Read Nzema Edw 43 Bible Online

Edw 43 - Nzema bible

Edw 43

¹Bua me benle, O Nyamenle, na die me ti wɔ menli mɔɔ ɛnze Nyamenle la asa anu; die me fi adalɛma nee amumuyɛma asa anu!

²Ɔluakɛ wɔmɔ a ɛle Nyamenle mɔɔ menriandi mefea wɔ nu a; duzu ati a wɔkpo me a? Duzu ati a medi nyane kɛ me kpɔvolɛma ɛholo me nwo zo a?

³O soa wɔ wienyi ne nee wɔ nɔhalɛ ne; maa bɛli me nyunlu, bɛva me bɛhɔ wɔ boka nwuanzanwuanza ne azo, nee ɛleka mɔɔ ɛde la.

⁴Akee mebahɔ Nyamenle azukponle ne anwo, meahɔ me Nyamenle, me anyelielɛ kpole ne ɛkɛ; na meava getaa kpole meado edwɛne meaye wɔ ayɛlɛ, O Nyamenle, me Nyamenle.

⁵O me ɛkɛla, duzu ati a nyane ɛha wɔ zɛhae ɛ, duzu ati a ɛ nwo mɔra ɛdu zɛhae ɛ? Nyia anyelazo wɔ Nyamenle anu, ɔluakɛ mebaye ye ayɛlɛ bieko kɛ, ɔle me boavolɛ nee me Nyamenle.