bɛkɔ zo bɛbiza me kɛ, “Wɔ Nyamenle ne wɔ ni?”

¹¹O me ɛkɛla, duzu ati a nyane ɛha wɔ zɛhae ɛ, duzu ati a ɛ nwo mɔra ɛdu zɛhae ɛ? Nyia anyelazo wɔ Nyamenle anu, ɔluakɛ mebaye ye ayɛlɛ bieko kɛ, ɔle me boavolɛ nee me Nyamenle.